انٹر ویو دا ہک سیشن
۱۹۸۴ء اچ زرعی یونیورسٹی فیصل آباد دا ہک سیشن مکمل تھیا۔ ڈھیر سارے ٻال نوکری دی تلاش وچ معلومات حاصل کرݨ پئے ڳئے۔ ریڈنگ روم دے وچ لڳے اسٹیند تے اخبار طالب علمیں دا مرکز بݨ ڳیا۔ مختلف محکمے وچ کھُلݨ والیاں سِیٹیں واسطے درخواستاں منگیاں ویندیاں پیاں ہَن۔ بھٹی صحیب دا ہک کلاس فیلو ہئی کنور مسعود اسلم جیندے نال بھٹی صحیب رات کوں درخواستیں مطلوب ہیں دا اشتہار کٹھے پڑھدے ہَن۔ کنور مسعود دی اچانک دید ہک اشتہار تے پئی جیندے وچ ہک ملٹی نیشنل کمپنی صرف ݙو بندے منگی پئی ہئی۔ مگر درخواست جمع کرواوݨ دی آخری تریخ وچوں صرف ݙو ݙینہہ بقایا ہَن۔ کنور مسعود آکھیا: جو اَڄ راتی رات ساکوں درخواست رجسٹری کرواوݨی پوسی۔ تاں جو پرسوں تک درخواستاں پُڄ ونڄن۔بھٹی صحیب اپݨی تے کنور مسعود ݙونہیں دیاں درخواستاں جلدی نال لکھ تے رجسٹری کروا ݙتیاں۔ ہفتے بعد یونیورسٹی وچ ڈھیر سارے طالب علمیں کوں انٹر ویو دی کال آڳئی۔ کنور مسعود دی کال آڳئی جݙاں جو بھٹی صحیب کوں انٹر ویو کال نہ آئی ۔ روزانہ انتظار کیتی ہئی جے توݨی انٹر ویو دے وچوں ہک ݙینہہ رہ ڳیا۔ کنور مسعود کوں تے ٻنہیں طالب علمیں کوں ۱۰۔بی گلگشت کالونی ملتان سݙ گِدھا ڳیا۔ بھٹی صحیب کوں پریشانی جو اُونکوں کال نی آئی۔ جݙاں جو بھٹی صحیب دے آخری ڈگری دے نمبر وی ٻہوں اعلیٰ ہَن ۔ اُونکوں سمجھ نہ آئی جو اُونکوں کیوں کال نی کیتا ڳیا۔ بھٹی صحیب ڈھیر ساریاں سوچاں توں بعد ایہہ فیصلہ کیتا جو اُونکوں ۱۰۔بی گلگشت کالونی ملتان لڳا ونڄݨا چاہیدا ہے۔ یا تاں کال انہاں نے بھیڄی تے اُونکوں مِلی نی۔ یا ݙوجھی ڳالھ ایہہ ہے جو اُنہیں بھیڄی کوئنی تاں کیوں نی بھیڄی۔ انہیں ڳالھیں دا پکا پک کڈھݨ واسطے اُوں وی رات کوں کنور مسعود دے نال ملتان واسطے ریل دا سفر کیتا۔ اڳلے ݙینہہ انٹر ویو توں ہک گھنٹہ پہلے یعنی اَٹھ وڄے ݙونہیں ۱۰۔بی گلگشت کالونی ملتان پُڄ ڳئے۔ آوݨ سئیت پتہ لڳا جو ا یہہ سیباگائیگی دا دفتر ہے اُتھا محمد طاہر ہک کلرک ہے۔ محمد طاہر نال رابطہ کیتا ڳیا ۔ لِسٹ ݙٹھی ڳئی تاں بھٹی صحیب کوں انٹر ویو کال بھیڄی ہی کائنا ڳئی ہئی۔ بھٹی صحیب وجہ پُچھی تاں محمد طاہر کلرک کوئی تسلی بخش جواب نہ ݙتا۔صرف ایہہ آکھ تے ٹال ݙتا جو ایندا جواب مرزا منصور بیگ صحیب ݙیسن۔ جنہاں نے اَڄ سارے انٹر ویو گھِنݨݨ تے انٹر ویو ۹ وڄے شروع تھیسن۔ تھوری دیر بعد ۹ وڄ ڳئے ۔ مرزا منصور بیگ صحیب پورے ٹائم تے دفتر آ ٻیٹھے۔ بھٹی صحیب انٹر ویو گھنݨ والے ہک ٻئے صحیب جنہاں دا ناں چوہدری محمد ارشد ہئی کوں التجا کیتی جو اُو مرزا منصور صحیب کنوں ایہا ڳالھ پُچھ ݙیوِن جو بھٹی صحیب کوں کیوں کال نی کیتا ڳیا۔ واپسی تے جواب ملیا جو انٹر ویو دا باقاعدہ ٹائم شروع تھی ڳئے تے اُو تہاݙے ایں سوال دا جواب شام پنج وڄے توں بعد ݙے سڳسِن۔ بھٹی صحیب ہک بھنی تُرٹی کرسی تے افسریں کنوں ذرا ہک پاسے تھی پلاٹ وچ ٻہہ ڳئے تے سارا ݙینہہ ٻیٹھے رہ ڳئے۔ ہر پندرہ منٹ بعد امید وار تبدیل تھی ویندا ہا۔ ایہو سلسلہ پنج وڄے تک جاری ریہا۔جینویں پنج وڄے بھٹی صحیب موقع پا تے چوہدری محمد ارشد کوں ݙوجھی دفعہ التجا کیتی جو اُونکوں صرف انٹر ویو وچ نہ سݙݨ دی وجہ ݙسی ونڄے۔ چوہدری ارشد صحیب مرزا منصور بیگ صحیب کوں دوبارہ اطلاع ݙتی جو اُمیدوار صرف ہک سوال دے جواب دا طلب گار ہے۔ بیگ صحیب حیران تھیا تے اُوں آکھیا : اُوں امیدوار کوں سݙو۔ بھٹی صحیب اندر ڳیا تاں ٻہوں ہی پُر اعتماد تے ٹھڈے لہجے وچ پُچھا: سر میں تکلیف دی معافی چاہندا ں، جتنی امیدوار سویرے کنوں گھِن تے ایں ویلے تک انٹر ویو ݙے ڳن انہاں سارئیں دے نمبر میں کنوں گھٹ ہِن۔ میں درخواست بھیڄݨ دی رجسٹری رسید ہتھ وچ پاتی کھڑاں میکوں سݙیا نی ڳیا۔ صرف نہ سݙݨ دی وجہ ݙس ݙتی ونڄے تاں بندہ مطمین تھی تے واپس فیصل آباد چلیا ویسی۔ بیگ صحیب بھٹی صحیب دی فائل کڈھوائی۔ فائل دے وچ درخواست موجو دہئی۔ درخواست وچ تاریخ پیدائش دا سال ۱۹۵۹ دی جاہ تے سال ۱۹۸۴ء لکھیا کھڑا ہا۔ بیگ صحیب آکھیا: بھٹی صحیب حالی تاں تُساں ہک سال دے وی نِوہے تھئے ، تہاکوں انٹر ویو واسطے کیویں سݙوں ہا۔
بھٹی صحیب سارا کجھ ݙیکھ کے شکریہ ادا کیتا تے اجازت منگݨ دی درخواست کیتی۔بیگ صحیب آکھیا : بھٹی صحیب تشریف رکھو تہاݙا انٹر ویو کریندوں۔ اوندے بعد پوݨا گھنٹہ انگریزی وچ انٹر ویو گِدھا ڳیا۔ بیگ صحیب دے ہر سوال دا بالکل ٹھیک ٹھیک جواب ݙتا ڳیا۔ بیگ صحیب حیران تھئے جو اتنا اچھا انٹر ویو سارا ݙینہہ اِچ پہلی دفعہ سامݨے آئے۔ بیگ صحیب ٻہوں خوش تھئے تے وَل اُنہیں پُچھا جو بھٹی صحیب تنخواہ کتنا گھِنسو۔ بھٹی صحیب آکھیا: ترئے ہزار ۔بیگ صحیب جواب ݙتا جو سارا ݙینہہ کہیں ہک وی امید وار تنخواہ ݙوہزار کنوں اُتے نئیں منگی تے تساں ترئے ہزار منگدے پئے ہو۔ بھٹی صحیب جواب ݙتا سارا ݙینہہ بھٹی صحیب وی تاں انٹر ویو واسطے کائنا آیا ہا۔ وَل بیگ صحیب آکھیا: بھٹی صحیب تساں پنج ہزار کیوں نی منگی ۔ بھٹی صحیب جواب ݙتا ۔ میݙی اڳلی نگاہ پنج ہزار تنخواہ دے اُتے ہے جیڑھی جو میں اپݨے کم کار دیانتداری ، محنت لگن، تے سچائی نال حاصل کریساں۔
٭٭٭
حوالہ
[لکھو | ماخذ وچ تبدیلی کرو]کتاب: وتر ساخ (سرائیکی کہاݨیاں) ، مصنف : عبداللطیف بھٹی، ناشر: جھوک پبلشرز ،ملتان