انہیں دے ہتھیں اِی آئو تاں

اُونویں تاں اُتوں لتھے ‘ آئی جے آئی آلے ‘ اسیݙے سبھے حاکم ‘ آلوآل‘‘ ہِن ۔پر جیرھے ’’نمونے‘‘ وزیریں دی وݙی کونسل اِچ کٹھے تھِن او وَت وَدّھ تے ہِن ۔ حکومت اِچ رہ تے حاکم بݨ تے ملک دی تے عوام دی جیرھی خذمت داری تے سیواٹہنوال ایہ کریندے پِن اوجھی کہیں نی کیتی۔انہائیں دی کارگزاریں اَتے ’’کیِتسیں کرتئیں‘‘بارے خود ہنیں دے جُٹ جماعت اسلامی دے لیڈریں دے بیان کٹھے کر گھنیجن تاں کجھ آکھݨ یا پُچھݨ ݙسݨ دی لوڑ نی پمدی‘ مہینہ کَھن گزرئیے ‘ خان عبدالولی خان آلی ’’عوامی نیشنل پارٹی‘‘ تے ’’نواز لیگ‘‘ دے لیڈر تے وزیر مشیر آپت اِچ اُٹک تے آڑوٻٹ تھے ہَن ‘ ہک ٻے دیں وݙ وݙیریں کوں پُݨدیں لُنڑدیں لیکا لنگھ ڳے ہن مُوئیں مُردیں دیاں قبریں پٹیاں ہانے تے خفن دھایاں دھایاں کیتے ہَن پَر چس ہوں ویلھے آئی ہئی جیرھے ویلھے ہک ٻے دی گِندی دے آبھوں کڈھیے ہانے‘ ہُنیں ڄہاڑیں اُنھاں دے بیان پڑھ کراہیں اندازہ تھیندا ہا جو وڈھیاں گھنݨ ‘ رشوتاں کھاوݨ ‘ بے ایمانیاں کرݨ تے سرکاری خزانے کوں لُٹݨ پُھرݨ اِچ ہک ݙوجھے دے آندری ٻاہری ہَن ۔ گھٹ کوئی وی کائنی اَتے نہ وَت کوئی گھٹکی کیتی وَدّے ۔ پر کون پُچھے؟ جیرھے پُچھݨ جوڳے ہِن ہُنیں تاں ہنائیں کوں حکومت ݙتی اے۔ وزیر ‘مشیر بݨائے نتاں ایہ آپ وَت ہِیں جوڳے کݙاں ہَن ۔

خیر سئیں ! جِتی ڄہاڑے قسمت دے ہینے موجاں ماݨن‘ اوڑک ہک ݙینہ ٹِکاݨے تے آوݨاں پوسنے‘ مَنجھ کِلے دے زور کُݙدی اے ‘ پر کھٻڑ جِتی درگھا ہووے اوندے پاند اِچ ڳنڈھ ضرور ہوندی اے تے چِھکّی آتے راہندی اے ۔ وزیراعظم دے وزیریں دی کونسل اِچ محمد اعظم خان ہوتی ناں آلے ہک نائب وزیر اِن ‘ ایہ خیر نال خان عبدالولی خان ہوریں دے ’’سالا صاحب‘‘ ہِن ۔ اخباریں اِچ انہیں دا ہک وݙا سوادی بیان چھپے ۔ آکھینے ! ’’میں ایجھا وزیر ہاں جیرھا ہر ویلھے رُجھیا رہندے ‘ میݙی بھڄ دُھرک تے تݨ وُݨ بارے ٹیلی ویژن آلے ٻہوں گھٹ خبراں ݙیندن۔ او ہِیں ڳالھوں جو لوک میݙی شکل کنوں ایں اَوازار ہِن جو میکوں ٹیلی ویژن تے ہک مِٹنٹ اِی نی ݙیکھ سہندے اَتے میݙی جھاہ تے ماہ جبیں قزلباش کوں ݙیکھ تے خُش تھیندن۔‘‘

ایہ ہک وزیر دا بیان ہے ۔ ہُݨ نمونے کیتاں کیتھاں؟ ہُݨ ہنیں کوں کون ݙساوے جو ٹیلی ویژن ݙیکھݨ آلے لوک چھڑے تُسیݙی شکل کنوں اَوازار کائنی‘ اُنہائیں کیتے سبزہ اِی بوجا اے‘‘۔ سبھے ہک کجھ ہِن ٹیلی ویژن ݙینہ رات ‘ ہر ویلھے اَتے خاص کر ’’خبریں‘‘ تے سیاسی پروگرامیں اِچ جیرھیاں ’’مورتاں‘‘ ݙکھیندے‘ لوک اُنہیں کوں ݙیکھ ݙیکھ تے اَک نک تھے ودِن ‘ اَتے ایہ ڳالھ وی پکی اے جو پاکستان ٹیلی ویژن دیاں خبراں تے ٻے پروگرام اوہے لوک ݙیکھدن جنہیں کنے ’’ڈش انٹینا‘‘ کائنی یا ایجھیں علاقیں اِچ رہندن جتھاں سی این این ‘ پی ٹی این ‘ بی بی سی تے سٹار ٹی وی دے پروگرام کائنی ݙسدے۔

ہک ٻے وزیر حاجی غلام احمد بلور وی ہک پٹھاݨکا بیان ݙتے آپ وی خیر نال تاں عبدالولی خان دی پارٹی دے بندے اِن اَتے ریلوائی دے وزیر اِن ‘ انہیں آکھیے جو اسیݙا قانون دھاڑے مارݨ دی رکھوالی کریندے اَتے ݙاکو پیدا کریندے ‘ ہِیں ڳالھوں قانون بدلیا ونڄے ‘ قانون نہ بدلیا تاں ݙاکو کائناں مُکسِن۔ سوچݨ سمجھݨ آلی ڳالھ ایہ ہے جو ایہو جیہاں بغلولیاں کوئی وزیر مار سڳدے؟ملک داقانون تاں ایں ڳالھ دی موکل نی ݙیندا جو ݙاکوئیں دی ڳنتری اِچ ودھارا تھیوے تے اُنہیں کنوں پُچھ پرتیت کرݨ آلا ‘ کوئی نہ ہووے ’’پولیس‘‘ تے ’’عدالتاں‘‘ آخر کِتھ کیتے ہِن؟ یا ہک ڳالھوں وزیر صاحب حق تے ہِن ‘ ہُنیں آکھیئے جو اسیݙا قانون مطلب اے اَڄ کلھ آلی حکومت دا قانون تاں وَل سچ اے ہیروئن ‘ کلاشنکوف ‘ اغوا‘ تاوان‘ ڈکیتیاں ‘ خون خنام ‘ تریمتیں کوں زوریں رِیت بے عزت کرݨ ‘ ایہ سبھے سوکھڑیاںہِیں حکومت ‘ ہنیں حاکمیں تے ہِنیں دے گُرو گھݨال دیاں ݙتیاں ہوئیاں ہِن ۔ ہِنیں دا گُرو تاں قانون ہک پاسے ریہا ۔ تھڄوں آئین بارے اَکھیندا ہا جو آئین کیا ہے؟ ’’کاغذیں دی مُٹھ‘‘ جیرھے ویلھے دِل چاہوے ورقہ ورقہ کر چھوڑاں۔‘‘

وَل کیتُس وی اینویں ‘ بھوڳ ملک تے ملک دی غریب عوام ودّی بھوڳیندی اے‘ ریلوائی دے وزیر ’’ریل گاݙیں‘‘ تے گولیاں وَساوݨ آلے ݙاکوئیں کوں آکھیئے بے غیرتو ! میکوں گولیاں مارو ۔ نواز شریف کوں گولیاں مارو ‘ غریبیں کوں کیوں گولیاں مریندو۔؟ غریب تاں اونویں وی مظلوم ہن۔‘‘

وزیر صیب ݙاڈھی سوہݨی تے من موہݨی ڳالھ کیتی اے‘ تھیوے ایویں جینویں اُنہیں آپ آکھیئے پر ݙاکو اِی تاں ہنیں کوں ہُوں ویلھے گولیاں مریسن جیرھے ویلھے ایہ کہیں ݙیہاڑے اِچ اُݙرݨ ‘ وَل ہر ویلھے پہرے اِچ ہوندن‘ اڳوں پِچھوں اسوں پاسوں ‘ اُتوں تلوں کلاشنکوفیں آلے رکھوالے نال ہوندن ہُݨ ݙیکھو غیرت کھمدن کناں کینھاں۔؟

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان