اَخیر ڳنڈھ کپ داء لاڳیا

جݙݨ دے انڈیا اَئے ہاسے ساکوں ہر پاسوں ݙسایا ڳیا ہا جو ڳنڈھ کپّاں ‘ ٹھگّاں تے چوراں کنوں ہشیار رہوائے ۔ میٹرو دے اندر وَل وَل ایہو اعلان کیتا ویندا ہا ۔ تہوں اَساں سنگتیاں کوں خبردار کیتا ہویا ہا ۔ میں اپݨا کِٹ بیگ نال رکھدا ہم جیندے وچ کاغذ ‘ قلم ‘ چھوٹا موٹا سمان ‘ صافی دا کپڑا ‘ کیمرہ وغیرہ ہوندا ہا ۔ موبائل بند کرکے اٹیچی کیس اِچ رکھیا ہویا ہا کیوں جو ایندے رابطے واہگہ ٹپدیں اِی مُک چُکے ہَن ۔ دِلّی ٹیشن تے گݙی تے چڑھدیں ویلے میں ہک جاء بھیڑ وچ پھس ڳیا ہَم اَتے میݙا کِٹ بیگ ہک ݙو بندیاں دی جھپیڑاِچ آ ڳیا ہا ۔ جیکوں میں زور تے طاقت لا کے آپ کن چھکیّا ہَم۔ میکوں ایہ پتہ نہ ہا جو ایں بیگ اُتّے ہک ڳنڈھ کپ پارٹی حملہ کیتا ہوئے۔ جݙانہ اساں آگرہ لتھوسے تے میں بیگ چاتا تاں ݙٹھّا جو کِٹ بیگ کوں ہک پاسوں بلیڈ لڳا پئے اَتے تقریباً 4انچ جتی بیگ کپیا پئے۔ میݙا تاں چیتا ہوا تھی ڳیا ۔ بیگ کھولیم تاں وچ کیمرہ موجود ہا باقی کئی شئے ایڈی قیمتی نہ ہئی ۔ خیر سمان بچ ونڄݨ تے رب دا شکر ادا کیتا۔ پر ایہ پتہ لڳ ڳیا جو ڳنڈھ کپ اصلی ہن ۔ اِنہاں دا وجود کُئی تلّی واٹویں ڳالھ نھیں۔ ہُݨ میݙا بیگ مشکوک تھی چُکا ہا ۔ ہر بندہ کپّے ہوئے حصے کوں ݙیہدا ہا ۔ میکوں ایں حصّے اُتّے ہتھ رکھ کے ٹُرݨاں پئے ڳیا ۔ اَتے اڳلے ݙینہ اجمیر تئیں تے وَل اجمیرکنوں دِلّی آوݨ تئیں میکوں ایں بیگ دی سنبھال پہلے کنوں ودھ کرݨی پئے ڳئی ۔ اوہو کپیا بیگ ملتان تئیں نال گھن آئیم اَتے ملتان وچوں ایندی مرمت کرائی۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان