امیر ابو اللباب المنبہ بن اسد القرشی السامی

علامہ مسعودی آپݨی شہرہ آفاق تصنیف مروج الذب وِچ لکھین٘دے ہِن جو امیر ابو اللباب المنبہ بن اسد القرشی السامی جِہڑا 303 ہجری وِچ ملتان دا حاکم ہَئی۔ ہِک دولت ون٘د فرمانروا ہَئی۔ ہِک لَکھ وِیہ ہزار دیہ اُون٘دے تابع ہَن۔ اُون٘دی عسکری طاقت وی ݙاڈھی تَکڑی ہَئی۔ اُوں نے اسلامی ملکاں نال گھاٹے روابط اُسار رکّھے ہَن۔ خراسان کنوں قافلیاں دی آمد و رفت رہن٘دی ہَئی۔ جین٘دے نال لہن٘دے مُلکاں دا مال اِتّھاں آ تے وِکدا ہون٘دا ہَئی اَتے لہن٘دے دے تاجر اَتے پان٘دھی وی سَوکھ نال آن٘دے وین٘دے رہن٘دے ہَن۔ ملتان دا مندر ہندوؤاں دے نیڑے وݙا مقام رکھین٘دا ہئی۔ ہندوستان دے ݙاڈھے لَمّے دے مَݨاں تئین لَکّھاں یاتری اِین٘دے درشن کوں آندے اَتے قیمتی چڑھاوے چڑھین٘دے ہَن۔ اِیں مندر دی آمدݨ نال حکومت کوں ݙاڈھا حِصّہ مِلدا ہَئی۔ جین٘دے نال خزانہ ہمیشاں بھریا رہن٘دا ہَئی۔ ہندوستان دے راجے بھان٘ویں جو فوجی طاقت وِچ امیر ملتان کنوں ٻہوں ݙاڈھے ہَن، پَر جݙݨ کݙاہیں اُوہ اِیں شہر اُتے حملہ کرݨ دا ارادہ کرین٘دے، امیر ملتان اُنّھاں کوں پیغام گھلین٘دا جو ڄیکر تُساں میݙے مُلک کَن ہِک قدم وی وَدھایا تاں میں اِیں مندر کوں بَھن تروڑ تے بھوئیں دے برابر کر ݙیساں۔ کیوں جو ہندو اِیں مندر دا ݙاڈھا آدر کرین٘دے ہَن، اُوہ اِیہ گوارا نہ کر سڳدے ہَن جو مندر کوں نقصان پُڄّے، اِیں کِیتے اُوہ اِیں ارادے کوں چھوڑ ݙین٘دے ہَن۔

ٻِیا ݙیکھو

• ملتان دے مسلمان گورنر۔
• ملتان تے علویاں دی حکومت۔
• ہارون بن عبد اللہ ملتانی۔