اساݙا فرض

سرائیکی شعبے ، سرائیکی تعلیم یا سرائیکی پوسٹیں سانگے میں جو کجھ کیتے اے کہیں تے احسان تھورا کینھی، فرض اے، ماء ٻولی تے ماء دھرتی دے اسیݙے اُتے اتنے لہݨے ہن جو اساں ساری حیاتی سیوا کروں ول وی لہݨے نی لہا سڳدے۔ میکوں صلے ستائش دی تمنا کینھی تے نہ میں کہیں توں کجھ منگداں، پر اے وی حقیقت اے جو اڄ سرائیکی شعبیں ءِ چ تے تعلیمی اداریں ءِ چ جیرھے لوک تعینات ہن ، انہاں وچوں کجھ لوک ایجھے ہن جیرھے میݙی ذات نال اللہ واسطے دا ویر رکھیندن تے جیویں موقع ملدے ݙنگ مار چھوڑیندن، زکریا یونیورسٹی دے سرائیکی شعبے کہیں کٹھ ءِ چ میکوں نی سݙیا ویندا، چوہدری غلام مصطفیٰ جݙاں وائس چانسلر بݨیے تاں او ٹائم ݙیندے ہن، میکوں یونیورسٹی دے دوست طفیل خان بلوچ آکھیا جو اساں تحریک چلیندوں جو تہاٖڈا ناں سرائیکی شعبے دے بانی دے طور تے لکھیا ونجٖے میں آکھیا کوئی فیدہ کینھی، انہاں ویچاریں کوں ٻیا اوکھا نہ کرو ۔ او پہلے وی سڑ تے کولے تھے ودن، ٻی ڳال اے جو ضروری نی جو اے منن تاں پک تھیسے جو ڳال اے ہے جو اے منن تے بھاویں نہ منن، کوئی فرق نی پمدا ، ڳال فخر یا وݙائی دی نی ، حقائق دی ہے۔ تساں آپ ݙسو جو بھاویں سو سال بعد جݙاں وی سرائیکی شعبے دے بانی دا ناں لکھیا ویسی تساں آپ ݙسو جو اے میݙا ناں نہ لکھسن تاں کیندا لکھسن؟ جݙاں عدالتی فیصلے دا حوالہ ݙیسن مدعی تاں دے طور تے کیندا ناں آئوسے؟ سرائیکی شعبے آلے کم نی کریندے، موٹیاں تنخوائیں سرائیکی دیاں حرام کیتی ویندن، اساں فقیر اپݨے ٻالیں دے منہ دا گراں سرائیکی کوں ݙیندوں، دل کوں خوشی تھیندی اے، اے ویچارے تاں ڈپریشن دیاں گولیاں کھمدن، سرائیکی شعبے دی ترقی تے سرائیکی ایریا سٹڈی سنٹر دے پوسٹاں سانگے عاشق درانی توں گھن تے سارے وائس چانسلراں کوں اساں ملیوں شکیل خان بیورو چیف ڈان دے وائس چانسلر ظفر اللہ بھٹی صَیب یار ہن ۔ وسیب سانگے کوششاں کرݨ اساݙا فرض اے تے اے فرض پورا کریندے راہسوں۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء