بازی

ٻیاں  کھیݙاں  کھیݙݨ دے نال نال وݙئیں  کنوں  لُک تے تاش وی کھیݙدے ہاسے ، منگ پنّاتے چوسر ہوندی ہئی ۔ تاش دیاں  چار ونکیاں  ہوندیاں  ہَن، ہک دا ناں  چیڑی ، پان ، اِٹ تے حکم ۔ سب دے تیرھاں  تیرھاں  پنے ہوندے ہَن ،چوسر بعد ءِچ سپ وی سِکھ ڳیوسے ، سِپ وچ بارا پتہ حکم دا یکا ہوندا ہا ۔ اوندے بعد حکم دی دُکی ہوندی ہئی اوندے پنجوی نمبر ہَن، حکم دے نؤں  دے نؤں  نمبر تے ݙاہ تے ٻاوی نمبر ،ایویں  ہر یکے دا ہک ہک نمبر ہوندا ہا ۔یکا ، دُکی ، تِرکی ، چوکی ،پنجی ، چھکی ، ستی ، اَٹھی ، نہلا، دھلا ، گولا ، بیگی تے بادشاہ اینویں  ناں  ہوندے ہَن ۔جینکوں  کوٹ آوے ہا او پھر گِھر ٻاہندے ہَن تے جیکوں  ڈبل کوٹ آوے ہا او جوڑی اُٹھی ویندی ہئی تے اُنہیں  دی جاہ تے ٻی جوڑی ٻاہندی ہئی ۔ سِپ اِچ ڈبل کوٹ کوں  لَو اَکھیندے ہَن ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان