اکھ

محمد اسلم میتلا

اکھ انسانی جسم دا خوبصورت حصہ اے۔ موقع خوشی دا ہووے یا غمی دا اکھ میدانِ عمل وچ موجود رہندی اے۔ خوشی دے موقعے تے اکھیں وچ چمک تے غمی دے موقعے تے اکھیں وچ ہنجوں نظردن۔ انسانی اعضا دی ٹیم وچ ایندا کردار سینٹر فاروڑ دا کردارا ٓکھیا ونڄ سڳدے۔ کیوں جو کوئی عمل ہووے اوندے کرݨ واسطے باقی اعضاء اپݨے کم کر تے باقی کم ایندے واسطے چھوڑ ݙیندن تے اے موقع محل دے مطابق اپݨی حکمت عملی ترتیب ݙیندی اے۔ اپݨے وجود دے اعتبار نال اے ٻہوںنازک احصہ اے تے ایں طرح ایندیاں نزاکتاں دی تندیر وی گھٹ طویل نی۔ ساریاں جذبیاں دا اظہار اکھیں دے راہیں کیتا ونڄ سڳدے۔ جے اکھ اچی تھیوے تاں دعا، جھکی تھی ونڄے تاں حیا، ترچھی تھیوے تاں ادا ڄے پھر ونڄے تاں قضا بݨ ویندی اے۔ دل کوں اکثر شکایت رہندی اے جو قصور اکھ دا ہوندے تے بھوڳنا اوکوں پئے ویندے تے ایں شکایت دا اکھ تاں آپ قی بیرقرار ہوندی اے۔ ایہو جئی صورت حال وچ کہیں سچ آکھئے جݙاں لڳدی اے اکھ تݙاں لڳدی نی اکھ توڑے سکھ ہووے لکھ۔ اکھ آل رائونڈر وی ہے جیویں جو اکھ دے اشارے نال حکم صادر تھی ویندن۔ حالانکہ اے کم زبان دا ہے جو ٻول کے حکم ݙیوے یا ہتھ دا ہے جو لکھ کے حکم ݙیوے۔ بعضے حالات وچ اکھ دے اشارے والے حکم دی تعمیل زیادہ تیزی تے تندہی نال تھیندی اے کیوں جو اوں اشارے دے وچ ادا تے رعب دا عنصر شامل ہوندے۔ اکھ دی زبان وی ہوندی اے، کن وی۔ او اینج جو اکھیں پیغام ݙیوݨ دا حسین ذریعہ تے پیغام وصول کرݨ دا وی تے ایں عمل دا کیا ناں ہے اے تحقیق طلب مسئلہ ہے۔

ویلے دی اکھ او اکھ اے جئیں احف تائیں پپلی وی نئی جھمکائی تے وݙے توں وݙیاں ڳالھیں اینکوں متاثر نی کر سڳیاں۔ حکمران در بدر تھئے تاں انہاں دے حالات تاریخ دی اکھ تے محفوظ کیتے تے اکھیں رکھݨ والیاں کیویں موقع توں فائدہ چایا اے ، سبھ کجھ تاریخ دی اکھ دے محیط وچ شامل اے۔ ویلھے دی اکھ تے تاریخ دی اکھ وچ فرق ہے کیوں جو ویلھے دی اکھ ہر ویلھے تے ہر زمانے واسطے روشنی دا مستقل مینار ہوندی اے، جدید دور وچ کیمرے دی اکھ دے کمالات ساݙی حیرت واسطے گھٹ نئیں۔ جتھاں ایندے فوائد ہن اتھاں نقصان وی ہن۔ فائدہ ایں طرح جو میدان وچ ٻہہ کے میچ ݙیکھو ہک واری تے ڈرائنگ روم وچ ٹیلی ویژن دی راہیں بار بار Replay توں لطف اندوز تھیوݨ دا موقع ملدے۔ نقصان اینج جو انسانی غلطی جیکوں سہو آکھݨا زیاہد مناسب ہوسی جے ایمپائر کولوں تھی ونڄے تاں کیمرے دی اکھ اوندے پچھوں پئے ویندی اے تے کیمرے دی اکھ صحافی دے قلم دی اکھ وچ اکھ ملا کے ایمپائر غریب دی اکھ کوں ݙینھ دے تارے ݙکھا ݙیندی اے۔ اے وی کیمرے دی اکھ دے کمالات ہن جو کݙاہیں جنہاں ہاکی یا بلا نی پکڑیا ہوندا او موضوع (ہاکی، کرکٹ) تے اینج تبصرہ کریندے نظردن جو معلوم تھیندے جو انہاں صاحبان باقاعدہ مکتب وچ داخل تھی کے کھیل دی تعلیم گھدی ہوئی اے۔ جانبداری تے تعصب دی اکھ دلچسپ واقعات سامݨے گھن آندی اے۔ کئی صاحبان اپݨے سیاسی موقف دی تائید وچ دلیل تے ثبو تدے طور تے انہاں لوکاں دی ڳالھ یا ریکارڈ کوں سند دے طور تے پیش کریندن جنہاں دے مخالف ہووݨ دا او دعویٰ وی رکھدن۔ ایں سلسلے وچ انہاں دیاں قابل افسوس معلومات دا ذریعہ وی اکھ دا علاج ہوندے۔ اتھوں اکھ دے علاج دے بہانے ٹر ڳئے تیٻئے ملکاں وچوں اپنقے سیاسی نظریہ دی تائید وچ مواد نال اکھیاں ٹھڈیاں ونڄ کریندن ۔ ہو سڳدے جو انہاں دی اکھ دا علاج ہی اے ہووے جو او حقائق کوں غیر جانبدارانہ اکھ نال ݙیکھݨ پر اے ڳالھ انہاں دی اکھ تے ہی نی پوندی۔

ٻال ساݙیاں اکھیں دا نور ہوندن انہاں دی تربیت تے اکھ رکھݨ بنیادی فرض اے۔ اے کہیں آکھے ’’اولاد کوں کھوائو سونید ا نوالہ تے ݙیکھو شیر دی اکھ نال ‘‘ نا تاں ٻال وڳڑ ویسن تے زمانے دی بھیڑی اکھ انہاں کوں خراب کر ݙیسی تے جیڑھے ویلھے او ایجھے کم شروع کر ݙیسن جیڑھے زمانے دی اکھ وچ چنڳے نہ ہوسن تاں والدین دی اکھ پٹیسی تے اوں ویلھے سوائے اکھیں تے ہتھ رکھ کے رووݨ دے ٻیا کوئی راہ نہ رہ ویسی۔ کیوںجو اولاد اوں ویلھے اولاد کوں اکھیں ݙکھاوݨ توں وی نی چکدی تے ایں طرح اکھ وچ لحاظ ناں وی کہیں شے دا وجود نی رہ ویندا۔

اکھ تے عینک دا وݙا گہرا تعلق اے تے ول عینکاں دے وی مختلف رنگ تے مختلف استعمال ہوندن۔ کالی عینک دا او لوک استعمال کریندن جیڑھے اپݨے آپ کوں مافوق الفطرت سمجھدن تے عام بندے نال اکھیں چار کرݨ توں کتراندن بلکہ توہین سمجھدن۔ اساں عینک دا ݙوڑا استعمال وی ݙتھے ساݙے ہک ماسٹر صاحب اپݨے نک دی چنج تے رکھدے ہن تے انہاں دیاں اکھیں صاف نظردیان ہن۔ تے عینک تلے رہ ویندی ہئی تے جے پڑھاوݨ کھڑن ہا تاں پپلیاں تلے چا کریندے ہن تے نظر کتاب تے پوندی ہئی تے ایں طرح ساری جماعت کوں اے تعین کرݨ وچ وݙی مشکل پیش آندی ہئی جو ماسٹر صاب دی نظر جماعت تے ہے یا کتاب تے ہے۔

حوالہ

کتاب: کرینہہ دے پُھل، مصنف: نصیر شاہ ، جھوک پبلشرز ملتان