اسمرتی مندھانا

اسمرتی شرینواس مندھانا (ڄَمَّݨ دی تَرِیخ: 18 جولائی، 1996ء) ہک بھارتی زنانی کرکٹ کھلاڑی ہئی جو بھارت قومی زنانیاں کرکٹ ٹیم کِیتے کھیݙدی ہئی۔

ابتدائی زندگی

اسمرتی دی ڄَمَّݨ 18 جولائی، 1996ء کوں ممبئی وِچ اسمیتا اَتے شری نواس مندھانا دے گھر تِھئی۔ جݙاں اوہ ݙو سال دی ہئی، تاں سارا خاندان سانگلی، مہاراشٹر منتقل تِھی ڳیا جِتّھاں اوہ اسکول دی تعلیم مکمل کیتی۔ انّھاں دے پیو اَتے بھائی شراون ضلعی سطح تے سانگلی ضلع کِیتے کھیݙدے ہَن۔ اوہ کرکٹ وِچ حوصلہ افزائی دی وجہ نال مہاراشٹر وِچ 16 سال توں گھٹ عمر دے مقابلیاں وِچ حصہ گھِدّے۔ 9 سال دی عمر وِچ اوہ 15 سال توں گھٹ عمر مہاراشٹر دی ٹیم کِیتے چُݨی ڳئی۔ 11 سال دی عمر وِچ اوہ مہاراشٹر انڈر 19 سال توں گھٹ عمر دی ٹیم دا حصہ بݨ ڳئی۔ اسمرتی دی کرکٹ سرگرمیاں وِچ انّھاں دا خاندان ٻہوں نیڑے نال جُڑیا ہویا ہئی۔ انّھاں دے پیو ہک ادویہ دے تقسیم کار دے نال نال انّھاں دے کرکٹ پروگراماں دی ݙیکھ بھال کریندا ہئی۔ انّھاں دی ماں انّھاں دی خوراک، لباس اَتے تنظیمی معاملات دا خیال رکھیندی ہئی اَتے بھائی شراون ہݨ وی مشق دے دوران گیند بازی کریندا ہئی۔

ڈومیسٹک کیریئر

اسمرتی مندھانا دا پہلا غیر معمولی مظاہرہ اکتوبر 2013ء وِچ آیا جݙاں اوہ پہلی بھارتی زنانی بݨی جیڑھی ہک روزہ کھیݙ وِچ ݙہری سنچری بݨاوݨ وِچ کامیاب تِھئی جݙاں اوہ مہاراشٹر بمقابلہ گجرات کھیݙدے ہوئے 150 گینداں وِچ 224 ناقابل تسخیر رن بݨاوݨ وِچ کامیاب تِھئی۔ ایہ مقابلہ ویسٹ زون 19 سال توں گھٹ عمر کھلاڑیاں کِیتے المبیک کرکٹ گراؤنڈ وڈودرا وِچ کھیݙیا ڳیا۔ 2016ء وِچ ویمنز چیلنجر ٹرافی وِچ اسمرتی ترئے نصف سنچریاں انڈیا ریڈ کِیتے بݨائیاں اَتے ایویں اپݨی ٹیم کوں 82 گینداں وِچ 62 ناقابل تسخیر رن فائنل وِچ انڈیا بلو دے خلاف بݨاوݨ وِچ کامیاب تِھئی۔ 192 رن نال اوہ ایں ٹورنامنٹ دی سب توں زیادہ اسکور کرݨ آلی بݨ ڳئی۔ ستمبر 2016ء وِچ اسمرتی نے برسبین ہیٹ دے نال معاہدہ طے کیتا جو اوہ ویمنز بگ باش لیگ کِیتے ہرمن پریت کور دے نال کھیݙسی، ایویں اوہ پہلی بھارتی بݨ ڳئی جیڑھی ایں لیگ دا حصہ بݨی۔ ملبورن رینیگیڈز کِیتے کھیݙدے ہوئے جنوری 2017ء وِچ اوہ فیلڈنگ کریندے ہوئے عجیب سا محسوس کیتی جݙاں انّھاں دی اوور دی آخری گیند انّھاں دے گھٹنے کوں چوٹ پُڄائی، ایویں اوہ باقی ٹورنامنٹ توں ٻاہر تِھی ڳئی جیندے وِچ اوہ 12 اننگز وِچ 89 رنز بݨا پئی ہئی۔

بین الاقوامی کیریئر

اسمرتی اپݨا پہلا ٹیسٹ مقابلہ اگست 2014ء وِچ انگلینڈ دے خلاف ورمسلے پارک وِچ کھیݙیا۔ انّھاں نے اپݨی ٹیم کوں پہلی اننگز وِچ 22 اَتے ݙوجھی اننگز وِچ 51 اسکور کریندے ہوئے جیتݨ وِچ مدد کیتی؛ بعد دی اننگز وِچ اوہ افتتاحی وکٹ دی سانجھی داری وِچ تھرش کامنی دے نال 76 رن بݨائے جݙاں جو مخالف ٹیم دا کل اسکور 181 ہئی۔ بھارت دے 2016ء دے آسٹریلین دورے دے دوران ہوبارٹ دے بیللیریواوول وِچ اسمرتی نے اپݨی پہلی سنچری بݨائی (109 گینداں تے 102 رن)، جݙاں جو ٹیم کوں ایندے توں کوئی فائدہ نی تِھیا۔ اسمرتی اوہ واحد بھارتی کھلاڑی ہئی جیڑھی دا ناں آئی سی سی زنانیاں دی 2016ء ٹیم وِچ شامل کیتا ڳیا ہئی۔