امیدوار چوکھڑ چئی ودن

24اکتوبر کوں قومی اسمبلی اَتے 27اکتوبر کوں صوبائی اسمبلی کیتے ’’ممبر‘‘ چُݨݨ واسطے ’’ووٹ‘‘ پوسِن ۔ باقی ڳیݨویں ݙینہ رہ ڳن ۔ اُمیدواریں دا ہاں وات اِچ اے ‘ نندراںحرام ہِنیں۔ ݙینھ رات چوکھڑ چئی وَدِن ۔ خاص طور تے سرکار دربار آلے اُمیدوار ٻنہائیں کنوں ودھیک ویڑے تھے وَدِن ۔ کیتیاں سامھیں اَمدیاں پے نیں۔ لوکیں کوں اُنہیں دیاں ڳنڈھیاں یاد اِن خُلق اخلاق نال مِلݨ یاد اے ۔ اپݨے اقتدار تے اختیار آلے زمانے اِچ علاقے دی ترقی تے لوکیں دی بھلائی دی خاطر جیرھے کم کیتے ہنیں ۔ جیرھی ڈھال بھنوائی ہِنیں ۔ عوام کوں چنڳیں رِیت علم اے۔ ایجھے امیدوار اَتے اُنہائیں دے حمایتی چیئرمین ‘کونسلر ‘ معزز ‘ معتبر اتے چمچے کڑچھے ۔ فتوے تے دُعائیں ویچݨ آلے وِکائو مولویں سمیت بھنبھیریاں بݨیے وَدِن ۔ ایہ مُنڈھ لا دے ݙٹ باز اِن ‘ کُوڑ بتوڑ ‘ قسماں ‘ حداں ‘ منت ‘ترلا ‘ وعدے ‘ آسرے ‘ دراڑاں ‘ایں کر ݙیسوں اُوں کر ݙیسوں۔

اَڄ کل ایہ دِھر پکڑی وَدِن ۔ اَساں ایہ کیتے اساں او کیتے اَساں ایٻا سکول کُھلوائے اَساںاُوٻی سڑک بݨوائی اے۔ اَساں اِیبی وستی کوں بجلی ݙیوائی ۔ اَساں اُٻی وَستی اِچ ہسپتال بݨوائی ۔ ہُݨ اُ نہیں کنوں کوئی پُچھے جوایہو جیرھا کجھ اَکھیندے وَدو  درست من گھنوں تاں وَل اِی تُسیݙا کیہاں احسان ‘ تھورا ہے؟ ۔ کیا لوکیں کنوں حکومت جیرھے ٹیکس اُڳڑیندی اے اُوندی کٹھی تھئی ہوئی سرکاری خزانے آلی رقم تُسیݙی ہوندی اے جو احسان ڄݨویندے وَدو۔؟ سرکاری خزانے اِچ ٹیکس دی صورت اِچ کٹھی تھیوݨ آلی رقم تاں اُونویں وی لوکیں دی ہوندی اے تے حکومت دا فرض ہوندے جو ایہا رقم لوکیں دی بھلائی کیتے خرچ کرے ۔ عوام دی بھلائی تے سہولت دی خاطر سڑکاں بݨواوے ‘ سکول بݨواوے ‘ ہسپتال بݨواوے ۔ اُنہیں دی بھلائی کیتے خرچ کرے کیوں جو عوام کوں آوݨ ونڄݨ ‘ پڑھݨ ‘ لِکھݨ تے علاج معالجے دیاں سہولتاں ݙیوݨ حکومت دی ذمہ واری ہوندی اے اَتے ہِیں خاطر لوکیں کنوں کئی قسم دے ٹیکس اَڳوڑیے ویندن ۔ ݙوجھی ڳالھ ایہ ہے جو1985ء آلے غیر جماعتی الیکشن اِچ اَتے اوندے بعد 1988ء آلے الیکشن اِچ اسمبلیں دے ’’ممبر‘‘ چُنڑیجݨ آلے اِنہیں ’’امیدواریں‘‘ جیرھے وی منصوبے منظور کرائے ہِن یا مکمل کرائے ہِن ۔ او سبھے منصوبے اُنہائیں علاقیں کیتے ہَن ۔ جتھاں اِنہیں دی ’’برادری‘‘ دے چک ہِن یا جتھاں پنجابی ٻولݨ آلیں دی آبادی ودھیک ہئی ۔ 1985ء تے 1988ء دے بعد ہِیں علاقے اِچ خاص طور تے اُنہیں ݙوں تعصبی امیدواریں دے حلقے اِچ … بݨݨ آلے سکولیں‘ سڑکیں اَتے ہسپتالیں دی لسٹ چا تے ݙیکھ گھنو ۔ ٻیا تاں ٻیا سیٹھ اسلم دے وَݙے حمایتی چیئرمین حاجی مراد کنوں پُچھ ݙیکھو ‘ ڈاکٹر اکبر ملک مِسݨ تے سردار حامد کمال ڈاہر کنوں پُچھݨ دی لوڑھ کائنی او تاں……؟

سیٹھ اسلم تاں 1988ء آلے الیکشن اِچ کامیابی تھیوݨ دے بعد بی ٹی ایم پُل جھول  مائینر تائیں بݨݨ کیتے منظور تھئی ہوئی پکی سڑک بݨݨ کنوں ہِیں ڳالھوں رکوا ݙتی ہئی جو ہُوں علاقے دے لوکیں میاں عبدالخالق کوں ووٹ ݙتے ہَن ۔ ایہا سڑک خود سیٹھ اسلم الیکشن کنوں پہلے ۔ آپ شوگر کین روڈ سیس اِچوں منظور کرائی ہئی ۔ جمہوریت دا اصول تاں ایہ ہوندے جو ایم پی اے یا ایم این اے چُݨریجݨ آلا بندہ۔ اُنہیں لوکیں دا وی نمائندہ ہوندے جیرھے اونکوں ’’ووٹ‘‘ کائنی ݙیندے… پر میاں عبدالخالق تے سیٹھ اسلم ایم این اے تے ایم پی اے بݨݨ دے بعد ایں علاقے دے سرائیکیں تے جیرھے احسان کیتن اُنہائیں دی لسٹ وݙی لمبی اے ۔ چھڑا سرائیکی بلوچیں دے بے گناہ عورتیں کوں ڈھکواوݨ ‘ مرواوݨ آلا کیس اِی ایجھا کیس ہے جینکوں انہیں ݙوہیں ’’ممبریں‘‘ دی جمہوریت تے اسلام نال محبت دا پتہ لڳ ویندے تے ایہ وی علم تھی ویندے جو کتنے ’’غیر متعصب‘‘ ہِن ۔ اُنہائیں دے حمایتی سرائیکی معززین ۔ لاحول واللہ۔

خمیس18؍اکتوبر1990ء

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان