انصاف دے ادارے وچ بے انصافی

سرائیکی وسیب دے وکیلیں دے نال نال وسیب دا نینگر وی ایں پاسے دھیان کرے جو انصاف دے ادارے وچ وسیب نال ہمیش توں وانجھ تے بے انصافی تھیندی امدی ہے، انصاف دے وݙے ادارے سپریم کورٹ دی تریخ چاؤں تاں پہلے چیف جسٹس سر میاں عبدالرشید توں گھن تے تصدق جیلانی تئیں 23 چیف جسٹس آئن۔ انہاں سارئیں وچوں چھڑا جسٹس تصدق حسین جیلانی وسیب دے ہِن ، او وی صرف ناں دے ۔ اے گٖالھ میں ایں سانگے آکھی اے جو اپݨے وسیب یا سرائیکی نال انہائیں کوں کوئی سروکار کینھی، نہ تاں او گھر ءِ چ سرائیکی الیندن تے نہ انہاں ’’ مردم شماری وچ سرائیکی خانہ ‘‘ دے کیس توں گھن تے وزیراعظم سید یوسف رضا گیلانی دی ناجائز بر طرفی تئیں ، وسیب کوں انصاف ݙتا؟ عرض کرݨ دا مطبل اے ہے جو سرائیکی وسیب دے لوک سپریم کورٹ دے چیف جسٹس ایں سانگے نی بݨ سگٖئے جو جج ہوسن تاں چیف جسٹس بݨسن ۔ ہائیکورٹ آلے پاسے آؤ تاں اتھاں وی ایہو حال اے ۔ وفاقی محتسب تے صوبائی محتسب جیرھے ریٹائرڈ جج ہوندن ، سرائیکی وسیب وچوں کوئی نی بݨ سگٖیا۔

چیف الیکشن کمشنر دے عہدے تے سرائیکی وسیب دا وارا نی ولیا ۔وفاقی شرعی عدالت ءِ چ وی سرائیکی وسیب دا خانہ خالی اے ، صوبائی تے وفاقی ایڈوکیٹ تے انسپکٹر جنرل پولیس وی سرائیکی وسیب دے لوکیں کوں نی بݨݨ ݙتا ویندا ۔ کمشنرز ، ڈی سی اوز ، آر پی اوز، ڈی پی اوز سارے دے سارے غیر سرائیکی ،اے ظلم نی تاں کیا ہے ؟ حکمران آپ ݙساون جو سرائیکی زبان جیرھی چارے صوبیں ءِ چ الائی ویندی اے تے عظیم سرائیکی قوم جیرھی پاکستان دی سب توں وݙی قومیت اے تے او قوم جیرھی اپݨے خلق ، اخلاق نوازی، انسان دوستی تے امن پسندی وچ اپݨی مثال آپ اے ، کے تئیں ظلم سہندی رہسے تے کے تئیں وانجھ دے صدمے برداشت کریسے ؟ ناں ناں ہُݨ اے ظلم ، زیادتی تے وانجھ نہ چلسے ۔ ہر شئے دی ہک انت ہوندی اے ، ظلم دی انت تھی گٖئی ، وسیب دا نینگر ہُݨ اپݨا حق گھنسے ، نہ ݙیسو تاں لڑ تے گھنسے۔ اانصاف دے اداریں وچ بے انصافیاں بند کرو تے سرائیکی وسیب دے لوکاں کوں آبادی دے مطابق ملازمتاں دا حصہ ݙیو۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ