اِسماعیل فیض ہادیؔ

محمد اِسماعیل فیض ہادیؔ تونسوی سرائیکی شاعر ہے

کتاباں

• عقیدت

نمونہ کلام

حمد

ہر باغ دے پھُل وِچ تیݙی بو سبحان اللہ سبحان اللہ

تیݙا ذکر جہان تے ہے ہر سو سبحان اللہ سبحان اللہ

تیݙے حُکم تے ݙینہہ کوں سِجھ بلدے ، تیݙے حکم تے مولا ݙینہہ ڈھلدے

تخلیق تیݙی شب دے جگنو سبحان اللہ سبحان اللہ

تیݙا ذکر چِڑی دی چوں چوں وِچ ، تیݙا ذکر ہوا دی شوں شوں وِچ

تیݙی حمد ہے ڳیریاں دی گھو گھو سبحان اللہ سبحان اللہ

ساکوں پیارا لڳدے نام تیݙا ، ساݙے کیتے ہے اِنعام تیݙا

ہر زخم دا مرہم مولا تو سبحان اللہ سبحان اللہ

تیݙی ہستی اعلیٰ ہستی ہے ، تیݙا وجد ہے تیݙی مستی ہے

ہر لب تے راہندے اللہ ھو سبحان اللہ سبحان اللہ

تیݙی ذاکر ہے مخلوق تیݙی ، تو مالک اے مملوک تیݙی

نِت کوئل کوکے کو کو کو سبحان اللہ سبحان اللہ

کوئی رَکھدا مُکھ نورانی ہے ، کوئی حسن اِچ یوسف ثانی ہے

والیل وانگوں کہیں دے گیسو سبحان اللہ سبحان اللہ

تیݙی ذات کوں منیا واحد ہے ، تیݙی ذات دا قرآں شاہد ہے

ہے مشرک جیڑھا آہدے ݙو سبحان اللہ سبحان اللہ

ہِن واہندے وڳدے واہ تیݙے ، ہن ہادیؔ بُت وِچ ساہ تیݙے

تیݙی شان دے ہن کئی کئی پہلو سبحان اللہ سبحان اللہ

شاعر#

محمد اِسماعیل فیض ہادیؔ تونسوی