ایہ ٻال کیندا ہے؟
ایہ پتل آلا لوٹا کوئی تیݙے پیئو دا ہے؟ نہ پیسے ݙیندی ہیں نہ لوٹا ویچݨ ݙیندی ہیں‘ میݙی جند نکلدی پئی ہے ‘ توں لوٹے کوں چمبے ماری پئی ہیں‘ میں وی اَڄ لوٹا یا پیسے نہ گھدے تاں اپݨے پیئو دا نمی۔مینے (نشئی) اپݨی ذال جنو کوں آکھیا
وے اللہ دا بندہ کجھ تاں سوچ پہلے میݙے ڳہݨے ویچ وَٹا کھا ڳئیں ‘ وَل گھر دیاں سِتراں کوݙی دے مُل ویچ وَٹائنی تے ہُݨ ایہ وضو کرݨ آلا لوٹا ویچݨ تے آ ڳئیں۔ ہائے اللہ سئیں آں میکوں تاں موت چا ݙے ایجھیں جیوݨ کنوں جان چھٹ ونڄے ۔ جنو رووݨ ہاکی تھی کے آکھیا
میں ٻیا کجھ نہیں ڄاݨدا میکوں ایہ لوٹا ݙے چا‘ تے یا وَل چُپ کرکے 100روپے ݙے چا ۔ مینے آکھیا
میݙے کول کائنی سو روپے ہوون تاں میں تیکوں ݙیواں ۔ جنو آکھیا
کیوں کائنی تیݙے کول کیوں کائنی‘ کاوڑ کنوں اوندا پارا چڑھ ڳیا ۔ میں اَڄ تیݙے کولوں لوٹا یا سو روپے گھن کے رہساں ۔ اَکھیں لال کرکے مینے آکھیا
وے اللہ ہدایت ݙیوی کتھوں اَئے میݙے کول جو میں تیکوں سو روپے ݙیواں۔ جنو ݙکھاری تھی کے آکھیا
چل توں اپݨی صندوق دیاں کنجیاں میکوں ݙے ۔ مینے ذرا اڳوں تے تھی کے آکھیا
کنجیاں میݙے کولوں ڳل ڳئین ۔جنو روندیں ہوئیں آکھیا۔
اچھا ! کنجیاں تیݙے کولوں ڳل ڳئین؟جے تائیں مینے اوندی ڳت کنوں نپ کے زمین تے بھنوا سٹیا تے اُتوں لتیں مُکھیں دی بارش کر ݙتس۔ اِنوں ٻال ٻچے ݙیکھ کے رووݨ پٹݨ لڳ پئے ‘ دھاڑ پٹ دی آواز سُݨ کے نال دے ہمسائے آ ڳئے تے اُنہاں جنو کوں چھڑوا گھدا۔
اَڄ کنوں تقریباً16-15سال پہلے مینے دی جنو نال شادی تھئی ہئی‘ مینا ہک پرائیویٹ کمپنی اِچ ملازمت کرینداہا‘ اوں ویلے مینا ٹھیک ٹھاک سیاݨا سوڈھا تے صحت مند سوہݨاں ڳبھرو ہا‘ خوش حال ہسدے وسدے پئے ہن‘ کݙاہیں جھیڑے دی ڳالھ تک نہ تھئی ہئی۔ پتہ نہیں انہاں دے ہسدے وسدے گھر کوں کیندی نظر لڳ ڳئی جو مینا نشے دی بُری عادت اِچ مبتلا تھی ڳیا تے ہر قسم دا نشہ کرݨ لڳ پیا۔
نشے دی وجہ توں ہُݨ اوہ کمپنی اِچ اپݨے فرائض وی صحیح طور تے انجام نہ ݙیندا پیا ہا تہوں کمپنی اوکوں نوکری توں ہٹا ݙتا ۔ اِنوں نشے دی لعنت تے اُنوں بے روزگاری مینے کوں برباد کرکے رکھ ݙتا ۔ کیوں جواوندی صحت ٻہوں کمزور تھی ڳئی ہئی تہوں ہُݨ اوہ کوئی کم کار نہ کرسڳدا ہا۔ ٻس وَل ہولے ہولے ذال دے گہݨے ڳٹھے تے گھر دیاں سِتراںویچ وَٹا کے کھاوݨ لڳ پیا۔ جنو شودی عورت ذات کیا کر سڳدی ہئی‘ اوندیں اَکھیں دے سامݨے گھر اُڄڑدا ریہا تے اوہ بے وَس تے مجبور تھی کے ݙہدی رہی ‘ اَنت ایہ جو گھر وچ بُکھ ننگائی دی نوبت آ ڳئی ۔ گھر دا امن سکون برباد تھی ڳیا ‘ مایوسی تے بے چینی پورے گھر تے قبضہ کر ڳئی ‘ ہُݨ جݙاں گھر وچ کوئی شئے باقی نہ ہئی تاں وَل جنو نال روز دا جھیڑا جھگڑا تے مار کٹائی شروع تھی ڳئی۔
پیئو ماء دی لڑائی جھگڑا تے شرتکرار ݙیکھ کے اُنہاندے ٻال ݙاڈھے اُداس ‘ پریشان تے وِسمے وِسمے رہندے ہَن۔ ہُݨ مینے دا رنگ کالا سیاہ ‘ زبان اِچ چچرا پن تے جسم سُک سڑ کے کُرنگا تھی ڳیا ہا ۔ پر اوہ نشے دی ٻاڑ اِچ ہر ویلے بے تاب رہندا ہا لیکن پیسے اوندے ہتھ پلے کہیں پاسوں نہ آندے ہن‘ آخر اوں اپݨے ݙاہ سالہ پُتر اختر کوں سکول اِچوں کڈھ کے ہک ہوٹل تے 30روپے ݙیہاڑی مُکا کے کھڑا ݙتا ‘ اوہ سارا ݙینہہ ہوٹل تے تھاں بھانڈے دھوندا ہا ۔ اوندے کپڑے ہفتہ ہفتہ میل کچیلے چاکیاں وانگ ودے رہندے ہن ۔ ݙینہہ کوں ہوٹل مالک دیاں جھنڑکاں تے رات کوں نشئی پیئو دے ڳالھیں مندے تے سختی سہندا ہا۔
اوئے اختری آ ڳئیں؟
جیا اَبّا سئیں!
پیسے کتھن میکوں ݙے!
اَبّا سئیں پیسے اَڄ مالک نہیں ݙتے‘ اَہدا ہا کل ݙیساں
اوئے نامرادا تہوں ماء دے گوݙے نال ونڄ ٻیٹھیں‘ میں اِتھاں مردا پیاں توں پیسے گھن کے نہیں آیا ‘ ونڄ اوندے کولوں پیسے گھن آ۔
اَبّا سئیں اوہ میکوں مریسی میں نہیں ویندا۔
اوئے ونڄ اوکوں میݙا ونڄ آکھ پیسے ݙیوے۔ مینے کاوڑ نال آکھیا
تے توں آپ لڳا ونڄ ٻال تے حکم ٻیٹھا چلیندیں اُتھاں اوہ پیسے نہیں ݙیندا اِتھاں توں قہر تے ݙتی ٻیٹھیں۔اِنوں اوندی ذال جنو آکھیا
اوئے جنّی دی ٻچی توں چُپ کر ٻہہ ‘ ایندا کوئی مرڳیا ہا اوندے کولوں پیسے گھن کے نہیں آیا۔
ابّا سئیں روز تاں گھن کے آنداں جے اَڄ اوں نہیں ݙتے تاں ایندے وچ میݙا کیا قصور ہے‘ کیا میں اوندے کولوں کھس کے گھن آواں ہا؟ اختر ݙکھارا تھی کے آکھیا
اوئے حرام زادہ ہُݨ تیکوں سامݨے اَلاوݨ دا ݙا وی آندا ویندے ۔ جے تائیں مینے اوکوں ݙو ترائے جَڑ ݙتیاں۔
اِنوں جنو اوکوں چھڑاوݨ اَئی تاں ہک ݙو اوں وی جھل گھدیاں۔
اَٹھ ݙینہہ بعد اختر دا ریڈیو توں انٹرویو نشر تھیندا پیا ہا‘ ذرا ملاحظہ تھیوے۔
پُتر تیݙا ناں کیا ہے؟
اختر!
تیݙے پیئو دا ناں؟
مینا!
تیݙی عمر کتنی ہے؟
ݙاہ سال!
تیݙی اماں زندہ ہے؟
جیا!
اوندا ناں کیا ہے؟
جنو!
تیݙے ٻئے بھیݨیں بھرا وی ہِن؟
جیا!
کتنے؟
ݙو بھیݨیں تے ہک بھرا!
تیݙے کولوں وݙے ہن یا چھوٹے؟
چھوٹے ہِن۔
اُنہاندے ناں کیا کیا ہِن؟
میݙے کولوں چھوٹی بھیݨ دا ناں ہے بختاں اوندے کولوں چھوٹی بھیݨ ہے وسّو تے وسو کنوں چھوٹے بھرا دا ناں ہے اصغر۔
تیݙا گھر کتھاں ہے؟
ملتان !
ملتان کیڑھی جاتے؟
14نمبر چونگی !
کوئی مکان نمبر یا ڳلی نمبر ہے؟
جیا ! مکان نمبر18ڳلی نمبر6ہے۔
اُتھاں توں کیا کریندا ہاویں؟
ہوٹل تے کم کریندا ہم!
کیا سکول پڑھݨ نہ ویندا ہاویں؟
پڑھݨ ویندا ہم ‘ پنجویں جماعت پڑھدا ہم جو میݙے ابّے میکوں سکول اِچوں کڈھ کے ہک ہوٹل تے کھڑا ݙتا ہا!
توں دلچسپی نال نہ پڑھدا ہوسیں تاں تہوں تیݙے اَبّے تیکوں سکول اِچوں کڈھ کے ہوٹل تے کھڑا ݙتا ہوسی؟
میں وݙے شوق نال پڑھدا ہم بلکہ ہر سال اپݨی کلاس اِچوں اوّل آندا ہم۔
تیݙا اَبّا کیاکریندے؟
کوئی کم نہیں کریندا!
کوئی کم نہیں کریندا کیا مطلب؟
اوہ نشہ کریندے!
اوہو (افسوس) تیݙا اَبّا نشہ کریندے؟
جیا!
تے توں ہوٹل تے کم کرݨ کیوں چھوڑ ݙتا؟
میکوں اَبّے ماریا ہا۔
اَبّے تیکوں کیوں ماریا ہا؟
آہدا ہا ہوٹل مالک کنوں پیسے کیوں نہیں گھن آیا۔
کیا ہوٹل مالک تیکوں پیسے ݙتے ہن؟
کائنا!
تے وَل تیکوں تیݙے اَبّے کیوں ماریا ہا؟
پتہ نہیں!
تیݙا کوئی قصور ہوسی ؟
میݙا کوئی قصور کائنا ہا‘ نال اوں مے … مے… میݙی امّاں کوں وی ماریا ہا! اختر روندیں ہوئیں آکھیا۔
اوہ کت واسطے؟
اوہ میکوں چھڑاوݨ اَئی ہئی!
پتر رو نہ سدھی ڳال ݙس تیں ہوٹل مالک کنوں پیسے گھن کے کݙاہیں خرچ کیتے ہوسن یا کوئی ٻیا نقصان کیتا ہوسیا؟
میں کوئی نقصان نہیں کیتا تے نہ اِی کوئی پیسے خرچ کیتے ہَن ‘ اَبّا میکوں روز اینویں دڑکے ݙیندا ہا‘ تے نال میݙی امّاں کوں وی مندے ڳالھیں کڈھدا تے مریندا ہا!
اِتھاں کراچی کوئی تیݙا رشتے دار ہے؟
نہیں!
تے وَل توں اتھاں کیویں آئیں؟
ٻس میں گھروں تنگ تھی کے نکلیاں تے آ کے ریل گݙی تے ٻہہ ڳیاں ‘ میکوں ایہ پتہ کائنا ہا جو گݙی کتھاں ویسی‘ نندر اُکھڑی تاں گݙی کراچی پُڄ ڳئی ہئی۔ پچھے ٹی ٹی صاحب میکوں پکڑ کے پولیس دے حوالے کیتا تے وَل پولیس میکوں ایدھی سنٹر گھن اَئی۔
اچھا ہُݨ توں اپݨے گھر ونڄݨ چہندیں ؟ جی … جی … جیا! پر ابّا میکوں مریسی۔
نہ پُتر نہ ہُݨ تیݙا اَبّا تیکوں نہ مریسی!
او… او… اوہ وݙا ظالم ہے میکوں ولا مریسی ۔ ایہ اہدیں ہوئیں اختر پھس کے رووݨ لڳ پیا۔
……
حوالہ
[لکھو | ماخذ وچ تبدیلی کرو]کتاب: پکھی واس (سرائیکی افسانے) فیض بلوچ ، چھاپہ خانہ ، جھوک پبلشرز، ملتان