اقبال بالم
اصل ناں محمد اقبال
قلمی ناں اقبال بالمؔ
جٖمنْ 1967ء
تعلیم مڈل
پیشہ سپر وائزر
فون نمبر 0344 8903231
جاہ پتہ وستی شمالی وارڈ نمبر 7منکیرہ ضلع بھکر
شعری مجموعہ’’چھمکاں‘‘دے خالق اقبال بالم دے ڈٖو ترائے شعری مجموعے بٖئے وی چھپ چکے ہن۔اقبال بالم دا تعلق تھل دی دھرتی منکیرہ نال ہے۔آپ ضلع بھکر دے معروف شاعر نذیر ڈھالہ خیلوی دے شاگرد ہن۔بالم دی شاعری بارے سرائیکی وسیب دے مہاندرے شاعر شفقت بزدار لکھدن جو ’’عشق مجازی وچ محبوب دی بے رخی تے سنگ دلی زندگی بھر ختم تھیونْ دا ناں نہیں گھندی۔نا امیدی دی ایں کیفیت کوں اقبال بالم ایں رنگ اچ بیان کریندے۔
؎ ہنجھ پلکاں تے سکدی پئی ہے
نبض وی بالم رکدی پئی ہے
تیڈٖا وعدہ سچ نئیں ہویا
انت حیاتی مکدی پئی ہے
بہر حال اقبال بالمؔ خوبصورت لبٖ و لہجے دا شاعر ہے تے سرائیکی دے نال نال اردو شاعری وی کریندے۔سرائیکی شاعری دیاں تقریبََا ساریاں صنفاں لکھدے ۔ آپ دی سرائیکی غزل دا نمونہ حاضر ہے۔
(1)غزل
[لکھو | ماخذ وچ تبدیلی کرو]دل اچ درد اے لب تے آہ ہے کنتے ونجٖوں
سر تے ظالم وقت دا شاہ ہے کنتے ونجٖوں
جنتے ڈٖیکھوں ہر پاسے ہن لاشاں ای لاشاں
چار چدھاروں بٖس ٹھاہ ٹھاہ ہے کنتے ونجٖوں
مہنگائی توں مفلس شودے مردے پئے ہن
وت وی ظالم دی واہ واہ ہے کنتے ونجٖوں
لیگی ہووے ، پی پی ہووے ، کوئی وی ہووے
ہر دا اپنْاں اپنْاں راہ ہے کنتے ونجٖوں
ہر پاسے ہے افرا تفری خون خرابہ
بالمؔ جگٖ تے اوکھا ساہ ہے کنتے ونجٖوں
(2)غزل
[لکھو | ماخذ وچ تبدیلی کرو]پہلے ہاسے سئے سئے ترلاں نال گزاری رات
وت آ گٖئی ہے ساڈٖے سر تے درداں ماری رات
وڈٖے خان دے کتے کھاون گھیو دی چوری روز
بٖال غریب دے بکھ توں روندے ساری ساری رات
کل کیا تھیسی سوچ سوچیندیں سر تھئی آن سویر
روز غریب دے ہاں تے چلدی بنْ کے آری رات
نال غریب دے کیا گزری ہے کہیں نہ ونڈیا حال
اوڑک سر تے چاونْی پئے گٖئی وس توں بھاری رات
گھر چوں غربت کڈھنْ کیتے مارے بالم ؔبٖانْ
انت غریب دے ساہ ہر گٖئے ہن پر نہ ہاری رات