امان اللہ خان نیازی

تحریک پاکستان سانگے ٻہوں کم کرݨ آلے سئیں امان اللہ خان نیازی30نومبر 1925ء کوں لاہور اچ پیدا تھئے۔ آپ دا تعلق میانوالی دے مشہور نیازی خاندان نال ہا۔ ابے سئیں دا ناں ڈاکٹر محمد عظیم خان ، ابتدائی تعلیم لاہور اچ حاصل کیتی۔ عمر ݙاہ یارھاں سال ہئی جو لاہور اچ مسیت شہید گنج دا واقعہ تھی ڳیا۔ مسجد شہیدگنج دی تحریک دے رہنما مولانا ظفر علی خان دی تحریک تے نینگر کفن ٻدھ تے جلوس کڈھیندے ہن جنہاں اچ ݙوجھے ٻالیں دے نال امان اللہ وی شامل ہوندے ہن۔انہاں دی خاص ڳالھ اے ہئی جو انہاں لاہور اچ وی اپݨی میانوالی دی سرائیکی سنجٖاݨ کوں برقرار رکھیا۔ بعداچ مسلم لیگ اچ شامل تھی ڳے۔ 1940ء دے اجلاس لاہور اچ شرکت کیتی۔ 1941ء تا 1947ء پنجاب مسلم اسٹونٹس فیڈریشن نال وابستہ ریہے۔ اسلامیہ کالج یونین تے اسٹوڈنٹس فیڈریشن دے صدر ہن۔ 23مارچ 1945ء اچ اسلامیہ کالج لاہور اچ یوم پاکستان دے موقع تے ہک عظیم الشان جلسہ منعقدکرایا۔ 1947ء اچ خضرحیات ٹوانہ دے خلاف احتجاجی تحریک اچ گرفتار تھئے۔ 1987ء اچ حکومت پنجاب دی طرفوں تحریک پاکستان گولڈ میڈل ملیا۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء