اٹک خورد ریلوے ٹیشݨ

اٹک خورد ریلوے ٹیشݨ پاکستان دے صوبہ پنجاب دے ضلع اٹک وچ ہے۔ ایہہ ملک دے کجھ خوبصورت ریل ٹیشݨیں وچوں ہک ہے۔ پنجاب توں خیبر پختونخواہ ویندے ہوئیں ایہہ آخری تے پنجاب وچ داخل تھیندے ویلے پہلا ریلوے ٹیشݨ ہے۔ برطانوی دور وچ بݨایا ڳیا تاریخی آہنی پل جینکوں اٹک پل آکھیا ویندا اے ایندے نال جوڑیا ڳیا ہے۔

تاریخ:

پاکستان دے صوبہ پنجاب دے آخری سرحدی ضلع اٹک دے قصبہ اٹک خورد تے خیبر پختونخواہ دے ضلع نوشہرہ دے قصبہ خیرآباد کنڈ دے وچالے دریائے سندھ تے سلطنت برطانیہ دا بݨایا ہویا ہک شاہکار آہنی پل جیندا خاکہ سر گلفورڈ لنڈسے مولسورتھ (1925-1828) نے تیار کیتا تے جینکوں 1880ء وچ ہک برطانوی جہازراں تے انجینئری کمپنی ویسٹ وڈ بائیلی نے بݨایا ہا۔ اوں ویلے ایندے تے 32 لکھ روپے توں ودھ دی لاڳت آئی۔ 24 مئی 1883ء کوں اینکوں عام استعمال کیتے کھول ݙتا ڳیا۔ 1926ء توں 1929ء دے وچالے 25 لکھ روپے دی لاگت نال اینکوں مزید بہتر کیتا ڳیا ایں وار ایندے تے سر فرانسس نے کم کیتا۔ ایہہ پل اپݨی تعمیر دے لحاظ نال خطے وچ منفرد حیثیت رکھدا ہے، ایندے ݙو حصے ہن اتوں آلے حصے توں ریل ڳاݙی تے تلے آلے حصے توں موٹر گاݙیاں گزردیاں ہن۔ ایندے ݙوہیں پاسے مضبوط گیٹ لڳیے ہوئے ہن جیڑھے کݙاہیں رات کوں بند کر ݙتے ویندے ہن تے سویر نال کھولے ویندے ہن۔ ہک زمانے تک ایہہ پل جرنیلی سڑک (جی ٹی روڈ) دا حصہ ریہا جیڑھا 1979ء وچ ہک نویں پل دی تعمیر دے نال اٹک خورد توں براہ راست خیرآباد دی طرف نکل ڳئی۔ ایں توں پہلے ایہہ اکبر دے قلعہ اٹک بنارس دے نال گھومدی اکبر ہی دے وسائے قصبے ملاحی ٹولہ توں گزردی پراݨے پل دی طرف ویندی ہئی۔

عوام وچ اینکوں اٹک دا پراݨا پل آکھیا ویندا ہے۔ ہک سو تریھ سال توں ودھ گزر ونڄݨ دے باوجود ایہہ پل اوں طرحاں ریل ڳاݙی تے موٹراں کوں دریا پار کرویندا پیا ہے جیویں کل ہی بݨیا ہووے تے اڄ دے حکمراناں تے انجینئراں کوں دعوت فکر ݙیندا پئے۔