اقبالؔ قریشی
اصل ناں محمد اقبال
قلمی ناں اقبال قریشی
جمن 1955ء
تعلیم ایم اے ،ایل ایل بی
پیشہ ریٹائر،کنٹرولر امتحانات
فون نمبر 03216027665
جاہ پتہ محلہ سجراں والا،میٹھے نلکے خوشاب
اقبال قرشی 4جون 1955ء کوں چن پیر قرشی دے گھر ٹبہ قائم دین ضلع خوشاب اچ پیدا تھئے،مڈل اپنے آبائی قصبہ ٹبہ قائم دین توں ،میٹرک گورنمٹ انبالہ مسلم ہائی سکول سرگودھا توں پاس کیتا۔ایف اے 1973ء اچ (پرائیویٹ) ملتان بورڈ توں پاس کیتا۔1977ء اچ بطور جونیئر کلرک زکریا یونیورسٹی ملتان توں ملازمت دا آغاز کیتا،تے نال دے نال (پرائیویٹ) پڑھائی وی جاری رکھی، حتیٰ کہ ایم اے دے بعد ایل ایل بی تے ول ڈپلومہ امتیازی حیثیت نال پاس کیتا ۔تعلیم دے نال نال ترقی وی حاصل کیتی۔زکریا یونیورسٹی ملتان اچ 25سال تے سرگودھا یونیورسٹی اچ 12سال فرائضِ منصبی سر انجام ڈتے۔تے آخر 3جون 2015ء کوں قائم مقام کنٹرولر امتحانات سرگودھا یونیورسٹی توں ریٹائر تھی گئے۔
جتھوں تک آپ دی شاعری دا تعلق ہے تاں اصنافِ سخن دے حوالے نال آپ نظم، غزل ، گیت، قطعہ ، سرائیکو تے ڈوہڑہ لکھدن۔ہُن تائیں آپ دیاں 6کتاباں چھپ چُکیاں ہن۔ریڈیو ملتان دے شعبہ موسیقی نے آپ دے کئی گیت ریکارڈ کیتے جیڑھے جو اکثر نشر تھیندے رہ ویندن۔نمونہ کلام پیشِ خدمت ہے۔
(1) غزل
[لکھو | ماخذ وچ تبدیلی کرو]سجنیں نال تاں بیلے وسدن ، سجنیں نال بہار
ہوون جگ تے لکھاں ہیراں بن رانجھن کہیں کار
رلّے وسئے رلّے ہسئے، رلّے جھمریں پائیاں
جانجی سارے گھر دو ول اَئے گھوٹ تاں رہ گئے پار
سنگتاں والے سنگتیاں رلّے اپنی منزل پُج گئے
ساری رات توں سُتّا رہ گئیں ہُن روون بیکار
جھُریاں بیریں جھورن کیتے ہر کئی بھج بھج آندا
اپناں آپ پکاون کارن اپنی میں نوں مار!
ڈس اقبالؔ جو تیڈے اندر جگ توں ودھ کیا خوبی؟
توں وی اندروں خالی کھولا،تئیں جھئیں ہور ہزار
(2)غزل
[لکھو | ماخذ وچ تبدیلی کرو]تیڈے درد پیارے کیوں لگدن
تئیں باجھ اندھارے کیوں لگدن
ہر ویلے من وچ وسدا ہیں
وت مونجھ منجھارے کیوں لگدن
تیڈی یاد دے گاون گاندا ہاں
میڈے نال اے سارے کیوں لگدن
جنہاں پیار دے دریا پار کیتے
او ہتھ من تارے کیوں لگدن
ہیں ازلاں توں اقبالؔ دا چن
وت روز ونڈارے کیوں لگدن
٭٭٭