اوون ولنز رچرڈسن
اوون ولنز رچرڈسن
[لکھو | ماخذ وچ تبدیلی کرو]سر اوون ولنز رچرڈسن (26 اپریل 1879 – 15 فروری 1959) ہک برطانوی طبیعات دان ہن جنہاں کوں 1928 وچ تھرمایونک ایمیشن تے کم کرݨ تے طبیعات دا نوبل انعام ملیا، جیندی وجہ توں رچرڈسن دا قانون بݨیا۔
سوانح عمری
[لکھو | ماخذ وچ تبدیلی کرو]رچرڈسن ڈیوزبری، یارکشائر، انگلینڈ وچ جوشوا ہنری تے شارلٹ ماریا رچرڈسن دے گھر پیدا تھئے ہن۔ انہاں دی تعلیم بیٹلی گرامر سکول تے ٹرنٹی کالج، کیمبرج وچ تھئی، جتھاں انہاں نیچرل سائنسز وچ فرسٹ کلاس آنرز حاصل کیتے۔ ول انہاں 1904 وچ یونیورسٹی کالج لندن توں ڈی ایس سی کیتی۔ 1900 وچ گریجویشن کرݨ دے بعد، انہاں کیمبرج دی کیونڈش لیبارٹری وچ گرم جسماں توں بجلی دے اخراج تے تحقیق شروع کیتی، تے اکتوبر 1902 وچ انہاں کوں ٹرنٹی وچ فیلو بݨایا ڳیا۔ 1901 وچ انہاں ݙکھایا جو ہک گرم تار توں کرنٹ تار دے درجہ حرارت تے تیزی نال منحصر ہوندے، جیندی ریاضیاتی شکل آرہینیئس مساوات نال ملدی جلدی ہئی۔ ایہ رچرڈسن دے قانون دے ناں نال مشہور تھیا: "اگر منفی تابکاری دھات توں نکلݨ والے ذرات دی وجہ نال ہے، تاں سیر شدہ کرنٹ s کوں قانون دی پیروی کرݨی چاہیدی ہے s=AT1/2e-b/T۔" رچرڈسن 1906 توں 1913 تک پرنسٹن یونیورسٹی وچ پروفیسر ہن، تے 1914 وچ برطانیہ واپس آ ڳئے تاں جو کنگز کالج لندن وچ وہیٹ اسٹون پروفیسر آف فزکس بݨ سڳن، جتھاں بعد وچ انہاں کوں 1924 وچ ریسرچ دا ڈائریکٹر بݨایا ڳیا۔ 1927 وچ او بیلجیم دے انٹرنیشنل سولوی انسٹی ٹیوٹ فار فزکس وچ تھیوݨ والی فزکس دی پنجویں سولوی کانفرنس دے شرکا وچوں ہک ہن۔ او 1944 وچ کنگز کالج لندن توں ریٹائر تھئے ۔ انہاں فوٹو الیکٹرک اثر، گائرو میگنیٹک اثر، کیمیائی رد عمل نال الیکٹرانز دا اخراج، نرم ایکس رے، تے ہائیڈروجن دے سپیکٹرم تے وی تحقیق کیتی۔ رچرڈسن 1906 وچ اپݨے کیونڈش ساتھی ہیرلڈ ولسن دی بھیݨ لیلیان ولسن نال شادی کیتی، تے انہاں دے ݙو پتر تے ہک دھی ہئی۔ رچرڈسن دیاں ݙو بھیݨاں ہن۔ الزبتھ میری ڈکسن رچرڈسن معروف ریاضی دان اوسوالڈ ویبلن نال شادی کیتی۔ شارلٹ سارا رچرڈسن امریکی طبیعات دان (تے 1937 دے نوبل انعام یافتہ) کلنٹن ڈیویسن نال شادی کیتی، جیڑھے پرنسٹن وچ رچرڈسن دے پی ایچ ڈی دے طالب علم ہن۔ 1945 وچ لیلیان دی موت دے بعد، انہاں 1948 وچ ہنریٹ روپ، ہک طبیعات دان نال دوبارہ شادی کیتی۔ اوون ولنز رچرڈسن دا ہک پتر، ہیرلڈ اوون رچرڈسن ہا، جیڑھا نیوکلیئر فزکس وچ ماہر ہا تے بیڈفورڈ کالج، لندن یونیورسٹی وچ فزکس ڈیپارٹمنٹ دا چیئرمین وی ہا تے بعد وچ لندن یونیورسٹی وچ ایمریٹس پروفیسر بݨیا۔
اعزازات
[لکھو | ماخذ وچ تبدیلی کرو]رچرڈسن کوں 1910 وچ امریکن فلاسوفیکل سوسائٹی دا بین الاقوامی رکن منتخب کیتا ڳیا۔ انہاں 1913 وچ رائل سوسائٹی (ایف آر ایس) دا فیلو منتخب کیتا ڳیا، تے 1920 وچ انہاں کوں ایندا دا ہیوز میڈل ݙتا ڳیا۔ انہاں کوں 1928 وچ طبیعات دا نوبل انعام ݙتا ڳیا، "تھرمایونک رجحان تے خاص طور تے انہاں دے ناں تے رکھے ڳئے قانون دی دریافت تے کم کرݨ تے۔" انہاں کوں 1939 وچ نائٹ ہڈ ݙتا ڳیا۔