بختاور بھٹو زرداری

بختاور بھٹو زرداری
معلومات شخصیت
پیدائش	(1990-01-25) 25 جنوری 1990 کراچی، سندھ، پاکستان
قومیت	پاکستانی
مذہب	اسلام
جماعت	پاکستان پیپلز پارٹی
والدین	آصف علی زرداری بینظیر بھٹو
والد	آصف علی زرداری
والدہ	بینظیر بھٹو
بہن/بھائی	بلاول بھٹو زرداری
خاندان	زرداری بلوچ خاندان بھٹو خاندان
عملی زندگی
مادر علمی	یونیورسٹی آف ایڈنبرا
پیشہ	سیاست دان
ماء ٻولی	اردو
پیشہ ورانہ زبان	اردو
ویب سائٹ
ویب سائٹ	Bakhtawarbz.com

بختاور بھٹو زرداری پاکستان پیپلز پارٹی دے سیاسی ٹٻر دا حصہ ہن۔ اوہ 25 جنوری 1990ء کوں پاکستان دے صوبہ سندھ وچ ڄمی ہن۔ اوہ پاکستان دی سابق وزیراعظم محترمہ بے نظیر بھٹو تے پاکستان دے سابق صدر آصف علی زرداری دی سب توں وݙی دھی ہن۔ اوہ پاکستان پیپلز پارٹی دے بانی ذوالفقار علی بھٹو دی ݙوہتری تے شاہنواز بھٹو تے مرتضیٰ بھٹو دی بھڑینجی ہن۔

تعلیمی سفر

بختاور بھٹو زرداری نے انگریزی ادب وچ ایم اے تے گریجویشن ایڈن برگ یونیورسٹی توں پاس کیتا۔ تعلیمی میدان وچ انہاں دی حوصلہ افزائی دی وݙی وجہ شہید ذوالفقار علی بھٹو انسٹی ٹیوٹ آف سائنس اینڈ ٹیکنالوجی ہے، جیندے وچ انہاں نے اہم کردار ادا کیتا۔ ایں ادارے دی بنیاد محترمہ بے نظیر بھٹو نے 1995ء وچ رکھی ہئی، جیندا مقصد پاکستان دے عوام کوں عالمی معیار دی تعلیم فراہم کرݨ ہے۔

بختاور بھٹو زرداری کوں باکسنگ دا شوق

بختاور بھٹو زرداری سوشل میڈیا تے اپݨیاں سیاسی تے دلچسپ سرگرمیاں دی وجہ توں خاصی متحرک ہن۔ انہاں نے اپݨی باکسنگ دی ٹریننگ حاصل کریندے ہوئے ہک ویڈیو شیئر کیتی جیہڑی سوشل میڈیا تے مقبول تھئی۔ ایں ویڈیو دی خاص ڳالھ ایہ ہے جو اوہ جیندے توں باکسنگ دی ٹریننگ ڳھندی پئی ہئی اوہ کوئی ٻیا کائینی بلکہ پاکستانی نژاد برطانوی باکسر عامر خان ہے۔ بختاور بھٹو زرداری سوشل میڈیا تے دبئی دی ہک عمارت توں درک لاوݨ دی ویڈیو وی شیئر کر چکی ہن۔ ایندے علاوہ اوہ پاکستان پیپلز پارٹی دے مختلف رہنماویں دے حوالے نال وی رابطے وچ رہندیاں ہن۔

بختاور دی سینٹ وچ بل دی مخالفت

رمضان المبارک توں پہلے سینیٹ وچ ہک بل منظور تھیا جیندے تحت عوامی مقامات تے روزے دے دوران کھاوݨ پیوݨ تے 25 ہزار روپے تک جرمانہ کیتا ویسی۔ عوامی تے مذہبی حلقیاں نے ایں بل کوں خوش آئند قرار ݙیندے ہوئیں ایندا خیر مقدم کیتا ہے۔ پر بختاور بھٹو نے ایں بل دی شدید مخالفت کیتی۔ بختاور بھٹو دے نزدیک شدید گرم موسم وچ مسافر تے مریض لوکیں کوں ترہے لڳ سڳدی ہے تے اگر اوہ پاݨی نہ پیون تاں ڈی ہائیڈریشن دا شکار تھی سڳدے ہن جیندے نال انہہں دی موت واقع تھی سڳدی ہے۔ انہاں نے ایں سوچ دے تحت بل دی مخالفت کیتی جیہڑا زبردستی کہیں کوں ٻھکھا تسا رکھݨ اسلام کائینی۔

بختاور بھٹو دی ڈیزرٹ وارئیر چیلنج وچ شرکت

بختاور بھٹو زرداری نے متحدہ عرب امارات وچ تھیوݨ آلے ڈیزرٹ وارئیر چیلنج ایونٹ وچ حصہ ڳھدا۔ ایہ ایونٹ یکم اپریل 2017ء کوں منعقد کیتا ڳیا ہئی۔ ایونٹ وچ بختاور بھٹو نے بھڄݨ، جمپنگ، کلائمبنگ تے کرولنگ کریندے ہوئیں فائنل لائن عبور کیتی۔ بختاور بھٹو نے ڈیزرٹ وارئیر چیلنج وچ شرکت دیاں تصاویر پوسٹ کیتیاں تاں انہیں کوں سوشل میڈیا تے ٻہوں پزیرائی ملی۔

بختاور دا بے نظیر بھٹو کوں خراج عقیدت

بختاور بھٹو زرداری نے اپݨی ماء محترمہ بے نظیر بھٹو کوں خراجِ عقیدت پیش کرݨ دے کیتے وکھرا طریقہ اختیار کریندے ہوئے ہک ڳاݨا ریلیز کیتا۔ جیہڑا انہاں نے خود ہی لکھیا تے خود ہی ڳایا۔ ایں ڳاݨے وچ انہاں نے اپݨی ماء کوں خوبصورتی تے دانش دا مرکز قرار ݙتا تے انہیں دی روح نال مخاطب تھیندے ہوئے آکھیا ہے جو بے نظیر اپݨے ٻچیاں کوں تنہا چھوڑ ڳئین، انہیں دے بغیر قوم ناامید ہے تے ایہ جو اوہ 54 سال دی عمر وچ ہی قتل کر ݙتی ڳئین۔ ڳاݨے دے ٻول ہن ’’میں درد کوں دور کریساں‘‘۔ ڳاݨے دی ویڈیو وچ محترمہ بے نظیر بھٹو دیاں تصاویر تے ویڈیو کلپس شامل کیتے ڳئین جنہیں وچ انہیں دی شہادت توں چند لمحے پہلے لیاقت باغ، راولپنڈی دے مناظر وی شامل ہن۔ محترمہ بے نظیر بھٹو کوں 27 دسمبر 2007ء کوں ایں مقام تے قتل کیتا ڳیا ہئی۔