بادشاہی مسجد جلہ جیم

آکھیا ویندے جو مغل شہنشاہ اکبر 1596ء اچ جلہ ارائیں دے شہر دے وچالے قلعہ بݨوایا تے نال مضبوط فصیل وی تعمیر کرائی ۔ جلال الدین دے پُتر مولوی رکن الدین شاہجہاں دے دور اچ اتھاں ہک وݙی سوہݨی مسیت بݨائی جیڑھی کاشی تے چوبکاری دا نادر نمونہ ہے ، جیکوں ݙیکھݨ نال فن تعمیر دی تے حسن ذوق دی داد ݙیوݨی پوندی ہے ، ایہہ سوہݨی مسیت اڄ وی اپݨی عظمت تے شان ݙکھویندی ہے تے اپݨے دور دی عظیم داستان سݨویندی ہے ،ضلع وہاڑی تے خاص طور تے میلسی دے علاقے اچ آوݨ آلے رہائشی ایں مسیت کوں ضرور ݙیکھندے ہن ،جیندے مینار اوں ویلھے دے بݨاوݨ آلے ہستیاں دی شان بیان کریندن ۔ مسیت دا برانڈہ تے مینار بعد اچ بݨائے ڳئے ہن ۔ جلہ جیم جیڑھا کݙاہیں وݙی اہمیت دا حامل ہئی ، ہُݨ تحصیل میلسی دا ہک نِکا جہا قصبہ ہے تے ایں ترقی یافتہ دور اچ غیر ترقی یافتہ علاقہ سمجھیا ویندے پر غور کریجے تاں ایں علاقے وچ ساݙی تریخی تے ثقافتی ورثہ موجود اے ، جنہاں کوں محفوظ کرݨ دی ݙاڈھی لوڑھ ہے ، مسیت فی الحال کجھ چنڳی حالت اچ ہے۔

ایں تریخی مسیت دے اندر لکڑ دے چار پِلر موجود ہن ، انہاں اُتے سوہݨی نقش و نگار دی کھدائی دی صورت اچ موجود ہن جہاں اچوں ہک پلر تے تریخ 1200 ہجری لکھی ڳئی اے ۔ اتھاں پِلرں دے اُتے چھت دے نال نال لکڑ دے ای ٻہوں سوہݨے لاٹو جہے بݨئے ہوئے ہن جیڑھے فن کاریگری دا بہترین نمونہ ہے ۔

ایں مسیت دا ہک وݙا ٻوہا تے اوندے سجٖے کھٻے ݙو نِکے نِکے ٻوہے ہن ، مسجد دے اندر وی سجٖے کھٻے ݙو ٻاریاں بݨیا ہویاں ہن ، برانڈہ وی اے ، ایں مسیت دے ݙو مینار سلامت ہن، چھت دیاں ٹائلاں اُتے وی نقش ونگار بݨئے ہوئے ہن ، نیلے رنگ دیاں سِلھاں اُتے اللہ تے محمد لکھیا ہویا ہے ، اے سلھاں مسیت دے اُتے متھے تے لڳیاں ہویاں ہن ، ایں مسیت دے سامݨے چوک کوں چوک مغل آکھیا ویندے ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء