الیاس قیصر

الیاس قیصر (1943ء تا 2019ء)

الیاس قیصرؔ مرحوم کئی کتاباں دے خالق تے مؤلف ہن ، کتاب ’’پھُلّاں دی جھولی‘‘انہاں دا ہک ٻہوں وݙا کارنامہ ہے، جیندے وچ انہاں سرائیکی وسیب دے مختلف شعراء دا کلام ، کوائف تے انہاں دے حالات بمائے تصاویر پیش کیتے۔الیاس قیصر خود وی ہک خوبصورت لٻ و لہجے دے شاعر ہن ’’چچلاندے پھٹ‘‘دے ناں نال انہاں دا ہک شعری مجموعہ وی اڄ کنوں کئی سال پہلے چھپ چکے۔نمونہ کلام حاضر ہے۔

غزل

کئی ݙٹھے گھائل اساں اوں حسن دی تصویر دے

واہ عجوبے کارنامے کاتبِ تقدیر دے

جذبے بے اختیار ہن تے شوق ہردم ون پوّن

سئے ݙٹھے قیدی تھیندے ایں زلف دی زنجیر دے

عشق دے میدان وچ جیڑھا وی بھُل کے آ گٖیا

کئی ݙٹھے سولی اُتے کُئی ہیٹھ ہا شمشیر دے

رو تے آکھے نامہ بر میں کیا ݙساواں حال ہُنْ

کر ڈِٖتے ظالم نے پُرزے عشق دی تحریر دے

کئی ݙٹھے ہن وانگ قیصرؔ بے نوا رُلدے اِتھاں

کئی ݙٹھے ہن رنگ اساں ایں فلک بے پیر دے

؎پتھر دی پیدا وار ہن لعل تے گُہر

پر ساݙا یار ِ ہیرا سونے دی کان دا