اکبر جسکانی

اکبر جسکانی پاکستان نال تعلق رکھݨ آلے سندھی زبان دے ممتاز افسانہ نگار، ناول نگار، شاعر تے صحافی ہن۔ انہاں دے ناول تے افسانے دیاں کئی کتاباں شائع تھئین۔ سندھی ادبی بورڈ، جامشورو، سندھ دی طرفوں شائع تھیوݨ آلے ٻالیں دے کیتے جریدے "گل پھل" دے آخری دم تک ایڈیٹر رہے۔

حالات حیاتی

اکبر جسکانی یکم ستمبر 1958ء کوں سندھ دے ضلع دادو دے شہر جوہی وچ ڄمیے ۔ انہاں دے پیو دا ناں جام خان جسکانی ہئی۔ انہاں دے پیو روزی روٹی دے کیتے سعودی عرب ڳئے تے اتھائیں انتقال کر ڳئے تے اکبر بچپݨ وچ یتیم تھی ڳئے۔ انہاں دے نانا نے انہاں دی پرورش کیتی۔ انہاں دے نانا جوہی شہر دی سرکاری عمارتیں تے دفتریں دے فانوس (چراغ) روشن کرݨ دی نوکری کریندے ہن۔ تھوڑے عرصے دے بعد انہاں دے نانا دا وی انتقال تھی ڳیا تاں انہاں دی نانی نے انہاں دی پرورش کیتی۔ انہاں دی نانی نے فانوس روشن کرݨ دی نوکری سنبھال ڳھدی۔ انہاں دی نانی شام کوں لالٹین، فانوس روشن کرݨ دے کیتے تیل تے کاٹھی دی سیڑھی ڳھن کے نکلدی ہئی تاں اکبر انہاں دے نال ہوندا ہئی۔ اکبر دی نانی دے انتقال توں انہاں دی حیاتی تے ٻہوں وݙا اثر پیا مگر اکبر دی ماء انہاں دا سہارا بݨی۔ اکبر جسکانی نے 1968ء وچ گورنمنٹ مین پرائمری سکول جوہی توں پرائمری دا امتحان پاس کیتا۔ 1973ء وچ میٹرک گورنمنٹ ہائی سکول جوہی توں کیتا۔ انٹرمیڈیٹ 1975ء تے بی اے 1977ء وچ گورنمنٹ ڈگری کالج دادو توں کیتا۔ 1979ء وچ اوہ سندھی ادبی بورڈ جامشورو وچ لائبریرین مقرر تھئے۔ 1983ء وچ ٻالیں دے کیتے سندھی ادبی بورڈ دے جریدے "گل پھل" دے اسسٹنٹ ایڈیٹر مقرر تھئے۔ 1986ء وچ سندھی ادب وچ سندھ یونیورسٹی توں ایم اے کیتا تے 1987ء وچ "گل پھل" دے ایڈیٹر مقرر تھئے۔ اکبر جسکانی نے بچپݨ توں لکھݨ شروع کیتا۔ انہاں دے افسانے تے ٻالیں دے کیتے کہانیاں کئی میگزین تے جریدیاں وچ شائع تھئین۔ اکبر جسکانی نے شاعری وی کیتی مگر انہاں دا نمایاں ادبی کارنامہ سندھی ٻولی وچ ٻالیں دے ادب کوں فروغ ݙیوݨ تے ٻالیں دے کیتے لکھݨ ہے۔ ٻالیں دے کیتے لکھیا ہویا انہاں دا ایوارڈ یافتہ ناولٹ "بتین واری نانی" ٻہوں اہمیت دا حامل ہے۔ علاوہ ازیں ٻالیں دے کیتے انہاں دے افسانے دیاں کتاباں "رموں پیٹی" تے "خیرو حجم" نے ٻہوں مقبولیت حاصل کیتی۔ اکبر جسکانی اخباراں دے ایڈیٹر وی رہے۔

وفات

اکبر جسکانی 13 اگست 1999ء کوں حیدرآباد وچ وفات کر ڳئے۔ جوہی شہر وچ انہاں دی یاد وچ 2000ء کوں اکبر جسکانی میموریل لائبرری قائم کیتی ڳئی ہے جیہڑی نوجوانیں دے کیتے علمی استفادے دا مرکز ہے۔