باغ علی شاہ

باغ علی شاہ قریشی کروڑ لعل عیسن ضلع مظفر ڳڑھ دے وسوں واݨ ہن۔ آپ دینی علوم تے کافی مہارت رکھدے ہن۔ آپ دیاں کافیاں وچ نظم دا انداز جھلکدے۔ انھاں شاہنامہ فردوسی وچوں قصہ بیزن منیژہ وی سرائیکی وچ منظوم کیتا ہئی۔ ایں مثنوی دے آخر وچ ایندے توڑ پُڄݨ دی تاریخ1880ء مطابق 1298ھ ہئی۔ تاریخ وفات دا علم کینی۔ یقینا 1880ء دے بعد دی کوئی تاریخ ہوسے۔ باغ علی شاہ دا ’’جوگی نامہ‘‘ کافی ’’پیلوں‘‘ ٻہوںمشہور اے۔ ایں توں علاوہ پُراݨے چھپے ہوئیاں کتاباں وچ انھاں دا کلام اکثر ملدے۔کلام دی ونکی:

کافی

سُݨ وے سڄݨ ہُݨ زاریاں

سئیں نہ ݙکھا ݙکھاں ماریاں

توں بن سڄݨ لاچار ہاں

وچ درد دے بیمار ہاں

صبح شام دل افگار ہاں

گھلیاں برہوں اندھاریاں

جس دن تساں دِلڑی ٹھڳی

جُڑ سانگ سینے وچ لڳی

ما پیؤ قبیلہ سٹ وڳی

سر چا پرم دیاں کھاریاں

سانول سڄݨ ہُݨ نہ سِکا

شفقت کنوں مکھڑا ݙکھا

بھر جام وصلت دا پلا

حٻدار کر حٻداریاں

جند باغ آئی ہے لباں

ݙینہ رات روواں کر فغاں

سر بار غم دا ہے گراں

غم  خوار کر غم  خواریاں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان