ایٹم ATOM

ایٹم دا لوظ سب توں پہلے یونان دے دانشوریں استعمال کیتا ہا۔ ایندا مطلب ہے "ناقابل تقسیم" ۔ یونان دے فلسفی ڈیمو قراطیس[DEMOCRITUS] نے سب توں پہلے اے نظریہ ݙتا جو عام مادہ چھوٹے چھوٹے ذرات نال مل تے بنڑدے جیکوں ایٹم آکھیا ویندے۔

1803 اچ برطانیہ دے کیمسٹ جان ڈالٹن [JOHN DALTON] نے اے نظریہ ݙتا جو ہر مادہ چھوٹے چھوٹے ذرات نال مل تے بنڑدے تے کہیں ہک شئے دے ذرے ہکو سویں ہوندن۔ کیمیائی عمل ایٹمیں دی ترتیب اچ تبدیلی دی وجہ کنوں تھیندے۔

1911 اچ برطانوی ماہر فزکس ارنسٹ ردر فورڈ[ERNEST RUTHERFORD] نے اے نظریہ ݙتا جو ایٹم دے درمیان ہک کمیت رکھݨ ولا چھوٹا ذرہ موجود اے جیندے اُتے مثبت چارج پاتا ویندے۔ اوندے ارد گرد الیکٹران تیزی نال گردش کریندن۔

1915 اچ ڈنمارک دے ماہر فزکس نیل بوہر [NIELS BOHR]نے اے نظریہ ݙتا جو ایٹم دے ٻاہروں الیکٹران مختلف رستئیں تے گردش کریندن۔ بوہر نے الیکٹران دے ایں رستے کوں انرجی لیول دا ناں ݙتا۔  

ایٹم عام مادے دا چھوٹے کنوں چھوٹا ذرہ اے جیندے وچ ہوں مادے دیاں ساریاں کیمیائی خصوصیات موجود ہوندین۔ ایٹم دے مزید ترے بنیادی ذرات ہوندن۔ کُلی طور تے ایندے اتے کوئی چارج نئیں ہوندا۔

1۔الیکٹران[ELECTRON]

ایں ذرے تے منفی چارج ہوندے۔ اے ایٹم دے مرکز دے ٻاہروں تیزی نال گُھمدے۔ اے ٻہوں ہلکا  تے ہَولا ذرہ اے۔

2۔پروٹان[PROTON]

اے ذرہ ایٹم دے مرکز اچ پاتا ویندے۔ پروٹان اچ ݙو اَپ تے ہک ڈاؤن کوارک پاتا ویندے۔ ایندے اتے مثبت چارج ہوندے۔کوارکس بنیادی ذرات کنوں وی چھوٹے ذرے ہن۔

3۔نیوٹران[NEOTRON]

اے ذرہ ایٹم دے مرکز اچ پاتا ویندے۔ نیوٹران اچ ݙو ڈاؤن تے ہک اَپ کوارک پاتا ویندے۔ ایندے اتے کوئی چارج نئی ہوندا۔

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان