اکیرا سوزوکی
اکیرا سوزوکی
[لکھو | ماخذ وچ تبدیلی کرو]اکیرا سوزوکی (ڄمݨ 12 ستمبر 1930) ہک جاپانی کیمیاء دان تے نوبل انعام یافتہ سائنسدان (2010) ہن ، جنہاں پہلی وار سوزوکی ری ایکشن شائع کیتا ، جیڑھا ایرل یا ونائل بورونک ایسڈ دا ایرل یا ونائل ہیلائڈ نال پیلیڈیم (0) کمپلیکس ولوں کٹیلائزڈ نامیاتی رد عمل ہے ۔
ابتدائی زندگی تے تعلیم
[لکھو | ماخذ وچ تبدیلی کرو]سوزوکی 12 ستمبر 1930 کوں موکاوا ، ہوکائیڈو اچ پیدا تھیا ہا ، جݙاں او ہائی سکول اچ ہا تاں انہاں دے پیو فوت تھی ڳئے ہن ۔ انہاں ہوکائیڈو یونیورسٹی (ہوکودائی) اچ کیمسٹری دی تعلیم حاصل کیتی تے پی ایچ ڈی حاصل کرݨ دے بعد اتھائیں بطور اسسٹنٹ پروفیسر کم کریندے ریہے ۔ او شروع اچ ریاضی پڑھݨ چاہندا ہا ، کیوں جو انہاں دا ٻلپݨ دا پسندیدہ مضمون ریاضی ہا ۔ ݙو کتاباں نال ملاقات ہائی جیڑھی نامیاتی سرت سلھاڑ دے رستے تے اڳوں ودھݨ دا موقع بݨیاں ، ہک ہارورڈ یونیورسٹی دے لوئس فیئزر ولوں لکھی ڳئی ٹیکسٹ بک آف آرگینک کیمسٹری ہئی ، تے ݙوجھی پرڈیو یونیورسٹی دے ہربرٹ براؤن ولوں لکھی ڳئی ہائیڈرو بوریشن ہئی ۔
سائنسی پرکھ پرچول
[لکھو | ماخذ وچ تبدیلی کرو]1963 توں 1965 تک ، سوزوکی پرڈیو یونیورسٹی اچ ہربرٹ سی براؤن نال پوسٹ ڈاکٹریٹ طالب علم دے طور تے کم کیتا تے ہوکودائی واپس آوݨ دے بعد او اتھائیں فل پروفیسر بݨ ڳیا ۔ پوسٹ ڈاکٹریٹ تجربہ انہاں دے معاون نوریو میاورا نال کپلنگ ری ایکشن دے مطالعے اچ استعمال تھیا تے سوزوکی ری ایکشن دی دریافت دا باعث بݨا جیڑھا 1979 اچ اعلان کیتا ڳیا ۔ ایندے نامیاتی بورونک ایسڈز ایرل تے ونائل گروپ دے نال پاݨی تے ہوا اچ مستحکم ہوندن ، سنبھالݨ اچ آسان ہوندن ، تے کیوں جو استعمال کیتے ونڄݨ والیاں شرائط وی نسبتاً نرم ہوندن ، ٻہوں سارے کراس کپلنگ تکنیکاں اچ وی اینکوں استعمال کرݨ آسان سمجھیا ویندا ہے ۔
ہوکودائی توں 1994 اچ ریٹائرمنٹ دے بعد انہاں ٻیگراں یونیورسٹیاں اچ کئی عہدے سنبھالے 1994–1995 اوکایاما یونیورسٹی آف سائنس تے 1995–2002 کوراشکی یونیورسٹی آف سائنس اینڈ دی آرٹس ۔ ایندے علاوہ ، او پرڈیو یونیورسٹی (2001) ، اکیڈمک سینیکا تے نیشنل تائیوان یونیورسٹی (2002) اچ مدعو پروفیسر وی ہا ۔
2010 اچ ، سوزوکی کوں رچرڈ ایف ہیک تے ایچی نیگیشی دے نال مشترکہ طور تے کیمسٹری دا نوبل انعام ݙتا ڳیا ۔
بین الاقوامی سال برائے کیمسٹری (IYC 2011) دا جشن مناوݨ کیتے ، سوزوکی دا یونیسکو کوریئر میگزین انٹرویو کیتا ، انہاں آکھیا
"اج کجھ لوک کیمسٹری کوں صرف ہک آلودگی پھیلݨ والی صنعت دے طور تے ݙیکھدن ، پر ایہ ہک غلطی اے ... ایندے بغیر ، پیداوری گھٹ تھی ویندی تے اساں او زندگی نی گزار سڳدے جیڑھی اڄ اساں ڄاݨدے ہیں ۔ جے کوئی آلودگی ہے ، تاں ایہ ایں واسطے اے کہ اساں نقصان دہ مادے جاری کریندے پئے ہیں ۔ ظاہر ہے ، اساکوں علاج تے انتظام دے طریقیاں کوں اپݨاوݨا ہوسی تے اینجھے کیمیائی مادے تے تیاری دے عمل تیار کرݨ کیتے کم کرݨ ہوسی جیڑھے ماحول دا احترام کرݨ ۔ "
2014 اچ ، ہک کینیڈین-چینی طالب علم سوزوکی توں صلاح ڳولی "میں تواݙے وانگوں ہک وݙا کیمیاء دان کیویں بݨ سڳداں؟" ، سوزوکی جواب ݙتا "... سب توں اڳوں ، تہاکوں ظاہری شکل توں ݙیکھݨ تے جوہر کوں سمجھݨا سکݨا چاہیدا ہے ۔ "
بغیر پیٹنٹ دے ایجاد
[لکھو | ماخذ وچ تبدیلی کرو]سوزوکی سوزوکی ری ایکشن ٹیکنالوجی تے پیٹنٹ حاصل نی کیتا کیوں جو انہاں دا خیال اے کہ تحقیق کوں سرکاری فنڈز دی حمایت حاصل ہائی ، ایں واسطے کپلنگ ٹیکنالوجی وݙے پیمانے تے پھیل ڳئی ہے ، تے ایں ٹیکنالوجی دا استعمال کرݨ والیاں ٻہوں ساریاں مصنوعات عملی طور تے استعمال اچ آ ڳئیاں ہن ۔ اڄ تک ، سوزوکی ری ایکشن نال متعلق 6,000 توں ودھ پیپرز تے پیٹنٹ موجود ہن ۔
سنڄاݨ
[لکھو | ماخذ وچ تبدیلی کرو]ایسٹروئڈ 87312 اکیرا سوزوکی دا ناں پروفیسر سوزوکی دے ناں تے رکھیا ڳیا ہا ۔
1986 – ویسبرگر-ولیمز لیکچر شپ ایوارڈ
1987 – کوریائی کیمیکل سوسائٹی ایوارڈ
1989 – کیمیکل سوسائٹی آف جاپان ایوارڈ
1995 – ڈاؤ ایلنکو لیکچر شپ ایوارڈ
2000 – دی ایچ سی براؤن لیکچر ایوارڈ
2003 – جاپان اکیڈمی انعام
2009 – پال کارر گولڈ میڈل
2009 – رائل سوسائٹی آف کیمسٹری (RSC) دا خصوصی ممبر
2010 – کیمسٹری دا نوبل انعام
2010 – آرڈر آف کلچر
2010 – ثقافتی لیاقت دا شخص
2011 – جاپان اکیڈمی دا ممبر
2011 – جمہوریہ کانگو ولوں جاری کردہ ہک ڈاک ٹکٹ تے اعزاز
2016 – آنریری چیئر پروفیسرشپ ، نیشنل چینگ کنگ یونیورسٹی