اودئے بھانو ہنس

1926ء تا  2019ء

اودئے بھانو ہنس ؔ پروفیسر یو بی ہنسؔ دے ناں نال مشہور ہَن، آپ 2اگست1926ء کوں پنڈت وشوا ناتھ شرما دے گھر دائرہ دین پناہ ضلع مظفر گٖڑھ وچ پیدا تھئے۔آپ سرائیکی توں علاوہ اردو دے بٖہوں وڈٖے شاعر و ادیب ہن۔1966ء وچ انہاں کوں ہریانہ سرکار دی طرفوں راج کوّی ( ملک الشعراء) دا خطاب ڈٖتا گٖیا، انہاندے کلام دی مقبولیت دا اندازہ اِتھوں لایا ونجٖ سگٖدے جو آپ دے دیوان’’ رچنا ولی ‘‘ دے 5ایڈیشن چھپ چکے ہن 2010ء وچ آپ اپنْی جنم بھومی ڈٖیکھنْ واسطے وڈٖی سک نال دائرہ دین پناہ وی آئے ہن ۔انڈیا وچ درجناں طالب علم ہنسؔ جی تے پی ایچ ڈی کر چکے ہِن۔لاجپت نگر(حصار) دے ہک پُل دا ناں وی ہنس جی دی وفات دے بعد انہاں دے ناں نال رکھیا گٖئے۔ہنسؔ جی 26فروری  2019ء کوں حصار( انڈیا ) وچ وفات پا گٖئے۔ نمونہ کلام ملاحظہ تھیوے۔

(1)غزل

او بٖہوں خوش نصیب ہوندے ہن

یار جیندے قریب ہوندے ہن

دل وڈٖا ہے جیندا امیر ہے او

تنگ دل تاں غریب ہوندے ہن

بٖول امرت بھرے تے دل وچ زہر

لوک وی کجھ عجیب ہوندے ہن

زندہ رہندن جیڑھے قیامت تئیں

او تاں شاعر ادیب ہوندے ہن

دل جو ترٹا تاں شاعری نسری

حادثے وی عجیب ہوندے ہن

من دی ہر ہک مراد پوری تھئی

کیندے ایجھیں نصیب ہوندے ہن

زندگی دی سمجھ تڈٖاں آندی

موت دے جد قریب ہوندے ہن