اوم پر کاش

او پی آزادؔ بہاولپوری دا اصل ناں اوم پر کاش ہا ، اوہ 11نومبر 1926ء کوں بہاولپور وچ پیدا تھئے۔تقسیم دے بعد ہندوستان چلے ڳئے ،انہاندے ہک شعری مجموعے دا حوالہ وی ملدے جیندا ناں ہے ’’متوازی سائے‘‘ایں مجموعے دا سرِ ورق معروف مصور عبدالرحمٰن چغتائی نے بنْایا ہا۔

او پی آزاد دا سنِ وفات تاں معلوم نہیں تھی سڳیا لیکن اتنا پتہ لڳے جو آپ دا انتقال غازی پور انڈیا وچ تھیا ۔نمونہ کلام پیشِ خدمت ہے۔

(1)غزل

شاہاں دی رفتار نرالی ،میں نئیں آہدا لوکی آہدن

لوکاں دا ہے اللہ والی،میں نئیں آہدا لوکی آہدن

عالم فاضل گیانی قابل کھاندے پِن در در دے دھکے

جاہل کیتے وڄدی تالی،میں نئیں آہدا لوکی آہدن

لُٹئے پُٹئے ٻاجھ سہارے لوکاں دا اے حال ہے جیویں

بیوہ نکے ٻالاں والی،میں نئیں آہدا لوکی آہدن

باغاں دی بربادی کیتے قسمت کوں الزام نہ ڈٖیویں

ٻوٹے پیا پٹیندے مالی،میں نئیں آہدا لوکی آہدن

خوش حالی دے ناں تے ڈٖیکھو ہک ڈٖیوا او روز ٻلیندن

ہر ڈٖیوے دی لاٹ ہے کالی،میں نئیں آہدا لوکی آہدن

ویلا لنگھیا مدتاں تھی ڳن ، ڈٖسدی نئیں پر کوئی تبدیلی

اوہے ہل تے اوہے ہالی،میں نئیں آہدا لوکی آہدن

٭٭٭