اے اوہو مُلاں ایں

علامہ اقبال آکھیا ہا تے سچ آکھیا ہا ‘ جو دین مُلاں فی سبیل اللہ فساد اَتے پاکستانی مُلاں مُلواݨے تاں فساد پاوݨ تے فساد کراوݨ دے ٹی ٹی اِن ۔ بہانے ہِن وَدّے لبھدے۔ اَڄ کلھ وَل ’’کفر‘‘ دے فتوے لاوݨ اِچ رُجھیے ہوئے ہِن ۔ جیرھے ہک ݙوجھے کوں ݙیکھ نی سَہندے ‘ ہک ٻے دے پِچھوں نماز نی پڑھدے او ہکے فتوے تے کٹھے دستخط کیتی کھڑن۔ ایہے سبھے ہوون یا ہنائیں سبھنائیں دے وَڈ وَݙیرے ہووِن ‘ کݙاہیں ہک صلاح تے ہک مُٹھ نی تھے‘ کتاباں تے پُستکاں بھریاں پِن ‘ ایٻا ‘ او ٻے ‘ کوں کافر ڄاݨدے تے اوٻا اِیٻے کوں کافر ڳݨدے ‘ ہک ݙوجھے دے خلاف ݙتے ہوئے ہنائیں دے اَپݨے فتوے کٹھے چا کرو تاں ہنائیں اِچوں کوئی وی مسلمان کائنی ‘ سبھے کافر اِن۔

آپ اِچ لڑاند ‘ بھڑاند ہوندئیں ہوئیں وی ایہ ہک صلاح تے ہک مُٹھ ہوں ویلھے تھیندن جیرھے ویلھے ہنائیں کوں وَڈھیاں ݙیوݨ تے حلوے ‘سَٹݨ آلے حاکم ہنائیں کوں کٹھا کریندن تے اَپݨی مرضی دے فتوے گھندِن ۔ اَڄ کلھ  ایہو لیکھا ‘ جنرل ضیاء تے اوندی لُونج پَلونج دے پَلوڑ تے ٹُکریلے مُلاں مُلواݨے دا اے ‘ حاکمیں دی چُچھ تے بچھ تے جھلیندے نی پے ‘ مذہبی معاملیں آلاوزیر ہک مولانا ہے‘ ایں ڳالھوں او سبھے دے اڳوّں اِیں‘ سرکاری ریڈیو اَتے ٹی وی انہائیں دے فتوے ݙینھ رات لوکیں کوں سُݨاوݨ اِچ لڳے پِن ‘ اخباریں دے وَرقے ہنائیں دے دِلیں آنگے کالے تھے پِن ‘ایں بارے قومی اسمبلی دے اجلاس اِچ مَولوی ستار نیازی نال جیرھی تھئی اے او گھٹ نی تھئی ‘پر جیئیں اَکھیندن جو عزت آوݨی ونڄݨی شئے ہے بندے کوں دریٹھ ہووݨا چاہیدا اے ‘ انگریزی اخبار ڈان دی ہک رپورٹ موجب اپوزیشن دی لیڈر بی بی بے نظیر بھٹو دے خلاف کفر دا فتویٰ ݙیوݨ ‘ ٻنہائیں مولوی کنوں جاری کراوݨ تے ریڈیو ‘ ٹی وی دے ذریعے کھنڈاوݨ پُنڈاوݨ تے اپوزیشن دے ممبر ݙاڈھے کاوڑیے ہوئے ہَن ‘ چودھری اعتزاز احسن آکھیا ’’بی بی بے نظیر بھٹو رڑھ رَہکی کرݨ آلے رَہکیں ‘ پورھیہ کرݨ آلے پورھیتیں اَتے بے واہے غریب لوکیں دے حق حقوق دی ڳالھ کریندی اے ‘ ہِیں ڳالھوں کافر اے؟ مارشل لاء ہٹاوݨ کیتے تَݨ وُݨ تے بھڄ دُھرک کریندی رَ ہ ڳی اے ‘ ہِیں ڳالھوں کافر اے؟ او لُٹ پُھر کرݨ آلے لُٹیریں کوں نی منیندی ہِیں ڳالھوں کافر اے؟ او مُلاں مُلواݨیں دیں ہتھی گھاڑویں مسئلیں کوں نی منیندی ‘ ہِیں ڳالھوں کافر اے؟۔‘‘

سید افتخار حسین گیلانی آکھیا ’’پاکستان دے مُلاں مُلواݨے ‘ عیسائیں دے پوپ ‘ اَتے پادریں آنگے اُچا مرتبہ تے خدائی اختیار گھنݨ کیتے حکومت تے حاکمیں دے جھولی چُک بݨیے کھڑن ‘ پر اساں ہنائیں کوں ’’پوپ ‘‘ بݨݨ ݙیسوں تے نہ ’’پادری ‘‘ اَتے نہ وَت پاکستان کوں ’’ویٹی کن‘‘(عیسائیں دی مذہبی ریاست) بݨاوَݨ دی موکل ݙیسوں ۔ ݙاݨ دی رپورٹ موجب اسمبلی اِچ 25مارچ 1953ء دی اخبار سول اینڈ ملٹری گزٹ لہور اِچ چھپی ہوئی ہک خبر دی فوٹو سٹیٹ وی ونڈی ڳئی اے ‘ ایہ اوں خبر دی فوٹو سٹیٹ ہئی جیندے اِچ مولانا ستار نیازی دیاں وݙیاں تصویراں وی چھپیاں ہَن ‘ ہک ݙاڑھی نال تے ٻی بغیر ݙاڑھی مُچھیں دے ‘ اُتے سُرخی ہئی ایہ او مُلاں ایں جیرھا جان بچاوݨ دی خاطر ݙاڑھی مُچھاں مُنا ‘ صفا چَٹ کرا تے وزیر خان آلی مسیت اِچوں نَس تے بھڄ ڳیا ہا تے پولیس اونکوں قصور اِچوں ونڄ پکڑیا ہا ۔

ہُݨ ایہ اسلام دا وݙا ’’راکھا‘‘ بݨیا کھڑے ۔ ‘‘

سید خورشید شاہ ایم این اے آکھیا ’’میں آلِ رسول آں ‘ مَیں فتویٰ ݙینداں جو ایہو مُلاّں جیرھا ٻنہیں کوں فتوے لا تے ’’کافر‘‘ آکھدا کھڑے آپ کافر اے ‘ کافر اے ‘ مسلمان کائنی ’’یہودیں دا ایجنٹ اے۔‘‘

آݙتوار23؍اگست1992ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان