انگریزی گولی

                        موریتو ویہہ ٻاوی سال دا تھی ڳیا۔ اَݨ پڑھ ہا ، ڳݙا چریندا ہا ۔ اُوندے پیو دا کم وی ایہو ہا۔ سِلھاں ڈھوݨ مِٹی پٹݨ۔ زندگی گزر ڳئی ہئی ۔ گھر دا گزارا ایں محنت مزدوری تے چلدا پیا ہا۔ موریتودی شادی کائنا تھئی ہئی ۔گھر کچا گھر دے پِچھوں ڳݙئیں دا بھاݨا ہا۔ انہاں دے گھر دے پچھلی طرفوں جَتیں دا گھر ہا ۔ اُو اُٹھ پلیندے ہَن۔ موریتو اپݨے کم کار تو فارغ تھی تے شہر دے چوک وچ ہک ہوٹل تے ونڄ ٻاہندا ہا۔ ہوٹل تے انگریزی فلماں لڳدیاں ہَن۔ وی سی آر دا دَور ہا۔ موقع پا تے ہوٹل دا مالک وی سی آر تے اُو فلماں وی چلیندا ہا جیکوں ݙیکھݨ قانونی جرم ہا۔ موریتو اِنہیں فلمیں کوں وݙے شوق نال ݙیہدے ہا ۔ انہیں فلمیں دی ٹکٹ وی زیادہ ہوندی ہئی۔ ہک فلم اِچ انگریز ہک انگریزی گولی کھا گِدھی۔ اوندے بعد اُوں انگریز فلم وچ اندھیر مچا ݙتی۔ موریتو ایں انگریز کوں پکا گِدھا جو اے اتنا وݙا کم کریندا وَدے ۔ایݙو اُوݙو پُچھدا رہ ڳیا جو ایں گولی دا ناں کیا ہے۔ پتہ لڳا جو اے گولی اوندے اپݨے شہر وچ وی ہک بندے کنوں مل ویندی ہے۔ اُوں بندے کوں موریتو ونڄ ملیا ۔ پہلے تاں اُوں بندے انکار کیتا بعد وچ اُوں موریتو کوں مہانگے مُل ویچی۔ موریتو اے گولی گھِن تے اپݨے گھر رکھ چھوڑی۔ موریتو دیہاتی ٻال ہا ۔ محنت مزدوری اوندے لنِگیں پیریں رَچی کھڑی ہئی۔ جسمانی طور تے ٻہوں مضبوط ہا۔ ڈھئی مݨ دا کݨک دا ملہا اُو کلہیں چا گھِندا ہا۔ اپݨے گھر دے پچھوں راہݨ والے جَتیں دی ہک چھوہر نال اُوندی سُر بݨ ڳئی ۔کئی دفعہ اونکوں کھیر پیڑے کھوائی کھڑا ہا۔ ہک رومال تے چاندی دے چھلے وی اونکوں نشانی ݙتی کھڑا ہا۔ تھیا ایویںجو اُوں ایں چھوہر کوں جیندا ناں پریتو ہااپݨے ڳڈیں دے بھاݨے وچ سݙیا۔ اُتوں ایں انگریزی گولی کھا گِدھی۔ چھوہر ݙاہ یارھاں سال دی ہئی۔ تھوڑی دیر بعد بھاݨے وچ دھاڑ دھاڑ مَچ ڳئی۔ چھوہر دا چِکاٹ ٻکاٹ علیحدہ تے موریتو دی دھاڑ دھاڑ علیحدہ ۔چھوہر رَتو رَت روندی ہوئی اپݨے گھر ݙو ٹُر ڳئی تے موریتو بھاݨے وچ موندھا تھی پیا۔ موریتو دی دھاڑ دھاڑ اتنا ز یادہ ہئی جو موریتو دی ماء سݨ گِدھی۔ موریتو دی ماء امیراں مائی بھاݨے وچ بھڄدی آئی ۔ اپݨے پُتر کوں ݙٹھا جیڑھا جو اپݨے ڄنگھیں وچ ٻلہا ٻدھی پیا ہا۔ امیراں مائی رووݨ پئے ڳئی ۔موریتو دا مونہہ سُڄھیا پیا ہا۔ جسم تے داݨے نِکھتے پئے ہَن تے نہ اُو ٻہہ سڳدا ہانہ کھڑ سڳدا ہا تے نہ سُم سڳدا ہا۔ موریتودی ماء اپݨے پُتر کوں ہولے ہولے ٹُرا تے گھر گھِن آئی۔ کھٹڑے تے لٹایاتاں موریتو کھٹڑے تے ٹپے مریندا پیا ہا۔ سریم دا تیل چا آئی ڄنگھیں تے مالش کیتی، کنڈ تے مالش کیتی پر اُونکوں آرام نہ آیا۔ وستی دے وچ کوئی خاص ڈاکٹر نہ ہا۔ ہک ݙو حکیم ہَن تاں حکمیں کوں ایں بیماری دی سمجھ نہ لڳی ۔ شام کوں موریتو دا پیو گھر آیا تاں اپݨے پُتر دی اے حالت ݙیکھ تے اوندی وئی وللی چھُٹ ڳئی ۔ اونکوں سمجھ نہ لڳی جو ایں مردے پُتر دا علاج کِتھوں کراوے۔ اُوݙوں پچھلے ہمسائے دروازہ کھڑ کا کھڑکا جھیڑا لاوݨ ڳلی وچ آئے کھڑے ہووِن۔ موریتو دے پیو کوں کوئی سمجھ نہ لڳدی پئی ہئی جو اُو ہمسائے نال بھِڑے یا معافی منگے یا اپݨے مردے پُتر دا علاج کراوے۔ علاج کراوے تاں کِتھوں کراوے؟ صرف ایہو جو پاݨی نوسڑا کرا کے اُو پُتر کوں دھویندا رہ ڳیا۔ اُوندے نال تھوڑی تھوڑی پُتر کوں ٹکور تھیندی رہ ڳئی تے ہلکا ہلکا آرام آندا ڳیا۔ ایہا پھڑپوٹ محلے وچ پھیلدی رہی ۔ نال دے ہمسائے صرف کندھی کنوں جھاتی پا موریتو دی طبیعت دا پُچھدے رہ ڳئے۔ ہک ہمسائی جیڑھی جو موریتو کوں ݙاڈھا چنگا ڄاݨدی ہئی او ݙینہہ اِچ ݙو ترئے دفعہ موریتو دی ماء کنوں موریتو دی طبیعت دا پُچھ گھِندی ہئی۔ موریتو دی ماء ہمسائی کوں ایہو کجھ آہدی ہئی جو اماں ہالی اُنویں ہے۔ موریتو دے گھر دی ٻاہرلی دیوار دے وچوں ہک موری نِکھتی کھڑی ہئی جیندی وچوں موریتو دے سنگتی جھاتی پا پا موریتو کوں ݙیہدے رہ ویندے ہن تے اُنہیں کوں وَلا وَلا موریتو دے پیو کنوں طبیعت دی پُچھݨ دی لوڑ نہ راہندی ہئی۔ تے سارے سنگتی ڳلی تے ہک ٻئے کوں ایہو آہدے ہن جو موریتو ہالی اُنویں ہے۔ تریجھے ݙینہہ کتھاہیں سوڄ ونڄ لتھی ۔موریتوݙیڈھا ہتھ نال وَیلا کر ڳلی وچ ٹُردا نظر آیا تاں اُوندے سنگتی اوندی طبیعت دا پُچھدے رہ ڳئے۔ موریتو اُنہیں کوں جواب ݙیندا ہا جوتھوڑ فرق ہے پر ہالی اُنویں ہے۔

٭٭٭

حوالہ

کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان