امیر چند بہار

1925ء تا 2012ء

پروفیسر امیر چند بہارؔ 12نومبر 1925ء کوں قصبہ روکھڑی ضلع میانوالی وچ پیدا تھئے، تعلیم ایم اے انگریزی گورنمنٹ کالج لاہور توں حاصل کیتی۔تقسیم دے بعد آپ انڈیا ونجٖ کے انگریزی دے استاد لگٖ گٖئے ۔ امیر چند بہارؔاردو نال خاص دلچسپی رکھدے ہن۔آپ دے 12شعری مجموعے مثلََا ارمغانِ بہار ، اردو ہے جس کا نام، انسان بنو ، دین و دنیا ، نسیمِ بہار ، نشیب و فراز وغیرہ شائع تھی چکے ہن۔یکم جنوری 2012ء کوں امیر چند بہارؔ 87سال دی عمر وچ فرید آباد انڈیا وچ اللہ کوں پیارے تھی گٖئے۔

(1) غزل

وت دل دے کُلفتاں دی ہے یلغارکیا کراں

تیڈٖا علاج ڈٖس دلِ بیمار کیا کراں

میکوں جو روز گار دا غم ویڑھی رہ گٖئے

وت میں طواف کوچہء دلدار کیا کراں

دل بُٖجھ گٖئے تے آپ نے کیتا ہے یاد ہُنْ

پتھرا گٖیا ں جو اکھیاں تاں دیدار کیا کراں

رخصت تھئے شباب تاں ہُنْ آپ آئے وے

ہُنْ آپ ای ڈٖساؤ جو سرکار کیا کراں

او تاں ہے اپنْی ضد تے اجٖاں تئیں اَڑیا ہویا

اوں نال ہُنْ میں بحث تے تکرار کیا کراں

ارمان اپنْاں کوئی نہ پورا تھیا بہارؔ

ناکام حسرتاں دی ہے بھر مار کیا کراں

٭٭٭