اُستاد فتح خاں
ہک واری اسیݙی وستی آ تے بس خراب تھی ڳی ، ڈرائیور کلینڈر بݨیندے رہ ڳے ، ابے سئیں عملے کوں پاݨی پلایا ، روٹی دا پُچھیا ، ریڈیو چلدا پیا ہا ، ڈرائیور بس چھوڑ تے جھمر کھیݙݨ پئے ڳیا ۔ اساکوں ݙاڈھا چنگا لڳا ، ابے ناں پُچھیا ، اوں ݙسیا میݙا ناں فتح محمد اعوان تھینداں تے میݙا گھر فتح جنگ میانوالی ہے ۔ اَمدیں ویندیں او اسیݙی وستی سواریاں لہاوے ، اساں بھڄ تے اونکوں سلام کروں تے ہتھ ملائوں ، نکے ہاسے قد نہ پُڄدا ہا او اپݨی ڈلیور سیٹ توں جھک تے ملدا ہا ، کھلدا ݙاڈھا سوہݨاہا، وݙا قد تے وݙیاں مُچھاں ہانس ۔ اساں بس دا انتظار کریندے ہاسے ، ہک واری بس پنبائی اَمدا ہا ، شئیت لیٹ تھی ڳیا ہا ، اساں بھڄ تے اڳوں آڳیوسے ، اوں اساکوں بچا گھدا تے بس تلے ہلوڑ ءِچ لہہ ڳی ۔ بندے بچ ڳے ، ابے اساݙی آتھر چھنڈ کیتی پر اوں کوئی ڳالھ نہ کیتی تے دُعا سلام وی نہ چھوڑی۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان