اسٹیفن ویلیم ہاکنگ

اسٹیفن ویلیم ہاکنگ نے کائنات دے آغاز توں لا تے ایٹم تک، بلیک ہول توں لا تے تارئیں تک ڈھیر سارئیں چیزیں تے تحقیق کر تے سائنس دے میدان اچ اپݨا ناں کمایا۔ اسٹیفن ہاکنگ ہک برطانوی سائنسدان، پروفیسر تے سائنسی کتابیں دا مصنف ہا، جیڑھا 8 جنوری 1942 اچ برطانیہ اچ آکسفورڈ دے مقام تے پیداتھیا۔ ہاکنگ گلیلیو دے مرݨ دے ٹھیک 300 سال بعد ڄایا۔ ہاکنگ دا پیو ڈاکٹر فرینک ہاکنگ [FRANK HAWKING]بیالوجی دا ماہر ہا۔ ہاکنگ نے فزکس تے کاسمالوجی اچ عظیم الشان کم کیتا تے ہوندئیں کتابیں نے سائنس جہیں مشکل تے ناں سمجھ آوݨ والے مضمون کوں ہک عام آدمی واسطے آسان کر ݙتا۔ 21 سال دی عمر اچ جیڑھے او کیمبرج یونیورسٹی دا طالب علم ہا تاں ہونکوں ہک بیماری جیکوں اے ایل ایس [AMYOTROPHIC LATERAL SCLEROSIS]آہدن چمبڑ ڳئی۔ ایں بیماری دی وجہ کنوں ہاکنگ نے ساری زندگی معذوری دی حالت اچ گزار ݙتی او کرسی توں اٹھی نا سڳدا ہا، نا ٻول سڳدا ہا تے نا ہتھ پیر چول سڳدا ہا لیکن او ہک باہمت، باشعور تے علمی دماغ رکھݨ والا سائنسدان ہا۔ ڈھیر سارے لوکیں واسطے ہاکنگ ہمت تے جرات دا نشان ہا۔ معذوری دے باوجود ہاکنگ نے محنت تے ہمت نال کم کیتا تے سائنس دے موضوعات تے ٻہوں کتاباں لکھیاں۔ ہاکنگ ا پݨے خیالات کوں لوکیں تک پُڄاوݨ کیتے ہک خاص قسم دا کمپیوٹر استعمال کریندا ہا جیڑھا ہوندے خیالات کاغذ تے منتقل کریندا ہا۔

ہاکنگ دے فزکس دے استاد رابرٹ برمن [ROBERT BERMAN]نے نیویارک ٹائم کوں انٹرویو دے دوران ݙسایا جو

"ہاکنگ واسطے صرف اتنا معلوم کرݨ کافی ہوندا ہا جو کوئی کم کیتا ونڄ سڳدے۔ کم دے دوران او اے نا ںݙیہدا ہا جو لوک کیا کریندے پن۔ اواپݨے طریقے نال کم کریندا ہا۔ او زیادہ کتاباں چا کے نا ںگھمدا ہا۔ اوندا دماغ یقینی طور تے باقی لوکیں کنوں بالکل مختلف ہا۔"

ہک دفعہ ٹائمز اخبار دے رپورٹر کوں ہاکنگ ݙسایا جو میݙی اے خواہش ہئی جو میں ہک اینجھی سائنسی کتاب لکھاں جیڑھی ہوائی اݙے دے بْک سٹالیں تے وِکے تے عام عوام کوں سائنس دی اے کتاب سمجھ آ ونڄے۔ ہاکنگ دی کتاب 'اے بریف ہسٹری آف ٹائم' او کتاب ہئی جئیں سائنس کوں عام عوام دا مضمون بنڑا ݙتا۔ ہاکنگ رائل سوسائٹی آف آرٹس دا اعزازی ممبر ہا۔ او پونٹیفیکل اکیڈمی آف سائنسز[PONTIFICAL ACADEMY OF SCIENCES] دا لائف ٹائم ممبر ہا۔ ہاکنگ نے امریکہ دا سب کنوں وݙا شہری اعزار پریزیڈینشل میڈل آف فریڈم وی حاصل کیتا۔ 2002 اچ بی بی سی نیوزنے جیڑھے 100 عظیم ترین برطانوی لوکیں دی لسٹ جاری کیتی تاں ہوندے وچ ہاکنگ دا ناں 25 نمبر دے لکھیا ڳیا۔ او کیمبرج یونیورسٹی وچ ریاضی دا پروفیسر ہا تے ہاکنگ دا شاندار کم کاسمالوجی دے مشکل نظریات کوں آسان کر تے ڈساوݨ ہا۔

پی ایچ ڈی کرݨ دے بعد ہاکنگ گونوائل کالج اچ پروفیسر لڳ ڳیا۔ 1965 اچ ہاکنگ دی شادی جین وائلڈ[JANE BERYL WIDE HAWKING JONES] نال تھئی لیکن 1995 اچ طلاق تھی ڳئی۔ 1995 اچ ہاکنگ نے ݙٖوجھی شادی اپݨی برطانوی نرس ایلیان میسن [ELAINE MASON] نال کیتی جیڑھی2006  تک برقرار رہ ڳئی۔ ہاکنگ دے پہلی شادی کنوں3  ٻال ݙوپترتے ہک دھی پیدا تھئے۔

پروفیسر ہاکنگ 14مارچ 2018 کوں انگلینڈ دے شہر کیمبرج اچ فوت تھیا۔ 14 مارچ 1879 دے ݙینہہ سائنس دا ہک عظیم سائنسدان آئن سٹائن ڄایا تے ہاکنگ 14 مارچ دے ݙینہہ کوں وفات پاتی۔ ہاکنگ دے راکھ کوں ویسٹ منسٹر ایبے[WESTMINSTER ABBEY] دے چرچ اچ نیوٹن دی قبر دے نال دفنایا ڳیا۔ ہاکنگ دی قبر ہک مشہور سائنسدان چارلس ڈارون [CHARLES DARWIN]دی قبر دے وی نال ہے جیکوں 1882 اچ اتھاں دفن کیتا ڳیا ہا۔   

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان