اساݙے لیڈر(2)

اللہ سئیں آکھیا ’’اِتھوں نکلسیں تاں ونڄݨاں دوزخ اِچ پوسی‘‘ فوراً آکھیُس ’’بھانویں جتھاں ونڄݨاں پووے میکوں اِتھوں کڈھو۔ نورو اَکھیندے جو اونکوں بہشت اِچوں کڈھیونے ‘ ݙوں فرشتے اوندے نال ٹُر پے ۔ ہک سڄے پاسوں اَتے ݙوجھا کھٻے پاسوں اونکوں گھن تے دوزخ دے ہک کھوہ تے پُنج تنویر آنگے ایں کھوہ دے ٻنولے تے فرشتے غُرز چئی کھڑے ہَن ۔ کھوہ اِچوں جیڑھا بندہ ٻاہر نکلے او اونکوں غُرز مار تے وَلا کھوہ اِچ چا سٹن۔ ایہو جیہیں چار کھوہ ہَن ہکے اِچ پنجابی ہَن۔ ہک اِچ سندھی ‘ ہک اِچ بلوچ ‘ اَتے ٻے اِچ پٹھاݨ ہک دے ٻنولے تے غُرز آلے پہریدار فرشتے کائناں ہَن فرشتیں اونکوں ݙسایا جوایہو کھوہ سرائیکیں کیتے ہا نورو پُچھیا جو اوں کھوہ تے پہریدار کیوں کائنی؟

فرشتے کِھل پے اَتے وَلدی ݙتونے جو اِتھاں پہریدار رکھݨ دی اِیں ڳالھوں لوڑ کائنی جو جیڑھا سرائیکی تݨ مار تے زور لا تے ٻنولے تائیں پُڄ ویندے کھوہ اِچ کھڑے ہوئے اوندے ’’سرائیکی بھرانویں‘‘ اِچوں کوئی ہک ’’سرائیکی‘‘ اوندی خچ اِچ ہتھ گھت تے ولا تلے چِھک گھندے ۔ اَساں تاں کھڑوں توں وَت کلھیں نِکتا ویندیں۔ مونہہ اِی سوہݨا اِیں کناں؟

خیرسئیں! شودے نورو کوں وی ہوں کھوہ اِچ بھنوا ماریونے ۔ دڑ نج ونڄ تھیا۔ آنہیں اُپتریج ڳیونس پھتکوڑی مار تے اُٹھیا تَرپ مار کراہیں ٻنولے تئیں ونڄ پُناں اِتلے اِچ کہیں اوندی خُچ اِچ ہتھ گھت تے تلے چھکیا او اَکھیندے جواِتھائیں اوندی اَکھ کُھل ڳئی ۔ نورودی گھر آلی اوندی خُچ اِچ ہتھ گھتی کھڑی ہئی اَتے اَکھیندی پئی ہئی اُٹھدا نیں مُواکانا ݙینہ دا چڑھ اَئے تے توں اَڄاں نیستی کھنڈائی تے سُتا پیں۔

کہیں کوں کاوڑ لڳے بھانویں کوئی رنج تھیوے نورو جیرھی مثال ݙیندے او کوڑی اصلوں کائنی اساں سرائیکی ہیئوں اِینویں ۔ اللہ ڄاݨے کݙاں سدھی واٹ وَلسوں ۔ کݙاں آپت اِچ ٹھر کھئوسوں اَتے کݙاں ہک ٻے دے ٻانہہ بیلی تھیسوں ؟ ٻیاں قوماں کتھوں دیاں کتھ ونڄ پُنین ۔ اساں بِھربھٹے دے وال آنگے اُتھاہیں دے اُتھائیں کھڑوں چھے ۔’’سیاست‘‘ اِچ تاں اسیݙے مکیں ہے ‘ ایہ جو سرائیکی وسیب اِچ سرائیکیں دے حق حقوق سرائیکی ٻولی اَتے سرائیکی صوبے دے ناں تے بݨی ہوئی کہیں ’’پارٹی‘‘ کہیں موومنٹ ‘‘ اَتے کہیں ’’محاذ‘‘ دے کہیں ’’لیڈر‘‘ اَتے کہیں ’’ادنیٰ‘‘ یا ’’اعلیٰ‘‘ کارکن شہریں کنوں پرے تے پروبھریں وستیں اِچ رہݨ آلے سرائیکی کنتے ونڄن اُہنائیں کوں اَپݨی ڳالھ سمجھاوݨ اَتے ہُنائیں نال ڳانڈھا ڳنڈھݨ دی کئی کوشش نی کیتی ۔ کہیں ٻے پاسے شئیت کتھائیں کجھ کم تھیا ہووے تاں تھیا ہووے اَپݨے پاسے تاں ایہ حال اے جو وستیاں اَتے پروبھرے علاقے تاں رہ ڳے ۔ ہک پاسے خود شہریں اِچ کہیں پارٹی ‘ کہیں موومنٹ اَتے کہیں محاذ دا کوئی دفتر کائنی ۔ وݙے وݙے ’’لیڈریں‘‘ دے اَپݨے شہر اِچ ہک ’’یونٹ‘‘ اِی کائنی ۔ نہ کݙاہیں کتھاہیں ممبر بݨاوݨ دی مہم چلائی ہینے ‘ نہ ’’شاخاں‘‘ قائم کیتنے ۔

ہُݨ اِنہائیں کوں کون آکھے جو بھلے لوکو عام لوکیں کنوں ونڄوں اُنہائیں کوں اَپݨی پارٹی ‘ اپݨی موومنٹ یا اَپݨے محاذ دا ممبر بݨائو ۔ ہک ہک ممبر دے ناں دی ’’پرچی‘‘ کٹو ۔ موضع ‘ موضعے اِچ ’’یونٹ‘‘ قائم کرو ہر یونین کونسل اِچ ہک ’’دفتر‘‘ کھولو تحصیل۔ ضلع ڈویژن اَتے وَل ’’صوبے‘‘ دے ’’عہدیداریں‘‘ دے الیکشن کرائو پڑھیے لکھیئے یا اَݨ پڑھ جذبے رکھݨ آلے نینگریں کوں اَڳی تے گھن اَئو ۔ وسیب اِچ پیریں فقیریں دے مزاریں تے ونڄو اُتھاں آنوݨ آلیں نال ڳانڈھا ڳنڈھو۔ کوݙی ‘ کُشتی ‘ وریے تے والی بال دے میل رکھائو جتھاں میلہ یا عرس ہووے اُتھاں پُڄو ۔ ہک ہک دے کنیں اَپݨی ڳالھ پائو سکولیں دے ماسٹریں تے مسیتیں دے امامیں کوں اَپݨے نال رَلائو سرائیکی پڑھاوݨ دا بندوبست کرو ۔ ایں خاطر پڑھیے لکھیے نینگریں دی رضا کار تنظیم بݨائو رڑھ رہکی کرݨ آلے ‘ ونڑج وپار کرݨ آلے اَتے پورھیا کرݨ آلے پورھیتیں دے ݙکھ سُکھ اِچ اُنہائیں نال رہو تاں تُساݙی ’’پارٹی‘‘ تُسیݙی ’’موومنٹ‘‘ یا تُسیݙا ’’محاذ‘‘ کہیں لیکھے ڳنڑیسے اَتے تُساں وی صحیح سچ دے ’’لیڈر‘‘ ہوسو پر ایہو سبھو کجھ کرݨ کیتے ہک کم کرݨا پوسے۔ اَپݨی ’’میں‘‘ مارݨی پوسے اَتے ایہ ݙاڈھا اَوکھا کم اِیں اسیݙے ’’لیڈریں‘‘ کنے ایہا ہِکا ’’میں‘‘ تاں ہے جیرھی اساں سبھنائیں کوں مُسائی وَدی اے۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان