اللہ نذر بلوچ

ڈاکٹر اللہ نذر بلوچ بلوچ اسٹوڈنٹ آرگنائیزیشن (آزاد) دے بانی تے بلوچ مزاحمتی تنظیم بلوچستان لیبریشن فرنٹ (بی ایل ایف) دے سربراہ ہن۔ ݙوہیں قوم پرست تنظیماں کوں حکومت پاکستان دہشت گرد تنظیماں قرار ݙے چکی ہے۔ بی ایس او (آزاد) سیاسی حوالے نال بلوچستان دی آزادی کیتے جدوجہد کریندیاں پیاں ہن جبکہ بلوچستان لبریشن فرنٹ (بی ایل ایف) دے جنگجو مسلح محاذ تے بلوچستان دی آزادی کیتے لڑدےپئے ہن۔ اللہ نذر بلوچ دے بھرا تے بھتریجے وی بلوچستان لبریشن فرنٹ (بی ایل ایف) دے رکن ہن۔ ڈاکٹر اللہ نذر بلوچ 2 اکتوبر 1968ء کوں ضلع آواران دے علاقے مشکے وچ ڄمیے ہن۔ انہاں نے ابتدائی تعلیم ہائی سکول توں حاصل کیتی تے 1989ء وچ پری میڈیکل ڈگری دے نال عطاشاد ڈگری کالج تربت ڳئے۔ ایندے بعد انہاں نے بولان میڈیکل کالج کوئٹہ وچ داخلہ ڳھدا۔ انہاں دے پیو نبی بخش خان بلوچ دا انتقال 2011ء وچ تھیا۔ اگست 2015ء وچ پاکستان آرمی نے ہک فوجی آپریشن وچ ڈاکٹر اللہ نذر بلوچ دے ماریے ونڄݨ دا اعلان کیتا، پر ݙو مہینے بعد ڈاکٹر اللہ نذر بلوچ نے ہک ویڈیو جاری کیتی جیندے وچ انہاں نے آکھیا جو اوہ زندہ ہن تے بی ایل ایف دی کمان سنبھالیے ہوئے ہن۔