بابا شیر محمد شیرݨ

آپ دا پورا ناں شیر محمد خان ہا تے تخلص شیرݨ کریندے ہن۔ آپ موضع ہزارہ تھانہ کوٹ چھٹہ ڈیرہ غازی خان دے رہݨ والے ہن۔ بابا شیرݨ وݙے خوش اخلاق انسان ہن۔ علاقے وچ زمینداراں تے جاگیرداراں دے ظلم دے خلاف ہمیشہ بابا شیرݨ آواز بلند کریندے ہن۔ او کہیں غریب تے کہیں زمیندار دا ظلم نہ ݙیکھ سہندے ہن۔ بابا شیرݨ ہک دین دار ‘ نیک تے عالم دین ہن۔ انھاں دی ساری شاعری دیہات سدھار ‘ سماجی برائیاں ‘ قومی ترقی دے موضوعات تے ہن۔ او اپݨے آپ کوں قومی شاعری سݙویندے ہن تے انھاں دی شاعری دا سارا رُخ وی اصلاحی انداز دا ہے ۔ آپ 1940ء دے نیڑے تیڑے فوت تھئے۔ انھاں دا ہک مجموعہ کلام ’’اصلاحی نظمیں‘‘ دے ناں نال ملدے۔ نمونہ کلام:

امت پاک نبیؐ صاحب وچ مرضاں پے ڳیاں بھاریاں

کیڑھیاں کیڑھیاں عرض کراں میں ہُݨ بے وت شماراں

اوّل خرچ اخراج ودھیونے کروں اساں سرداریاں

سُم سُم وقت گزار ݙتونیں سب جائیداداں ھاریاں

آپ زمیندار کوں مخاطب کر تے آہدن:

مدہوشی کوں چھوڑ ذرا

کر ہوش بھرا زمیندارا

ساری خلقت تیکوں کھاوے

تیݙی کاشت دے کپڑے پاوے

سید سیٹھ تے خان سڈاوے

توں کیوں سخت نکارا

ݙوں ݙوں ذالاں ڄٹ پرنیجے

گھر وچ بُکھ دا زور ݙسیجے

تیں کنوں یار پناہ منگیجے

زالیں    دا   وݨجارا  

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان