اظہر کلیانْی

اصل ناں       اظہر حسین

قلمی ناں       اظہر کلیانْی

جٖمنْ           1981ء

تعلیم          ایم فِل

پیشہ           ٹیچنگ

فون نمبر        0345 7276012

جاہ پتہ         قصبہ کالا تحصیل و ضلع ڈیرہ غازی خان

شعری مجموعہ’’ وسوں نال وساخ‘‘دے خالق اظہر کلیانْی منفرد لبٖ و لہجے دے، نویں طرز دے غزل گو شاعر ہن ۔ ایں توں پہلے آپ دی ہک کتاب ’’در اَگٖوں کچنال‘‘ وی چھپ چکی ہے ،جیڑھی صرف نظماں تے مشتمل ہے۔جڈٖاں جو ایہ کتاب ’’وسوں نال وساخ‘‘ وچ چھڑیاں غزلاں ہن۔مگر ساری کتاب اچ اکثر غزلاں چار چار اشعار دیاں ہن ، حالانکہ غزل کم از کم 5اشعار دی ہوونْی چاہیدی ہے۔بہر حال اظہرؔ کلیانیْٰ دی غزل اپنْے سرائیکی وسیب ، اپنْی ماء دھرتی ، اپنْی ماء بٖولی تے اپنْے کلچر دی ترجمان ہے۔

(1)غزل

پانْ پڑوپی تھیسی جڈٖاں ٹوپا پائی ونجٖ تھیسی

اوں ڈٖینہ خلقت ہک ڈٖوجھے دی حق ہمسائی ونجٖ تھیسی

دریا جڈٖاں ریت اپنْی کوں چھوڑ کے ویسی جانی

پچھلی سونہہ وچ لانْے تھیسن ساوی لائی ونجٖ تھیسی

اسّاں جیکوں نکّے لا توں پُھل دے وانگے رکھیا

کیڑھی سُدھ ہئی وڈٖے لا او ڈھول سپائی ونجٖ تھیسی

پیریں کولوں بٖوڈٖیاں تانْی جئیں ساکوں سنگھرایا

ہک سڈٖویسی موچی اتھاں ڈٖوجھا نائی ونجٖ تھیسی

اوئیں تاں اے لاتھیں لاتھیں پِھٹ سگٖدا  ہے اظہرؔ

جیکر بھاہ تے کاڑھی رکھیس کھیر ملائی ونجٖ تھیسی

(2)غزل

جیونْ ساکوں سانبھی رکھئے بھانویں گٖالئے ساکوں

اکھ اپنْی تاں اپنْے رستے آپ ڈٖکھالئے ساکوں

تن اپنْے دی ہبّٖک پچھوں کٹھے تھی گٖئے ہاسے

من اپنْے دی کندھی اُتیں عشق اگھالئے ساکوں

سرمی ککّر پُھل چا ورتن پیلی دُھپ دے اگٖوں

رات اندھاری تارے گھن کیں آن سنبھالئے ساکوں

ہک ڈٖوجھے دے سامنْے اَئے تاں روشن تھی گٖئے کوٹھا

ڈٖیوے کوں تاں بٖالئے اساں ڈٖیوے بٖالئے ساکوں

ڈٖاکھنْی دیوچ بٖہوں ڈٖیہاڑے اوکھئے تھئے ہیں اظہرؔ

ڈٖکھیں دیوچ جوگٖی تھیونْ جوگٖ سکھالئے ساکوں