اوہو یار کلہوکڑی رات والا

ملتان وچ میکوں ویہہ سال تھی ڳن۔اِنہاں ویہہ سالاں وچ میں سینکڑاں تے ہزاراں ادیباں ‘ شاعراں تے ملتانی سیاستداناں کوںمِل چُکاں۔انہاں وچوں ٻہوں تھولے لوک اِن جیرھے سرائیکی مسئلے کوں سمجھدن یا انہاں کوں اپݨی سرائیکی قومی شناخت دااحساس اے۔ کجھ تا ں اتنے وݙے ہِن جو اُلخیں مُلخیں وچ اِنہاں دا ناں اے پر اندروں پھولو تاں پھوڳ اِن ۔اِنہاں نال سرائیکی وسیب دے حقوق یا سرائیکی صوبے دی ڳالھ کرو تاں آکھدن:’’ چھوڑو سئیں !کُئی ٻئی ڳالھ کرو ‘‘ انہاں دے مقابلے وچ او لوک جہڑے سرائیکی دی ترقی پسند نی کریندے ٻہوں ہوشیار اِن ۔ انہاں حالات وچ اساں جئیں طرح ملتان وچ سرائیکی دا کم کیتے او ہک الڳ داستان اے ‘ پر ہک ڳالھ ٻئی وی ہے او ڳالھ اے جو چالہی لکھ دی آبادی وچوں چند ہک ایجھے لوک وی ہِن جنہاں دا سرائیکی کم کئی سو لیڈراں تے باری اے ۔

آکھیا ویندے انسانی فطرت ماء دے ڈڈھ اِ چ بݨ تے اوندے خون دا حصہ بݨ ویندی اے ‘ ٻلپݨ توں ٻڈھیپے ‘ڄاوݨ توں مرݨ یا ایں آکھوں جو مہد توں لہد تئیں اپݨی عادت یا اپݨی نیچر دے دائرے وچوں ٻاہر نی نکل سڳدا ۔کجھ لوک زبان ہوندے ہوئے زبان کوں جندرے لائی رکھدن تے کجھ ایجھے وی ہوندن جو بھانویں اَلاوݨ تے پابندیاں ہوون وَل وی چُپ نی رہندے ۔ کجھ آزاد ہوندے ہوئے وی قیدیں آلی کار حیاتی گزریندن تے کجھ قید اِچ رہ تے وی آزادی دا نشان ہوندن ۔ اے ساریاں ڳالھیں میکوں رانجھݨ ملتانی توں یاد آئن۔

رانجھݨ ملتانی کروڑاں سرائیکیں دی طرح تخت لہور دا قیدی اے ۔ قیدی وی او جیرھا سرکاری نوکری دے سنگلیں نال ٻدھا رہ ڳے ۔ رانجھݨ قید وچ رہ تے وی چالہی توں زائد سرائیکی دیاں وݙیاں وݙیاں کتاباں لکھ ڳئے تے نال اِی سیاسی ڳالھ وی کریندا رہ ڳے ۔ رانجھݨ ملتانی دیاں سیاسی تحریراں شعور دا سوجھل سجھ دا کم ݙیندیاں رہ ڳن ۔60سال دی سزا پوری تھیوݨ تے رانجھݨ ملتانی نوکری دی قید اِچوں ٻاہر آنوݨ تے تے جو گاواں ویس وَٹائے تاں وَل وسیب کوں پتہ لڳے جو اے تاں شوکت مغل اے ۔ ہک او شخص جیرھا اپݨے کم دے حوالے نال سرائیکی زبان دا ݙاݙا آدم اے ‘ اوندیاں سیاسی تحریراںتے اوندا ویس وٹاندرا تہاکوں کیویں لڳے؟۔ ایند ا فیصلہ تُساں آپ کریسو۔میں اتناآکھساںجو:

اوہو یار کلہوکڑی رات والا

ویس وَٹا تے وَت آیا

نیاز وند  

ظہور دھریجہ

حوالہ

کتاب: گِروان ہووے تاں. دھرتی واس : رانجھݨ ملتانی. چھپیندڑ: جھوک پبلشرز ‘ ملتان