اَپݨے مریندن تاں چھاں تے سَٹیندن

پَرائے پُتریں کنوں ’’کُھتی ٹَھپوا‘‘ تے جتوئی ہوریں روح وِندلاوݨ کیتے ’’امریکہ‘‘ روانہ تھی ڳے ۔ امریکہ روانہ تھیوݨ کنوں پہلے ہک ’’اخباری ڳالھ مہاڑ‘‘ اِچ پنجابی کوں وزیر اعظم بݨاوݨ کیتے ’’مہم چلاوݨ آلیں کوں وݙے گِلے اُلہامے ݙتونے ۔ وَل اخباریں اِچ ’’خبر‘‘ چھپی جو آپ ’’خیر نال‘‘ پچھی تے ۔ پاکستان کینھاں وَلسِن اَتے ۔ مستقل اُتھاہیں رہسِن ۔ کوڑیج کراہیں پَکّے لݙ ڳن۔ پَر اِیہا ’’خبر‘‘ کوڑی نِکتی۔ رُٹھے رُٹھے کیئیں مَنائے ۔ چُپ کرو جو آپے اَئے ۔ ہِیں لیکھے آپ اِی آپے وَل آئے ۔ وَل تاں آئے پرچُپ چُپاتے کوئی کؤ کِڑوا نہ تھی ۔ چَھو ماری رَہ ڳے ۔ قومی اسمبلی تے صوبائی اسمبلیں دیں خالی سیٹیں تے الیکشن لڑݨ کیتے امیدواریں اِچ ’’ٹِکٹاں‘‘ ونڈاوݨ داویلھا آیا تاں ’’مارکے‘‘ دا آپت اِچ پِھیٹا پَے ڳیا ۔ جتوئی ہوریں وِی اَپݨا ’’چُپ‘‘ دا روزہ کھولیا ۔ تے ’’بیان بازی‘‘ شروع کیتی اُنہیں آکھیا جو ’’ٹِکٹاں‘‘ مسلم لیگ آلیں آپت اِچ ’’وِلہائن‘‘ جیئیں اَندھے کرن خیرایت تے وَل وَل ݙیون اَپݨے کوں۔

آئی جے آئی نال رَیں ہوئیں جماعتیں کنوں کہیں کائنی پُچھیا ۔ نوابزادہ نصراللہ خان آلی سیٹ بارے ’’چخ ڑخ‘‘ وَدھی تاں جتوئی ہوریں بیان ݙتا جو پہلے الیکشن وِچ وی نواب زادہ نصراللہ خان ‘ خان عبدالولی خان ‘ مولانا فضل الرحمن ‘ پیر پگاڑا تے سیدہ عابدہ حسین کوں ڄاݨ تے ہَرایا ڳیا ہا او ہِیں ڳالھوں جو اسمبلی اِچ ’’انگوٹھے چھاپ ممبریں دی لوڑ ہئی ۔ ہِیں بیان تے ݙاڈھی دھاڑ دھاڑ پی ‘ جتوئی ہوریں اَپݨے بیان دے کئی مطلب ݙسائے پر ڳالھ اُتھاہیں دی اُتھاہیں رہی ۔ ہُݨ لوک ایہ پُچھدِن جو جتوئی صاحب وزیر اعظم ہوندیں ہوئیں نوابزادہ نصراللہ خان دے خلاف تھیوݨ آلی ڳنڈھ تروپ کنوں واقف ہَن پَر اُنہیں دے آکھݨ موجب او بے وَس ہَن اَتے کجھ نہ کر سڳدے ہَن ۔ او ٻنہائیں سیٹیں تے صحیح الیکشن تھیوݨ دا ہوکا کینویں ݙے سڳدن؟جیرھاکُجھ نوابزادہ نصراللہ خان دی سیٹ تے تھیا ہا یا ہُݨ آلے الیکشن اِچ تھئے ۔ اوہو کجھ ٻیں سیٹیں تے کینویں نہ تھیا ہوسے؟۔ جے ہک ’’سیٹ‘‘ تے دھاندلی تھی سڳدی اے تاں ݙوجھیں سیٹیں تے کیویں کائنی تھی سڳدی۔ خاص طور تے اُنہیں سیٹیں تے جتھاں آئی جے آئی دے اَپݨے خاص بَندے کھڑے ہَن یا جِتھاں اُنہیں دے ’’کٹر مخالف‘‘ کھڑے ہَن ۔ کیا کجھ نہ تھیا ہوسے؟ الیکشن اِچ تھیوݨ آلی ’’دھاندلی‘‘ کنوں واقف ہوندیں ہوئیں وِی جتوئی صاحب اونکوں صاف سُتھرا تے صحیح الیکشن کینویں ڳنڑیا تے آکھیا ہا؟ تے وَل بعد اِچ گِندی دے آبھُوں کڈھیے ہِنیں تاں قوم کوں ’’سبھو کجھ‘‘ ݙس کیوں نِہی ݙیندے؟ او کہیں کنوں ݙردے اِن ؟ یا اُنہیں کوں اَڄݨ اِی ایہ اُمید ہے جو پرائے پُتر وَلا وی اُنہیں کوں اَڳوں اَنیسِن؟ پَر ہُݨ تاں پَرائے پُتر جیئیں کیئیں کر تے الٰہی بخش سومرو کوں ’’جِتوا‘‘ تے ’’پارلیمنٹ‘‘ اِچ گھن اَئے ہِن ۔ اَتے ایہ کوئی لُکی چھپی ڳالھ کائنی جو الٰہی بخش سومرو ’’افسر شاہی‘‘ دے خاص الخاص اعتمادی بندے ہِن ۔ او آپ اِی افسر رَہ ڳن ۔ صدر اسحاق دے پُراݨے واقف کار ہِن تے قومی اسمبلی اِچ ٻہوں سارے ’’ممبر‘‘ اُنہیں دے نال 1985ء آلی اسمبلی اِچ ممبر رَہ ڳن ۔ جݙاں او جنرل ضیاء دی حکومت دے ’’وزیر‘‘ وی ہوندے ہَن ۔ ہُݨ جتوئی صاحب کوں ایہ کون یاد ݙیوائے جو اَپݨے مَریندن تاں چھاں تے سٹیندِن ۔ پَرائے مَار تے دُھپ تے سٹیندن‘ جیئیں تُسیکوں ‘ سُکڑیں سٹیا ہینے۔

خمیس17؍جنوری1991ء