ایڈولف وون بائر
ایڈولف وون بائر
[لکھو | ماخذ وچ تبدیلی کرو]یوہان فریڈرش ولہیم ایڈولف وون بائر (31 اکتوبر 1835 – 20 اگست 1917) ہک جرمن کیمیا دان ہا جئیں انڈیگو تیار کیتا ہا تے چکری مرکبات دے ناں رکھݨ دا طریقہ تیار کیتا ہا (جیکوں بعد اچ ودھایا ڳیا تے آئی یو پی اے سی آرگینک ناں رکھݨ دے حصے دے طور تے اپنایا ڳیا) ۔ اینکوں 1885 اچ کنگڈم آف باویریا اچ نواب بݨایا ڳیا ہا تے 1905 اچ اینکوں کیمسٹری دا نوبل انعام ملیا ہا۔
خاندان تے تعلیم
[لکھو | ماخذ وچ تبدیلی کرو]بائر برلن اچ پیدا تھیا ہا ۔ ایندا پیو ہک مشہور جیوڈیسٹ تے رائل پرشین آرمی دا کپتان ہا ۔ ایندے ماء پیو ڈوہائیں لوتھرن ہن تے ایندی پرورش وی لوتھرن مذہب اچ تھئی ہئی ۔ ایندی ماء جولیس ایڈورڈ ہٹزگ دی دھی ہئی تے اصل اچ یہودی اٹزگ خاندان دی ہئی جئیں ایندے پیو نال شادی توں پہلے عیسائیت قبول کر گھدی ہئی ۔ بائر دیاں چار بھیݨیں تے ݙو بھرا ہن ۔ ایندی ماء اینکوں نکی عمر اچ ای چھوڑ ڳئی ہئی جݙݨ او ایندی بھیݨ ایڈیلیڈ کوں جنم ڈیندی پئی ہئی۔
بھانویں جو ایندا ڄماندرو ناں یوہان فریڈرش ولہیم ایڈولف بائر ہا ، پر اینکوں ساری زندگی ایڈولف دے ناں نال سڈیا ویندا ہا ۔ شاعر ایڈلبرٹ وون چیمیسو تے ماہر فلکیات فریڈرش ولہیم بیسل ایندے گاڈ پیرنٹس ہن ۔ ایندی 50ویں سالگرہ تے اینکوں کنگ لوڈوگ II آف باویریا موروثی نواب بݨایا ہا۔
بائر کوں سائنس اچ شروع توں دلچسپی ہئی تے او نکے ہوندے ای اپݨے ݙاݙے دے فارم تے پودیاں دی غذائیت تے تجربے کریندا ہا ۔ برلن اچ اینویں نوں سال دی عمر اچ کیمیائی تجربے شروع کر ڈتے ہن ۔ ترائے سال بعد انہاں ہک نواں کیمیائی مرکب تیار کیتا - تانبے تے سوڈیم دا ڈبل کاربونیٹ ۔ اپݨی 13ویں سالگرہ تے انہاں انڈیگو دا ہک ٹکڑا خرید کیتا ہا تے ایندے تے رنگ دے تجربے شروع کیتے ہن۔
سکول اچ ایندے کیمسٹری دے استاد اینکوں اپݨا اسسٹنٹ مقرر کیتا ہا ۔ 1853 اچ سیکنڈری سکول توں فارغ تھیوݨ توں بعد انہاں برلن یونیورسٹی اچ فزکس تے ریاضی پڑھݨ شروع کیتا ۔ پرشین فوج اچ کجھ عرصہ کم کرݨ توں بعد 1856 اچ او ہائیڈلبرگ یونیورسٹی واپس آیا تے رابرٹ بنسن دے کول کیمسٹری پڑھݨ لڳا ۔ بنسن نال بحث توں بعد اوں اگست کیکولے کوں اپݨا استاد بݨایا ۔ 1858 اچ ڈاکٹریٹ مکمل کرݨ توں بعد وی او کیکولے نال کم کریندا رہیا۔
تعلیمی سوبھاں
[لکھو | ماخذ وچ تبدیلی کرو]ڈاکٹریٹ مکمل کرݨ توں بعد او کیکولے دے نال گینٹ یونیورسٹی ڳیا جݙݨ کیکولے اتھاں پروفیسر بݨیا ۔ 1860 اچ او گیویربے انسٹی ٹیوٹ برلن اچ لیکچرر بݨیا تے 1871 اچ سٹراسبرگ یونیورسٹی اچ پروفیسر بݨیا ۔ 1875 اچ او جسٹس وون لیبیگ دی جاہ تے میونخ یونیورسٹی اچ کیمسٹری دا پروفیسر بݨیا۔
بائر دیاں وݙیاں کامیابیاں اچ انڈیگو دی تیاری ، فتھلین رنگاں دی دریافت تے پولی ایسیٹیلینز ، اوکسونیئم نمکیات ، نائٹروسو مرکبات تے یورک ایسڈ ڈیریویٹوز دی تحقیق شامل ہن ۔ او پہلا بندہ ہا جئیں 1869 اچ انڈول دا درست فارمولا پیش کیتا ہا ۔ ایندیاں نظریاتی کیمسٹری اچ ݙاتاں اچ ٹرپل بانڈز دی 'سٹرین' تھیوری تے نکے کاربن رنگاں اچ سٹرین تھیوری شامل ہن۔
1871 اچ انہاں فینولفتھلین دی تیاری دریافت کیتی ۔ ایں سال انہاں مصنوعی فلوروسین وی حاصل کیتا ۔ 1872 اچ انہاں فینول تے فارملڈیہائڈ نال تجربے کیتے ۔ 1881 اچ رائل سوسائٹی آف لندن اینکوں انڈیگو تے کم کرݨ تے ڈیوی میڈل نال نوازیا ۔ 1905 اچ اینکوں نامیاتی کیمسٹری تے کیمیائی صنعت اچ خدمات تے نوبل انعام ملیا۔
آدر ماݨ
[لکھو | ماخذ وچ تبدیلی کرو]1881: رائل سوسائٹی دا ڈیوی میڈل
1884: امریکن اکیڈمی آف آرٹس اینڈ سائنسز دا فیلو
1885: کنگڈم آف باویریا اچ موروثی نواب بݨنا
1905: کیمسٹری دا نوبل انعام
1910: امریکن فلاسوفیکل سوسائٹی دا ممبر
ایڈولف وون بائر میڈل 1911 توں ہر سال ݙتا ویندا ہے ۔
ایندا ناں مختلف "ناں رد عمل" اچ وی شامل ہے جیویں جو بائر-ولگر آکسیڈیشن تے بائر دا ری ایجنٹ۔
گھروڳی زندگی
[لکھو | ماخذ وچ تبدیلی کرو]1868 اچ بائر ایڈیلیڈ بینڈیمن نال شادی کیتی تے انہاں دے ترائے ٻال ہن۔
او 20 اگست 1917 کوں 81 سال دی عمر اچ سٹارنبرگ اچ فوت تھیا۔