اساں ویزے مُکݨ کنوں ہک ݙینہ پہلے دے ٹکٹ بُک کرا گھدّے

ساݙا ویزا29؍اگست تئیں ہا۔ ٹکٹاں بُک کراوݨ ویلے ٹرمینل انچارج ݙسیا جو 29؍اگست کوں اِتھوں پاکستانی بس لہور ولسی جیندیاں سیٹاں سَوڑیاں ‘سخت تے بے آرام کرݨ آلیاں ہِن ‘جݙݨ جو 28؍اگست کوں اُوہا بس ولا ویسی جیندے اُتّے تُساں پاکستانوں آئے ہو۔ آوݨ ویلے انڈیا دی DTCدی بس ساکوں دِلّی اَرام نال گھن اَئی ہئی ۔ اَساں گلبرگ کنوں واہگہ امیگریشن تئیں پاکستانی بس تے آئے ہاسے ۔ ݙونہاں دا فرق صاف ظاہر ہا ۔ تہوں اساں ویزے دا ہک ݙینہ چھوڑ ݙتا اَتے 28اگست جمعہ وار دیاں سیٹاں بُک کرا گھدّیاں۔ تُساں اندازہ لئو جو ساݙا ویزا کُل ݙہ ݙینہاں دا ہا ۔ آگرہ تے اجمیر وی ونڄݨاں ہا ۔ آخری ݙو ݙینہ شاپنگ واسطے رکھے ہَن تے جیندے وچوں اساں اپݨے اَرام دی خاطر شاپنگ دے ہک ݙینہ دی قربانی ݙے ݙتی۔ پاکستانی دوستی بس تے ہندوستانی دوستی بس دی حالت دا اندازہ آپ لا گھنو۔

برحال اِنوں ٹکٹاں بُک تھیاں اُنّوں ظہور دھریجہ کاغذات فوٹو سٹیٹ کرا کے آ ڳئے ۔ اُنہاں کاغذات حوالے کیتے اساں ٹِکٹاں چاتیاں ۔ ہک بدمزگی ایہ تھئی جو پاکستانی TDCPآلے سیٹاں دی بکنگ وی ٹکٹ دے نال کریندن پر DTC آلیاںآکھیا جو ونڄݨ آلے ݙینہ جہڑا پہلے آسی اُوکوں اڳوں سیٹ ملسِی۔ ایہ نواں اُصول ہا ۔ بر حال اساں جہڑے ݙینہ سوار تھیوݨ آیوسے ساکوں سیٹاں دے 21 کنوں 30تئیں نمبر ملے ۔ پہلے 20بندے اڳے آ چُکے ہَن ۔ ایہ ٻئی ڳالھ ہے جو 16 سواریاں ساݙے بعد وی ہَن ۔

ٹکٹاں بُک کراوݨ دے بعدڈاکٹر راج کمار ملک ساکوں اَپݨے دفتر دیونگر آریہ سماج روڈ کِکّر چوک ‘ کرول باغ نویں دِلّی گھن اَئے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان