ایمان قریشی

ایمان قریشی (پیدائش: 20 جولائی 1997ء) ہک پاکستانی ٹینس کھلاڑی ہِن جنّھاں کوں پاکستان دی کم عمر ترین ٹینس کھلاڑی ہووݨ دا اعزاز وی حاصل ہِے۔

پس منظر

قریشی 20 مئی 1997ء کوں لاہور وِچ عمیر تے مینا قریشی دے ہاں پیدا تھئیں ہَن۔ ایمان قریشی لاہور گرامر اسکول دی سابقہ طالب علم ہِن تے اسکول دی پڑھائی دے دوران ہی انّھاں نے ٹینس دے مقابلیں وِچ حصہ گِھنݨا شروع کر ݙِتّا تے کئی مقابلے جِت کے اسکول دے نال نال ملک دا ناں وی روشن کِیتا، اوہ کھیل دے نال نال پڑھائی وِچ وی ٻہت چنگی ہَن تے اعلیٰ گریڈ دے نال امتحانات پاس کِیتے۔

کَم کار آلی حیاتی

اوہ نے 10 سال دی عمر وِچ ٹینس کھیڈݨا شروع کِیتا۔ اِیں باصلاحیت ٹینس اسٹار نے 14 ٹورنامنٹ دے تحت ایشیا وِچ تریجھی پوزیشن حاصل کِیتی۔ اِیں کامیابی دے علاوہ، 11 سال دی عمر وِچ، اوہ نے قومی خواتین کپ وِچ پہلا انعام حاصل کِیتا۔ 2008ء وِچ ایمان قریشی نیشنل گورنرز کپ جِتن والی کم عمر ترین کھلاڑی ہَن جیڑھی اِیں مقابلے وِچ حصہ گِھن رہیاں ہَن۔ ایمان قریشی نے نیشنل انڈر 14 چیمپئن شپ جِتی تے نیشنل انڈر 18 چیمپئن شپ وِچ ݙوجھے نمبر تے رہیاں۔ ایمان قریشی نے 2010ء وِچ شام دے دارالحکومت دمشق وِچ منعقدہ اے ٹی ایف چیمپیئن شپ وی جِت گِھدّی ہئی۔ ایمان قریشی نے 2013ء وِچ قازقستان وِچ تے 2015ء وِچ ہندوستانی ٹورنامنٹ وِچ انٹرنیشنل فیڈ کپ وِچ پاکستان دی نمائندگی کِیتی۔ اوہ پاکستان وِچ انڈر 18 دیاں خواتین ٹینس کھلاڑیاں وِچ ݙوجھے نمبر تے ہَن۔ ایمان قریشی اوہ واحد پاکستانی ٹینس کھلاڑی ہَن جنّھاں کوں آل ایشیا ایشین ٹینس فیڈریشن (اے ٹی ایف) چیمپئن شپ وِچ 17ویں نمبر تے رکھیا ڳیا ہئی، ایمان قریشی دے علاوہ 2020ء تئیں اِیہ اعزاز کہیں ٻئی پاکستانی خاتون ٹینس کھلاڑی کوں حاصل نہیں تھی سڳیا۔ اپݨی عمدہ کارکردگی دی وجہ نال اوہ شام دے شہر حلب وِچ اے ٹی ایف ڈبلز چیمپیئن شپ وِچ تریجھی پوزیشن تے رہیاں۔ ایمان قریشی دی درجہ بندی وِچ وادھا کر کے تریجھے درجے وِچ کر ݙِتا ڳیا۔ حلب وِچ سارہ منصور تے اشنا سہیل دے نال مِل کے، ایمان قریشی نے ملائشیا دے شہر کوچنگ وِچ منعقدہ WJT/جونیئر فیڈ کپ 2013ء وِچ بھرپور حصہ گِھدّا۔ 2014ء وِچ ایمان قریشی نے چوتھے سید تجمل عباس میموریل نیشنل رینکنگ ٹینس چیمپئن شپ وِچ ردا خالد کوں ہرا کے جِت گِھدّی۔ پاکستان ٹینس فیڈریشن نے پنج ݙین٘ہ تک ٹرائلز منعقد کرݨ دے بعد، گوواہاٹی، ہندوستان وِچ 6 فروری 2016ء وِچ تھیوݨ والی جنوبی ایشین گیمز کِیتے مرد تے خواتین ٹینس ٹیماں کوں حتمی شکل ݙیوݨ دے بعد خواتین ٹینس کھلاڑیاں دا اعلان کِیتا ڳیا، انّھاں وِچ ایمان قریشی وی جاہ بݨاوݨ وِچ کامیاب رہی۔

ٻئے شُغل

ٹینس دے علاوہ، قریشی ہک چنگی تیراک ہِن تے انّھاں نے متعدد تیراکی دے مقابلیں وِچ کامیابی وی حاصل کِیتی ہِے۔ اوہ اپݨی صحت تے چستی برقرار رکھݨ کِیتے باسکٹ بال کھیڈݨ پسند کریندیاں ہِن تاکہ چاق تے چوبند تے تندرست تے توانا رہ سڳن۔ تیراکی، باسکٹ بال دے علاوہ اوہ گالف، فٹ بال وی کھیڈین٘دیاں ہَن، ٹینس کھیڈݨ دا آغاز انّھاں نے ٻئے کھیلاں دے مقابلے وِچ ڈیر نال کِیتا۔ 8 سال دی عمر وِچ کوچ بابر دی نگرانی وِچ مین گلبرگ ٹینس کلب وِچ ٹینس کھیڈݨا شروع کِیتا تے ایں کھیل وِچ ناں پیدا کِیتا۔