اللہ وسایا شرّر

1942ء تا 2017ء

اللہ وسایا شرّر( مرحوم)، سکھانی قبیلے نال تعلق رکھن آلے کوٹ چھٹہ ضلع ڈیرہ غازی خان دے بزرگ شاعر ہن ،جنہاندا 23مئی 2017ء کوں 75سال دی عمر اچ انتقال تھی گیا ، آپ دا شمار سرائیکی دے استاد شعراء وچ تھیندا ہا ،درجناں شعراء نے آپ توں راہنمائی حاصل کیتی ،کوثر بزدار تے ساجد علی پوری انہاندے ناں آلے شاگرد ہن ۔اوہ اپنے زمانے وچ شرّر سرائیکی ادبی سنگت تے سوبھ سرائیکی ادبی سنگت دے سر پرست اعلیٰ رہ گئے۔استاد اللہ وسایا شرّر کوں سرائیکی شاعری دیاں تمام مروجہ اصناف تے عبور حاصل ہا ،جڈاں جو آ پ دیاں پسندیدہ صنفاں ڈوہڑہ تے غزل ہن۔بہشتی اللہ وسایا شرّر خوبصورت شکل و صورت دا مالک تے خوبصورت لب و لہجے دا شاعر ہا ۔ غزل دا نمونہ پیش خدمت ہے۔

(1) غزل

آپ اپنی گول وچ اپنی عمر گالی بیٹھوں

ہیں سکندر وقت دے توڑے جو ہتھ خالی بیٹھوں

کیا تھیا فرقت دے جے اندھے اندھارے ویڑھ گن

آپ اپنے جسم کوں بھا لا تے بھا بالی بیٹھوں

کہیں جہنم دا ریہا ہن جسم کوں کئی خوف نئیں

ہجر دے دوزخ دے وچ سڑ سڑ بدن جالی بیٹھوں

جسم ساڈا کہیں غذا دا ہن ریہا محتاج  نئیں

آپ اپناں ماس کھا کے جسم کوں پالی بیٹھوں

بے وسی ساڈی دی یارو انتہا ڈیکھو تاں سہی

چور چوری کر گئے توڑے جو اکھ بھالی بیٹھوں

________________________

یار توں ملئن سوغاتاں خوبصورت پیار دیاں

پیار توں ملئن اداواں احترامِ یار دیاں

گھیل تے گھن اَئی ہے ساکوں زندگی اوں شہر وچ

یار وی ساکوں جتھاں بھانداں ڈیندن اغیار دیاں

کیویں لہندے سر توں شرّر ؔآ لہاوے بار کئی

چئی ودے ہر کوئی گنڈھڑیاں اپنے اپنے بار دیاں

٭٭٭