اَک

اَک دا ٻُوٹا

اَمباں دے بُھلاوے...ݙیواں اَکاں کُوں کلاوے .. مَتا ں بو اَمباں دی آوے ...

پاکستان دے ریتلے علاقے (روہی، تھل، تھر، دمان) دے ٹِٻاں تے وݨاں دی مُنڈھاں وِچ آپوں آپ ہک بُوٹا ڄم پوندے، ڄیکوں اَک دا ٻُوٹا آکھیا ویندے۔

اَک ہنالے دا ٻُوٹا ھ جیندے پترے، ݙوݙے تے پُھل شدید ہُنالے وِچ ساوے تھی ویندن تے سیالے دے موسم اچ پروتھے تھی ویندن۔

اَک دے ݙوݙے ݙسن اِچ اَمباں وانگوں لگدن، لیکن اے ٻہوں کوڑا زہر ٻُوٹا ھ۔اِیندے پتراں تے ݙنڈھیاں کوں تروڑا ون٘ڄے تاں وچوں گوند وانگوں گھاٹا مادہ نکلدے جیکوں سناسی تے حکیم کئی قسم دی جسمانی بماریاں دے علاج کیتے ہِک پہک سمجھیندن۔ اگر کیں بندے کوں صفراء(پِتے، معدے دی گرمی)، پیلا یرقان ہووے تاں حکیم اَک ٻُوٹے دے ݙنڈھیاں دی مالا بݨا کے مریض دے گل وچ پویندن۔ڄیکوں ہتھاں پیراں دی جلن تے خارش ہووے تاں اَک دے پترے پیراں تلے ٻدھے ویندن تے ایندے پترے جسم دا ساڑھ چوس گھندن۔

دمان، تھل دے کِراڑ(ہندو) لوک اَک دے ٻُوٹے دی افادیت دی وجہ کول ایکوں متبرک سمجھیندے ہین تے گھراں وِچ نیاز بو(تُلسی) دے ٻُوٹے وانگوں اَک ٻُوٹے دی ڄڑ کُوں پٹ کے آپݨے گھر وِچ رکھیندے ہین تے سمجھا ویندا ہئی کہ ایں ٻُوٹےدی ڄڑ ڄیہڑے وی گھر وچ ہوسی اُتھاں سکون، شانتی آسی تے مصیبت تنگ دستی ختم تھی ویسی ...

عباس سیال