امتیاز فریدی

1963ء تا 2013ء

امتیاز فریدی مرحوم دا تعلق  علم و ادب دے مرکزی تے مثالی قصبے رسول پور نال ہا ، انہاں ابتدائی تعلیم رسولپور توں حاصل کیتی ، مڈل دے بعد گورنمنٹ ہائی سکول محمد پور توں میٹرک دا امتحان پاس کیتا ، تے ول الیکٹریکل وچ 3سالہ ڈپلومہ کر کے محکمہ تعلیم اچ ڈرائنگ ماسٹر بھرتی تھی ڳئے۔تے بعد اچ ایم اے سرائیکی تے ول ایم فل کیتا ۔ تے ایندے بعد پی ایچ ڈی دا مقالہ بعنوان ’’ سرائیکی شاعری وچ ثقافتی عناصر ‘‘ لکھدے پئے ہن ،جیکوں بیمار ہووݨ دی وجہ توں مکمل نہ کرسڳیئے تے 5ستمبر2013ء کوں وفات پا ڳئے۔جتھوں تک امتیاز دی شاعری دا تعلق ہے تاں آپ خوب صورت لبٖ و لہجے دے شاعر ہَن ۔ خصوصََا غزل بٖہوں سوہݨی لکھدے ہَن۔انہاں دی کتاب’’ عشق الیندا ناہیں‘‘اچوں ڈٖو غزلاں ملاحظہ تھیون۔

غزل

اڄ ہے خوشی دی انتہا پُر کیف ہے سارا جہاں

ہُݨ ایہو مصرعہ غزل دا خود بخود آکھے زباں

میں تاں ایہوں چاہندا ہاں اظہار نہ غم دا تھیوے

پر تھی کرائیں بے حوصلہ میڈٖیاں اکھیں ہن رو پیاں

کیا تھیا جیکر میں رو پیاں اظہار تھئے جذبات دا

دلدار دی آمد ہے ہنجوں تہوں ہن آڳیاں

کئی وار وعدہ وفائی دی چا قسم مکریا کھڑے

اے جیڈٖے ٹھڳباز دا اعتبار میں کیویں کراں

وت شئیت کہیں ظالم نے کیتا ظلم ہے مظلوم تے

دھرتی پئی ہے کمبدی ولا روندا کھڑا ہے آسماں

امتیازؔ اپݨی زندگی دا ہمسفر وی ڳول گھن

اَہدن بٖہوں مشکل سفر ہے رل ویندن اتھ کارواں

غزل

رو رو تے توڑے ہجر وچ دامن پسائی کھڑاں

پر تیڈٖے راہ تے اونویں میں پلکاں وچھائی کھڑاں

کیا تھیا چمن کوں نئیں ڈٖتے گُل پُھل بہار نے

زخمیں دے نال میں اوئیں گلشن سجائی کھڑاں

حالی تاں کوئی لوڑ نئیں تہاڈٖی وے بادلو!

فی الحال ہجر قائم ہے مینہ خود وسائی کھڑاں

غلطی ہے اے زباں دی جو ناں گھنیج ڳئے

میں تاں تیکوں سویل دا دل توں بھلائی کھڑاں

امتیازؔ کیا تھیا جیکر بے زار ہے سڄݨ

مشتاقیں دی فہرست وچ ناں تاں لکھائی کھڑاں

؎نازاں نہ تھی اے جانِ جاں اپݨے شباب تے

بعد از ڈٖوپہر سجھ کوں وی ہوندا زوال ہے

٭٭٭