امب شریف

ضلع خوشاب دا سب توں قدیم مقام امب شریف ہے۔جتھوں لکھاں سال پراݨی آبادی دے نشان ملدن۔احٖ وی اتھاں دے پراݨے قلعے تے قدیم عمارتاں دے قدیم تہذیبی نشان اتھاں ݙٹھے ونجٖ سڳدن۔ایندے آسے پاسے قدیم تہذیب دے ٻہوں سارے آثار کھنڈیے پن۔امب پہاڑ ہک عظیم الشان قلعہ تے وݙی وݙی حویلیاں دے آثار موجود ہن۔ سو سال پہلے تک ایں جھاہ تے قدیم کشمیری طرز تعمیر دے بنڑیے ہوئے ترائے مندر ہن۔ مگر احٖ کل صرف ݙو مندر نظر آندن ۔ انہاں مندراں کوں راجہ ’’امبریک‘‘ نال منسوب کیتا ویندے۔ جیندے ناں تے ایں علاقے دا ناں پیا۔ ایں قلعے دے آسے پاسے ہک کتبہ وی دریافت تھیا ہا جیڑھا جو ترائے فٹ لمبا اور اڈھائی فٹ چوڑا ہا۔ ایکوں ہک پنڈت پڑھیا تے ایندے نتیجے تے پُجٖیا جو اے کتبہ ظہورالاسلام توں پنج سو سال پہلے دا ہا۔ اے رائے حقیقت کائناں ہئی۔ ایں کتبے کوں محققین نے انہاں قدیم شمسی سورمیاں نال منسوب کیتا ہے جنہاں توں رگ وید دے کئی اشعارمنسوب کیتے ویندن۔ امب پہاڑ دے مشرق آلے پاسے ہک لمبی دیوار دے آثار اے ظاہر کریندن جو میدانی باشندیاں دے حملیاں توں بچݨ کیتے اے دفاعی فصیل دا کم ݙیندی ہئی۔