اُستاد توکل حسین خان

موسیقی دے بے تاج بادشاہ اُستاد توکل حسین خان دا سرائیکی وسیب دے وچ ٻہوں وݙا ناں ہے۔اُستاد توکل حسین خان جالندھر توں پاکستان آئے تے سرائیکی وسیب دے وچ رہائش اختیار کیتی تے اُنہاں کوں سرائیکی وسیب ایجھا بھاݨاں جو اتھائیں دے تھی تے رہ ڳے۔ اُستاد توکل حسین خان کوں جالندھر ،امرتسر، لاہور ، ملتان، بہاولپور تے ٻے علاقیں د ے وݙ سݙیا ویندا ہئی جݙاں اُنہاں دا ناں آوے ہا تاں لوکیں دا ٹھٹھ اُنہاں کوں سُݨݨ واسطے پُڄ ویندا ہئی۔ 1940ء دے وچ آل انڈیا ریڈیواَتے ملتان توں اُنہاں دی آواز گونجدی رہ ڳی۔اُستاد توکل حسین خان کوں اللہ سئیں فن دے نال نال آواز دا ٻہوں وݙا ملکا عطاء کیتا ہئی۔خواجہ فریدؒ دے عرس تے اکثر ویندے ہن تے اُتھاں کافیاں دی چوݨ آپ کریندے ہن۔اُستاد توکل حسین خان دے بعد ول کہیں ٻے دی مجال نہ ہوندی ہئی جو اتھاں پر مار سڳے۔اُستاد توکل حسین خان دیرہ غازی خان دی وستی سندیلہ وچ دفن ہن ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء