اَسیݙے تُسیݙے گوݙیں ڳٹیں اِن

ایہ ہک منی منائی ڳالھ اے جوتقدیر بندے دی سوچ ‘اوندے ذہن اَتے اوندی سُدھ سُرت موجب ہوندی اے ۔ دین دھرم دے مسئلے مسلیت ہوون یا سیاست آلے ڳانڈھے ۔ بندہ کہیں نہ کہیں پاسے ضرور ڳنڈھیل تے جُڑیل ہوندے ۔ ہِیں لیکھے اساں اِچوں ہر بندہ اَپݨے آپ کوں حق تے ڄاݨدے ایہ تاں اے ہنیں لوکیں دی ڳالھ جیرھے کہیں وِی طمیّں لالچ اَتے ݙر بَھو اِچ اتے کائنی سُچیندے ۔ جیرھی ڳالھ تے اُنہیں دا ایمان ہوندے ‘ عقیدہ ہوندے ‘ یقین ہوندے او ہونکوں حق سچ سمجھدن تے اونکوں ہک سُتر ایݙے اوݙے نی کھسِکدے۔ ٻے ہوندن ریڑھو ڳیڑو ‘ ہر دیگی چمچے ‘ ہر تبوت تے یا حسینؓ کرݨ آلے ‘ چڑھدی کنی دے یار ۔ ہوا دی سِدھ تے اُݙݨ آلے ۔ جیرھے چوݨویں داݨے اکثرہ سیاسی جماعتیں وچ لبھدِن ۔ جیرھی جماعت دی حکومت ہووے ہوندے جھنڈے مونڈھے تے رکھی تے زندہ باد دے نعرے وَدے مریندے ہوندِن ۔ ہک لیکھے ایہ پیشہ ور ورکراِن جیرھی حکومت ہووے جیندی حکومت ہووے ہُنیں کوں کوئی فرق نی پمدا ۔ ایہ ہر زمانے اِچ ہر کہیں کنوں اڳوں ہوندن ۔ ایہ لگ زمانے تے ندریعہ ہوندن اَکھیں مَتھے تے رکھݨ تے دَکنی تتر آنگے مُکرݨ دے ٹی ٹی ہوندن۔ انہیں دا ہمیشاں گُڑ اِچ رَنبہ ہوندے ۔ کرسی کوں سلام تے کرسی تے ٻہݨ آلیں دی خشامد ہنیں دا وطیرہ ہوندے ہِیں ڳالھوں سرکار دربار اِچ پہیج تے مَن منیج ہوندی اے ۔ تیݙڑیں تے افسریں کوں تھندیاں ݙے کراہیں اَپݨے پرائے جائز ‘ ناجائز کم کڈھوائی رکھدِن ۔ پلاٹ ‘ پرمٹ ‘ ایجنسیاں ‘ لائسنس ‘ ٹھیکے گھندن۔ ݙویندن تے ݙونہیں ہتھیں نال مال مݙی کٹھا کریندن اَڄ کلھ ایجھے ورکریں دی رات اے ۔ آپ جیہیں کوں کٹھا ودے کریندن۔ سرکاری خرچے ’’انے‘‘ ٹُکر پاݨی تے لہور ویندے پن۔

اخباریں اِچ خبراں چھپݨ جو رلیل قومیں (اقوام متحدہ) دی طرفوں پاکستان دے وزیر اعظم کوں چِٹھی ملی اے جو پاکستان اِچ لتھے ہوئے افغانستان آلے ’’مہاجر‘‘ سݙواوݨ والے پٹھاݨیں کوں پاکستان داشہری من گھدا ونڄے تاں وَل اِمداد وَلا شروع تھی سڳدی اے ۔ افعان مہاجر تے افغان مجاہد سݙواوݨ آلے لوک دین دھرم ‘ مذہب اَتے عقیدے لیکھے بیشک اسیݙے بھرا ہوسِن ۔ پر ہِن تاں ہک ٻے ملک دے شہری ۔ ایہ جݙاں کنڈھ نال ڄنگھاں لاتے اُتھوں بَھنے ہَن تاںاَساں جیہے سِدھے سادے مسلمان حیران تے ویڑے تھی کراہیں سُچیندے ہَن جو ایہ کیجھے ’’مسلمین‘‘ اِن جیرھے ’’شہید‘‘ تھیوݨ یا ’’غازی‘‘ بݨݨ دی جھاہ تے ’’نسوکڑ‘‘ تے بھاڑی بݨ ڳن؟۔ معلوم ایہ تھیا جو اسیݙے اِتھوں دے اسلام دے خادم حاکمیں افغانستان اِچ ’’فساد‘‘ کوں ’’جہاد‘‘ دا ناں ݙتا تے دنیا اِچ ’’اسلام‘‘ تے مسلمانیں دے سبھنیں کنوں وَݙے خادم امریکہ دی طرفوں امداد مِلݨ پئے ڳی ۔ ݙینہ رات جہاد جہاد دا وِرد کرݨ آلے حاکمیں اَتے وݙے وٖݙے ٹِیٹݨ مولویں اِچوں ’’شہادت‘’ دی موت مَرݨ یا ’’غازی‘‘ بݨݨ دی خاطر لڑائی تے کوئی نہ ڳیا ایہ ایجھا ’’جہاد‘‘ یا جو ہک واری خود جہاد افغانستان دے ’’شہید‘‘ سݙواوݨ آلے اِتھوں دے وݙے حاکم آپ آکھیا ہا جو اَساں لوکیں دِی دلالی آلی ڳالھ اَساں جیہے ڳالھے بھولے لوکیں کوں تاں سمجھ اَمدی اے پر ہتھیاریں تے ہیروئن دا ونڑج وپار کرݨ آلیں کوں اَلاہے کیوں چیتے نی پمدی؟

شئیں ڄاݨ تے مچلے بݨدِن ‘ پاکستان اِچ لتھے ہوئے مہاجر تے ’’مجاہد‘’ سݙواوݨ آلے پٹھاݨیں دی ڳنتری تریہہ لکھ کنوں وی اُتے ہے ۔ اُنہیں اِچوں اکثرہ اِتھاہیں پکا ٹِکاݨاں کر ڳن ۔ شناختی کارڈ تے ڈومیسائل بݨوا تے شہری حقوق اَتے جائیداداں گھدی ٻیٹھن ۔ او کݙاں پچھیتی ویندن ۔ اوایئیں ڄاݨ اسیݙیں تُسیݙیں گوݙیں ڳٹیں اِن۔ ایݙے آئی جے آئی آلے حاکم آپ ’’پختونستان‘‘ بݨائی تے وَسائی ٻیٹھن۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان