انجینئر محمد شریف خان گبول

انجینئر محمد شریف خان گبول 1945ء کوں تحصیل علی پور وچ آباد قابل خانی ٹٻر وچ بمقام بڈھن آلا ڄمیے۔ مذکورہ خاندان وچوں بالخصوص آپ دے آبا و اجداد اللہ تعالیٰ دی عطا کردہ بے پناہ تکنیکی صلاحیتاں نال مالا مال ہن۔

ابتدائی تے اعلیٰ تعلیم

اگرچہ اوں دور وچ تعلیمی رجحانات ٻہوں کم ہن، مگر آپ نے ابتدائی تعلیم اعزازی نمبراں نال مکمل کیتی۔ دوران پرائمری آپ دے والد گرامی دا انتقال تھی ڳیا۔ ایہ ناگہانی واقعہ آپ دی زندگی تے ڳھاٹا اثر چھوڑیا۔ اینہہ دوران وچ بڈھن آلا توں حسن والا چلیے آئے۔ 1958ء وچ ہائی اسکول علی پور توں مڈل دا امتحان اعزازی نمبریں نال پاس کیتا تے تعلیمی بورڈ توں وظیفہ وی حاصل کیتا۔ 1960ء وچ میٹرک دا امتحان وی ہائی اسکول علی پور توں اعلیٰ نمبریں نال پاس کیتا تے وظیفہ حاصل کیتا۔ ہائر سیکنڈری تعلیم کیتے علی پور وچ کوئی تعلیمی ادارہ موجود نہ ہووݨ دے باعث "ایمرسن کالج ملتان" وچ داخلہ ڳھدا تے 1962ء وچ ایف۔ایس۔سی پری انجینئری دا امتحان اعزازی نمبریں نال پاس کیتا۔ 1966ء وچ یو۔ای۔ٹی لاہور (UET Lahore) توں بیچلر آف مکینیکل انجینئری دی ڈگری حاصل کیتی۔

عملی زندگی

پاکستان واپڈا وچ دسمبر 1966ء توں فروری 1969ء تک بطور ورکشاپ مینیجر ایم۔پی۔او ورکشاپ سکھر، جامشورو فرائض سرانجام ݙتے۔ 1969ء وچ پاکستان آرڈننس فیکٹریز وچ شمولیت اختیار کیتی۔ 1969ء توں 1975ء تک پاکستان آرڈننس فیکٹریز واہ کینٹ (POF Wah Cantt) وچ بطور اسسٹنٹ مینیجر مکینیکل تعینات رہے۔ 1975ء توں 1987ء تک بطور مینیجر کم کیتا۔ اِس دوران وچ 1982ء توں 1987ء تک آپ کوں "ملٹری فیکٹری الخرج" سعودی عرب وچ بطور نمائندہ (Representative) پاکستان آرڈننس فیکٹریز (POF) تعینات کر ݙتا ڳیا۔ 1987ء وچ وطن واپسی تے بطور جنرل مینیجر ترقی حاصل کیتی تے 1994ء تک اینہہ عہدے تے فائز رہے۔ 1994ء توں 1997ء تک بطور مینیجنگ ڈائریکٹر خدمات سرانجام ݙتیاں۔ اینہہ دوران وچ آپ یو۔ای۔ٹی ٹیکسلا (UET Taxila) دی سنڈیکیٹ (Syndicate) دے ارکان وی رہے۔ 1999ء وچ ممبر پی۔او۔ایف بورڈ ترقی حاصل کیتی تے جنوری 2005ء تک اعزازی گریڈ تے بخوبی فرائض سرانجام ݙتیے۔ یکم فروری 2006ء کوں ریٹائرمنٹ حاصل کر ڳھدی۔ پی۔او۔ایف وچ آپ دی خدمات اِس قدر نمایاں ہن کہ چیئرمین پی۔او۔ایف نے 2006ء وچ آپ دی خدمات دے اعتراف وچ ولا پی۔او۔ایف وچ شمولیت دی پیشکش کیتی۔ چیئرمین دے پُرزور اصرار تے بطور "ٹیکنیکل کنسلٹنٹ چیئرمین پی او ایف بورڈ" آپ نے ولا ذمہ داریاں سنبھال ڳھدیاں تے 2009ء تک اینہہ منصب تے تعینات رہے۔ ذاتی مصروفیات دے سبب 2009ء وچ مستعفی تھی گئے۔ نویں آوݨ آلے چیئرمین نے جݙاں پی۔او۔ایف وچ مختلف پراجیکٹس تے آپ دا کم ݙٹھا تاں آپ کوں سݙوا ڳھدا۔ ایہ لمحہ آپ دی خدمات تے صلاحیتاں دا بدرجہ اُتم اعتراف ٹھہریا، لہٰذا جولائی 2012ء توں حال تک آپ بطور "ایڈوائزر چیئرمین پی۔او۔ایف بورڈ" بخوبی ذمہ داریاں نبھیندے پئے ہن۔

بیرونی ممالک دے دورے

پی۔او۔ایف وچ سروس دے دوران وچ آپ کوں مختلف ممالک دے سرکاری دورے کرݨ دا وی اعزاز حاصل تھیا۔ چیئرمین پی۔او۔ایف دی سربراہی وچ جݙاں وی کوئی وفد بیرونِ ملک سرکاری دورے تے ویندا ہا تاں آپ اوندے وچ شامل تھیندے ہن۔ سب توں پہلے آپ نے جرمنی دا دورہ کیتا تے اتھاں توں چھ مہینے دی ٹیکنیکل ٹریننگ حاصل کیتی۔ جݙاں آپ ممبر انڈسٹریل و کمرشل ریلیشنز پی۔او۔ایف بورڈ دے اعزازی منصب تے فائز تھئے تاں آپ نے ݙو واری ابوظہبی، ݙو واری دوبئی، ترائے واری سویڈن تے ݙو واری ترکی دا دورہ کیتا۔ ٻئے ممالک وچ برطانیہ، مصر، مراکش، الجزائر، ایران، چین، جنوبی کوریا، سوئیزرلینڈ، ڈنمارک وغیرہ شامل ہن۔

خراجِ تحسین

محمد شریف خان گبول، علی پور دے گبول قبیلے دے اوہ عظیم چشم و چراغ ہن جنہاں کوں اتھاں آباد ٻئے قبائل سمیت علی پور دے پہلے تے ضلع مظفر گڑھ دے اوّلین انجینئرز وچوں ہووݨ دا شرف حاصل ہے۔