اساں نکھڑڳیوسے

اساݙیاںݙو ٹکٹاں 5/01ݙٻے وچ ہَن اَتے چھی 5/12وچ ۔ عابد سیال تے جمشید دھریجہ ݙو ٹکٹاں آلے ݙٻے وچ ہَن ۔ گُڑ گانواں دے بعد گݙی ہک نِکیّ جیہیں ٹیشن تے رُکی تاں ظہور دھریجہ اُنہاں کوں گھنݨ کیتے لہہ ڳئے ۔ گݙی ٹُر پئی ۔ اَساں تریہاں دی بھال اِچ ریہوسے ۔ گݙی دِلّی دے ہک ہالٹ ’’سرائے روہیلہ ‘‘ تے رُکی تاں اوہ سارے غلطی نال اُتھاں لہہ پئے ۔ اساں باقی پنج دِلّی کینٹ تے ونڄ لتھّے ۔ اُنہاں دا انتظار کیتا پر اوہ نہ لبھیّ ۔ وَلا وَلا ہر پاسے بھالیا پر اوہ نہ لدّھے ۔اوہ کیویں لبھّن ہا ‘اوہ تاں پچھلے ٹیشن تے لہہ چُکے ہَن ۔ ٹیشن کنوں ٻاہر آ کے میٹرو ٹیشن تے پُڄ ڳیوسے ۔ ایہ چاندنی چوک ہا ۔ ٹوکن؍ٹکٹ گھدّے اَتے راجیو چوک ونڄ لتھوسے۔ ایہ تلویں میٹرو گݙی ہئی۔ اِتھاں لہہ کے اساں اُتلی میٹرو تے آ ڳیوسے ۔ اِتھوں اساں راجندر پلیس ونڄݨاں ہا ۔ایں ویلے تئیں رات دے پوݨے یارھاں وڄدے پئے ہَن ۔ رات یارھاں وڄے میٹرو بند تھی ویندی ہے اَتّے سویلے پنج وڄے ولا چل پوندی ہے ۔ اساں رات کوں 11:15تے راجندر پیلس آن لتھوسے۔ ٹیشن تے گارڈ ‘ ملازم وی ایں آخری ٹرین تے مݙی کُنج کے ویندے پئے ہَن ۔ جمعدار ٹیشن دی صفائی کیتے آئے ودّے ہَن ۔

کھاݨے دے ہوٹل بند تھی چُکے ہَن ۔ دُکاناں بند ہَن ۔ دِلّی وچ دکاناں ست وڄے کنوں بند تھیوݨ لڳ ویندن ۔ ہوٹل تے کھاوݨ پیوݨ دیاں دکاناں نئوں وڄے تئیں بند تھی ویندن۔ برحال ہک کھوکھے دے اڳوں پردہ لڳا کھڑا ہا۔ اندر بتّی ٻلدی پئی ہئی اَتے میوزک وی چلدی پئی ہئی ۔ اوکوں ٻاہروں اَواز ݙے کے پیپسی دی بوتل تے بسکوٹ دا ݙٻہ منگیا ۔ اوندے کول اُوں ویلے صرف منرل واٹر ہا ۔ اڳوّں ایوسے تاں ہک سٹور بند تھیندا پیا ہا ۔ اساں شے منگی تاں پانڈیاں ݙسّیا جو سیل بند ہے ۔ اساں درخواس کیتی جو اساں بُکھّے ہیں کیلے ݙئیو چا ۔ اُنہاں ساݙی بُکھ اُتّے ترس چا کیتا اَتے 20/-روپے کلو دے حساب نال32/-روپے دے کیلے ݙتے۔ دِلّی وچ کیلے وزن دے حساب نال وِکدن ۔ میں اوکوں سو روپے ݙتّے اوندے کول 65/-روپے کُھلے ہَن ۔ میں آکھیا جو ترے روپے رہݨ ݙئیو ‘اونیں آکھیا ‘ نہ سئیں نہ ‘ اساں مجبوری کنوں فیدہ نھیں چیندے ۔ ہک کیلا ٻیا گھنو ۔ ایں طرح ہندوستانی35/-روپے (پاکستانی 62.50روپے) وچ ہک درجن کیلے ملے ۔ کیلیاں دا سائز اہجاں ہا جو جہڑا ݙیکھے ہا اوندا وی گھنݨ دا روح کرے ہا ۔ اَساں دِلیّ وچ ہک اَدھ جاء ۔40/-روپے درجن وی کیلے گھدّے ہَن ۔ کیلے چھوٹے ہووِن تاں وزن نال زیادہ چڑھدن ۔ اڳوں آئیوسے تاں نہ  بسکٹ ملے نہ کھیر دے پیکٹ ۔اُوں رات اساں کیلے کھا کے سُم پیوسے۔

میں کیلے گھن کے مُڑیم تاں طاہر دھریجہ آکھیا جو وَل ونڄو تے بسکٹ وی گھنّو چا ‘ میں آکھیا وعدے موجب میں صرف کیلے آکھے ہَم ‘تہوں ہُݨ میں نویں ڳالھ کرکے آپ کوں بے بھرما نھیں کریندا ۔ اوہ لوک زبان دے پکے ہَن ۔ اُنہاں ساکوں بُکھّا ݙیکھ کے کیلے ݙتے ہِن ورنہ سٹور تاں بند ہا ‘تہوں ساکوں وی آپ کوں دگھیرݨ نِھیں ٹھہندا۔

بھون پُڄیوسے تاں ظہور دھریجہ ‘ عابد سیال  تے جمشید دھریجہ ساݙے کنوں اڳیّ رکشے اُتے آ چُکے ہَن ۔ ساہ اِچ ساہ آیا ۔ جمشید تے عابد سیال دی طبیعت خراب ہئی ۔ او سَم چُکے ہَن ۔ اساں ظہور دھریجہ کنوں حال گھدّا ۔ اُنہاں ݙسیا جو سرائے روہیلہ دے نال کرول باغ ہا ۔ اَساں ٹیشن توں ٻاہر آ کے کرول باغ توں رکشہ گھدا تے بھون آ ڳئے ہَیں ۔ بَھون کرول باغ دے نال ہا ‘ساکوں چنڳاں بھلا وَلاّ پیا ہا ۔ سمّݨ کنوں پہلے میں رومال ‘ جراباں دھوتے ‘ اُنہاں کوں تڑاں تے گھتیااَتے اے آہدا سم پیوم۔ ’’آری نندیا آ جا ۔ اَکھیاں گُرمُر لاجا ‘‘ تھکیڑے کنوں دیر تئیں نندر نہ آئی پر وَل ہوش اِی نہ ریہا ۔ سویلے اُٹھیوسے تاں فجر دے چھی وڄ چُکے ہَن ۔ ایہ اگست دی 27تاریخ ہئی۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان