اُٹھ اَلیسے تاں ڄال دِی بُوں کڈھیسے

اَپݨی سرائیکی ٻولی دا ہک پہاکا ہِے ’’اُٹھ اَلیسے تاں ڄال دِی بُوں کڈھیسے‘‘ ایہ ہوں ویلھے اَکھیندن جیرھے ویلھے کوئی داہیات بندہ مونہہ اِچوں بُتھی ڳال یا ’’گڑشول‘‘ کڈھ مریندے۔ اَڄ کل جیݙے کیݙے اُٹھ ’’ٻڑکدِے وَدِن تِے ہر پاسوں ڄال دی بُوں اَمدی اے ۔ ایجھیاں ایجھیاں ڳالھیں سُݨدوں تے پڑھدوں جنہیں کوں سُݨ اَتے پڑھ تے روح ٻدلݨ پئے ویندے اَتے ’’چھنڈ‘‘ آوݨ پئے ویندی اے ۔ اَہدن جو بندے دا مونہہ چنگاں نہ ہووے تاں ڳالھ تاں چنڳیں کرے ۔ پراللہ میݙا معاف کرے ۔ اسیݙے پاسے تاں ایہ حال تھی ڳے جو جنہیں کوں اللہ سئیں سوہݨاں تے چنگاں مونہہ متھا ݙتے اوہے وِی ’’چٻیں ٻوتھیں‘‘ آلیں نال رَل تے چڑاٻیاں وَدے کھڑکیندن اَتے ’’وَا‘‘ وَدِے پُݨدِن۔

پچھلے ݙیہاڑیں’’لہور‘‘ دی شاہی مسیت دے اِمام ’’فتویٰ‘‘ ݙتا ہا جو جیڑھے لوک پیپلز پارٹی کوں ’’ووٹ‘‘ ݙیسن او کافر اِن تے دوزخ اِچ ویسن ہِیں ’’وݙی بَلا مُلاں‘‘ شہید ذوالفقار علی بھٹو دی حکومت دے زمانے اِچ ہک ہزار مُلاں مُلواݨے کٹھے کر تے اُنہیں کنوں حکومت دے حق اِچ بیان ݙیوائے ہانس … تے نمبر بݨاوݨ دِی خاطر فتویٰ ݙتا ہَس جو جیرھے لوک پاکستان پیپلز پارٹی چھوڑ تے ویسن اَتے اوندی مخالفت کریسن او بہشت اِچ داخل کائناں تھیسن ۔ ایہ تاں کوئی ڳالھ کائنی …… پیٹ دے پچھوں اپݨا ایمان وِیچݨ آلے ایجھے ’’مولویں‘‘ تے ’’مفتیں‘‘ دے فتوے ’’حکومتیں‘‘ بدلݨ نال بدلدے رہندن تے لوک ایجھیں ’’فتویں‘ دی ’’ویلیو‘‘ کنوں وی واقف ہِن ۔ اَتے ڄاݨدِن جو ’’کوڑ‘‘ کوں سچ تے سچ کوں کوڑ‘ آکھݨ آلے اَتے فتوے ویچݨ آلے مُلاں ہر زمانے اِچ رہ ڳن۔ شاہی مسیت دے امام دا ’’فتویٰ‘‘ پڑھ تے ہک ٻیا مُلاں وی نی رہ سڳیا …… اُوں وی فتویٰ جَڑ ݙتے … ایں ’’لوکیں‘‘ کوں تاں معاف کر ݙتے اُنہیں کیتے دوزخ دے دروازے کینیسی کھولئے تے نہ بہشت دے دروازے بند کیتے نِسں۔ پر سبھو کاوڑ بی بی بے نظیر تے کڈھی ہِس ۔ ایہو مُلاں بندوبستی وزیر اعظم سئیں غلام مصطفی خان جتوئی دا ’’مشیر مذہبی امور‘‘ ہِے … اُوں نمبر بݨاوݨ کیتے ایہ وی آکھیئے جو جیرھے لوک پاکستانی فوجئیں کوں سعودی عرب بھیڄݨ اَتے امریکی ‘ فرانسیسی ‘ برطانوی فوجئیں دے اِتھاں آوݨ دی مخالفت کریندے پِن او غلطی تے ہِن کیوں جو امریکہ ‘ برطانیہ ‘ فرانس اَتے ٻنہائیں ملکیں دے فوجی ’’عیسائی‘‘ اَتے ’’یہودی‘‘ ہِن ۔ عیسائی تے یہودی ’’اہل کتاب‘‘ ہِن ۔ ایں واسطے کہیں کوں کئی اعتراض نی کرݨا چہیدا ۔ ہُݨ ہِیں ’’سرکاری درٻاری‘‘ فتوے فروش مُلاں کنوں پُچھے جو ’’مقاماتِ مقدسہ‘‘ دی حفاظت کیتے یہودی تے عیسائی فوجیں دا آوݨ درست اے تاں وَل ’’مسجد اقصیٰ‘‘  تے یہودیں دے قبضے تے کہیں دھاڑ دھاڑ اے؟۔ تُسیݙے آکھݨ مُوجب ’’اہل کتاب‘ مقامات مقدسہ‘‘ دی حفاظت کر سڳدِن ۔ کیا امریکہ ‘ برطانیہ تے فرانس دے یہودی ‘ عیسائی ’’اہل کتاب‘‘ نیں۔؟ اسرائیل آلے ’’یہودی‘‘ اہل کتاب کائنی۔؟ … مر جو ڳیا مُراد شاہ نتاں تُساں جئیں کوں ’’کنڈیریں‘‘ دے ڳاہ ڳواہوے ہا……

جمۃ المبارک 19؍ اکتوبر1990ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان