اصغر ندیم سید

پاکستان دے معروف ڈرامہ نگار ، شاعر اصغر ندیم سید 14مئی 1949ء کوں پیدا تھئے۔ اتھائوں ابتدائی تعلیم حاصل کیتی۔ ملتان توں ای ایم اے (اردو) تے ایل ایل بی د ی ڈگریاں حاصل کیتیاں تے 1972ء اچ اتھاں دے ہک کالج اچ پڑھاوݨ لڳے۔ درس و تدریس دے نال نال شاعری وی کریندے ہن تے تراجم وی ۔ 1980ء اچ گورنمنٹ کالج لاہور نال وابستہ تھی ڳے تے ٹیلی ویژن کیتے ڈرامے لکھݨ شروع کیتے ۔ پہلا ڈراما ’’صبح کی دستک‘‘ دے ناں نال ٹیلی کاسٹ تھیا۔ ݙوجھا ڈرامہ ’’دریا‘‘ چولستان دی صحرائی زندگی دے پس منظر اچ لکھیا ڳیا ہا تے اتھایں فلمایا ڳیاہا۔ ٻہوں پسند کیتا ڳیا۔ ’’آخری گیت‘‘ ادارئہ لوک ورثہ دی طرفوں بݨائی ڳی پہلی تجربانی وڈیو فلم ہئی۔ ایندے اچ اُنہاں تھرپار کر دی ثقافت ، لوک ورثے تے گیتاں دی تلاش دے سفر کوں ہک رومانی کہاݨی اچ بیان کیتا ہا ۔ ’’روہی دھوپ جلی‘‘ وی چولستان دے پس منظر اچ لکھی ڳئی ۔ ’’پیاس‘‘ تے ’’چاند گرہن‘‘ انہاں دے مقبول ترین ٹی وی سیریل ہن۔ ’’پیاس‘‘ اچ سوہانرا (سہیل اصغر) دا مکالمہ ’’وکھری ٹائپ‘‘عام زبان دا محاورہ بݨ ڳیا ہا۔

انہاں دے ہک مقبول سیریل ’’خواہش‘‘ ہا۔ انہاں دی تصانیف اے ہن ۔جنگل کے اس پار جنگل۔ زمین زاد کا اُفق (ترجمہ)، بوطیقا(ترجمہ)۔ انشا نگاری (تنقید)۔ دریا (ٹی وی ڈراما)۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء